ەلىمىزدىڭ قورعانىس سالاسى جىلدان-جىلعا كۇشەيىپ, اسكەر قاتارىنىڭ سانىنا ەمەس, ساپاسىنا اسا ءمان بەرىلىپ كەلەدى. قورعانىس قابىلەتىن ارتتىرۋعا اسكەري قۇرامالارعا كەلىسىم-شارتپەن قىزمەت ەتەتىن ازاماتتار مەن ازاماتشالاردى تارتۋ ماڭىزدى ەكەنى ايقىن.
ۇمىتكەرلەردى ساپالى جيناقتاۋ ءۇشىن جاۋاپتى لاۋازىمدىق تۇلعالاردىڭ مىندەتىن ارتتىرۋ 2009 جىلدىڭ 22 ماۋسىمىنداعى №221 قورعانىس ءمينيسترىنىڭ “ساربازدار مەن سەرجانتتار قۇرامى كەلىسىم-شارت بويىنشا اسكەري قىزمەتشىلەرىنىڭ اسكەري قىزمەتكە كىرۋ جانە وتكەرۋ ءبولىگىندە قارۋلى كۇشتەردە, باسقا دا اسكەر تەكتەرى مەن اسكەري قۇرالىمدارىندا اسكەري قىزمەت وتكەرۋ ەرەجەلەرىن قولدانۋ تۋرالى نۇسقاۋلىقتى بەكىتۋ تۋرالى” بۇيرىعىندا كورسەتىلگەن. قورعانىس ءمينيسترى ءوزىنىڭ بۇيرىعىندا جەرگىلىكتى اسكەري ۇيىمداردىڭ جاۋاپتى تۇلعالارىنا جانە اسكەري ءبولىم كومانديرلەرىنە وسى جۇمىستى وتكىزۋ ەرەجەلەرىن كورسەتكەن.
قازىرگى تاڭدا قارۋلى كۇشتەردە كاسىپقوي اسكەرلەردى قۇرۋ ءۇشىن ۇلكەن جۇمىستار جۇرگىزىلۋدە. كەلىسىم-شارت بويىنشا قارۋلى كۇشتەردىڭ قاتارىنا 19 جاستان اسقان جاس ازاماتتار قابىلدانادى. اتىراۋ وبلىسى قورعانىس ىستەرى جونىندەگى دەپارتامەنتى كەلىسىم-شارت بويىنشا اسكەري قىزمەتكە اسكەري قىزمەتشىلەردى جيناقتاۋدا. كەلىسىم-شارت بويىنشا اسكەري قىزمەتكە وتكەن جاستارىمىزعا اسكەري قىزمەتشى اتالعان سوڭ كوپ جەڭىلدىكتەر بار: ەڭبەكاقىسىنىڭ جىلما-جىل ءوسۋى, 45 تاۋلىك كەزەكتى ەڭبەك دەمالىسى, ءبىلىم دەڭگەيىن كوتەرەمىن دەگەندەرگە 50 پايىزدىق جەڭىلدىك جانە 45 جاستان باستاپ زەينەتكەرلىككە شىعۋ مۇمكىندىگى.
اسكەري قىزمەتكە ازاماتتاردى قابىلداماس بۇرىن جەرگىلىكتى جانە وبلىستىق دەپارتامەنتتەن دارىگەرلىك ساراپتامادان, پسيحولوگ ماماننىڭ الدىنان وتكىزىلەدى. سول مامانداردىڭ سىناعىنان سۇرىنبەي وتسە عانا اسكەري قىزمەتكە قابىلدانادى.
كەلىسىم-شارت بويىنشا اسكەري قىزمەت وتەۋگە نيەت بىلدىرەتىندەر سانى وتە كوپ. قارۋلى كۇشتەرگە ءوز ءىسىنىڭ مايتالمانى بولا الاتىن, مورالدىق, پسيحولوگيالىق ۇستامدى جانە دەنە دايارلىعى مىقتى, ءارى كاسىپتىك دەڭگەيى جوعارى ازاماتتار كونكۋرستىق ىرىكتەۋدەن كەيىن قابىلدانادى.
2009-2010 جىل ارالىعىندا قارۋلى كۇشتەرگە 81 ادام باعىتتالدى, ونىڭ ىشىنەن 72-ءسى اسكەري قىزمەتىن وتەپ جاتىر. اتىراۋ وبلىسىنىڭ قورعانىس ىستەرى جونىندەگى قالالىق باسقارماسى مەن اۋداندىق ءبولىمدەرىندە اسكەري قىزمەتكە ورنالاسۋ باعىتتارى جونىندەگى اقپاراتتار تاقتاسى ورناتىلعان.
ا.كۋكاتوۆ, اتىراۋ وبلىسى قورعانىس ىستەرى جونىندەگى دەپارتامەنتىنىڭ باستىعى, پودپولكوۆنيك.