بۇگىن تاڭعى ساعات 05:19-دا اقمولا وبلىسى اتباسار اۋدانىنىڭ حرياششەۆكا اۋىلىندا 100 شارشى مەتر جەكە تۇرعىن ۇيدە ءورت شىقتى. بۇل تۋرالى ءىىم تجك ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.
ۇيدە كوپبالالى وتباسى, 7 ادام تۇرعان, ولار 1979 جانە 1981 جىلدارى تۋعان اتا – اناسى, 5 بالاسى – 2004, 2005, 2007, 2008 جىلدارى تۋعان ۇلدار مەن 2012 جىلى تۋعان قىز بالا.
اتباسار قالاسىنىڭ № 4 مامانداندىرىلعان ءورت ءسوندىرۋ بولىمىنە دەيىنگى اراقاشىقتىق 25 شاقىرىمدى قۇرايدى. ءورت ءسوندىرۋ بولىمشەلەرى كەلگەنگە دەيىن اتا-اناسى مەن 2004 جانە 2012 جىلى تۋعان ەكى بالا سىنعان تەرەزە ارقىلى وزدىگىنەن شىقتى. ءورت سالدارىنان ءۇيدىڭ توبە جابىنى قۇلادى.
ساعات 06:40-تا ءورتتىڭ بەتى قايتىپ, ساعات 08:25-تە ءسوندىرىلدى. قازىرگى تاڭدا ۇيىندىلەردى تازالاۋ جۇمىستارى جۇرگىزىلىپ جاتىر. وقيعا ورنىندا ءۇش بالانىڭ ءمايىتى تابىلدى. ءورتتى سوندىرۋگە تجد-نەن 12 قىزمەتكەر مەن 2 تەحنيكا, ەرىكتى ءورت ءسوندىرۋ قۇرىلىمدارى مەن تارتىلعان ۇيىمداردان 3 ادام جانە 3 تەحنيكا جۇمىلدىرىلدى. وقيعا ورنىندا اۋداندىق پوليتسيا ءبولىمىنىڭ كەزەكشى جەدەل-تەرگەۋ توبى جۇمىس ىستەيدى. ءورتتىڭ شىعۋ سەبەبى انىقتالۋدا. سونىمەن قاتار كوكشەتاۋ قالاسىنان ءورت سىناق زەرتحاناسى جىبەرىلدى.