پرەزيدەنت جانىنداعى ورتالىق كوممۋنيكاتسيالار قىزمەتى الاڭىندا «ۇلتتىق ۆولونتەرلەر جەلىسى» زتب توراعاسى ۆەرا كيم مەن «جاس ۇلان» بىرىڭعاي بالالار مەن جاسوسپىرىمدەر ۇيىمىنىڭ توراعاسى دينارا سادۋاقاسوۆا كارانتين كەزىندەگى ۆولونتەرلىك قىزمەت جايىندا بايانداپ بەردى.
«مەن كوروناۆيرۋس ينفەكتسياسىمەن كۇرەسۋگە ۇلكەن ەڭبەك سىڭىرگەن ازاماتتار, ۆولونتەرلەر تۋرالى ايتىپ بەرگىم كەلىپ تۇر. ەلىمىزدىڭ اقجۇرەك ازاماتتارى ەڭبەگىنە ەش اقى سۇراماستان, ۋاقىتىن, دەنساۋلىعىن تاۋەكەلگە تىگىپ, الدىڭعى شەپتەن تابىلدى. توتەنشە جاعداي جاريالانعان بويدا ەلىمىزدەگى ۆولونتەرلىك توپتاردى بىرىكتىرىپ, ورتاق جەلى جاسادىق. ونداعى نەگىزگى ماقساتىمىز – حالىقتىڭ جاعدايىنان حابار الىپ, قاجەتتىلىكتەرىن انىقتاۋ ەدى», دەدى ۆەرا كيم.
ۆ.كيمنىڭ اقپاراتىنا قاراعاندا, تج رەجىمى كەزىندە ۆولونتەرلەر ازىق-ت ۇلىك جيىنتىعىن تۇسىرۋمەن, ولشەپ-وراۋمەن جانە تاسىمالداۋمەن اينالىسىپ, بۇل رەتتە بارلىق جۇمىس جەكە قورعانىش قۇرالدارىن پايدالانۋ ارقىلى ۇيىمداستىرىلعان. سونىمەن قاتار ۆولونتەرلەر مەديتسينالىق مەكەمەلەردىڭ قىزمەتكەرلەرىنە بەلسەندى كومەك كورسەتىپ, ولاردىڭ بالالارىنا ىستىق تاماق بەرىپ, الاڭسىز قىزمەت ەتۋىنە تولىق جاعداي جاسادى.
تۇرعىندار تاراپىنان كومەك تۋرالى ايتا كەلە, ەرىكتىلەر بىرلەستىگىنىڭ جەتەكشىسى وتاندىق شاعىن جانە ورتا بيزنەسكە, سونىڭ ىشىندە «MAGNUM» سۋپەرماركەتتەر جەلىسىنىڭ وكىلدەرىنە العىس ءبىلدىردى. سونىمەن قاتار ول حالىققا كومەك كورسەتۋ ءۇشىن دەمەۋشىلەر عانا ەمەس, ۆولونتەرلەر جۇرگىزىپ جاتقان جۇمىستارعا قولداۋ كورسەتكەن ءتۇرلى قايىرىمدىلىق قورلارىنا العىس ءبىلدىردى. پاندەميادان زارداپ شەككەن ەلدى مەكەندەرگە كوكونىس پەن جەمىس-جيدەكتەر جىبەرگەن ەلىمىزدىڭ وڭتۇستىگىندەگى فەرمەرلەردىڭ ەڭبەگى ەرەكشە اتالدى. وعان قوسا كوپتەگەن كىشىگىرىم ناۋبايحانالاردىڭ نان ءپىسىرىپ, ۆولونتەرلەر ارقىلى مۇقتاجدارعا تەگىن تاراتىپ بەرگەنى بەلگىلى بولدى.
«توتەنشە جاعداي كەزىندە بار-لىق ءىس-شارا قاجەتتى قاۋىپسىزدىك تالاپتارىن ەسكەرە وتىرىپ جۇرگىزىلدى. ءبىزدىڭ كوماندادا جۇمىس ىستەگەن ۆولونتەرلەردىڭ ەشقايسىسى اۋىرعان جوق. بىراق ءبىزدىڭ دوستارىمىزدىڭ, سەرىكتەس ۇيىمداردىڭ اراسىندا كوروناۆيرۋس ينفەكتسياسىن جۇقتىرعان ۆولونتەرلەردىڭ بار ەكەنىن بىلەمىن. بۇل ءوز كەزەگىندە ۆولونتەرلەردىڭ ۆيرۋس قاۋپىنە قاراماستان, ەلىمىزدىڭ ىندەتتى جەڭۋ جولىنداعى كۇرەسىنە بەلسەنە اتسالىسقانىن كورسەتەدى», دەدى ۆەرا كيم.
ودان ءارى ۆولونتەرلەر جەلىسىنىڭ باسشىسى سەنىم تەلەفوندارىنا حابارلاسقاندار جونىندە اڭگىمەلەپ بەردى. ونىڭ ايتۋىنشا, توتەنشە جاعداي كەزىندە 2 مىڭنان استام ادام كومەك سۇراپ, قوڭىراۋ شالىپتى. «زەينەت جاسىنداعى كىسىلەر دە حابارلاستى. ءبىز 851 وتباسىنا كومەكتەستىك. ارنايى ءتىزىم جاسالدى. ءبىر رەت كومەك الىپ, ەندى باسقالارعا كومەكتەسىڭىزدەر دەگەن ادامدار دا بولعانىن اتاپ ءوتۋ كەرەك», دەدى ول.
ءباسپاسوز ءماسليحاتىندا ءمالىم بولعانداي, قازىرگى ۋاقىتتا جالعىزباستى ادامدارعا كوبىرەك جاردەم بەرىلىپ جاتىر. «قازىر جالعىز قالعان جاندار ءومىردىڭ قيىندىعىمەن بەتپە-بەت كەلگەنىن ايتا كەتۋ كەرەك. ونداي ساناتتاعى ادامداردىڭ ءبىرازى – ەگدە جاستاعىلار. ولارعا ءبىر رەت اپارىلعان ازىق-ت ۇلىك 1-2 اپتاعا جەتۋى مۇمكىن. كەيدە بىزگە ەكىنشى رەت حابارلاساتىن زەينەتكەرلەر دە بولادى. وندايدا قاراجاتىمىز بولسا, مىندەتتى تۇردە ازىق-ت ۇلىك اپارىپ بەرەمىز», دەدى ۇيىم باسشىسى.
ءدال قازىرگىدەي كارانتين كەزىندە زەينەتكەر-دارىگەرلەردىڭ كوپشىلىگى پاتسيەنتتەرگە COVID-19-عا جاتپايتىن سوزىلمالى جانە باسقا دا اۋرۋلار بويىنشا ونلاين-رەجىمدە كەڭەس بەرىپ جاتقانى دا حابارلاندى.
ء«بىز سونداي-اق جاڭا قۇرىلعان ستاتسيونارلار مەن پروۆيزورلاردا كەرەۋەتتەردى, وتتەگى باللوندارىن تاسىمالداۋعا كومەكتەسۋ, سۋ سالىنعان فۋرالاردى ءتۇسىرۋ ءۇشىن سپورت فەدەراتسيالارىنىڭ وكىلدەرىن, اسكەري, دەنە دايارلىعى كۇشتى جانداردى تارتامىز», دەدى ۆ.كيم.
ال «جاس ۇلان» بجۇ توراعاسى دينارا سادۋاقاسوۆا ۆولونتەر بولۋ ءۇشىن نيەت پەن ىنتا جەتكىلىكتى ەكەنىن ايتا كەلە, ءوزى باسقارىپ وتىرعان قۇرىلىم جانىنداعى ۆولونتەرلەر شتابىنىڭ جۇمىسىنا توقتالدى. دينارا سادۋاقاسوۆانىڭ ايتۋىنشا, وندا رەسپۋبليكا بويىنشا 3000 جاس تىركەلگەن. «قازىر رەسپۋبليكالىق ۆولونتەرلەر شتابى قاتارىندا ءارتۇرلى جاستاعى ءۇش مىڭنان استام بەلسەندى بار. زاڭدا كامەلەتكە تولعاندار عانا ۆولونتەر بولا الادى دەپ جازىلعان. بىراق جاعداي قازىر كۇردەلى. ءبىز 14-15 جاستاعى بوزبالالار مەن قىزداردى, 60-70 جاستاعى اجەلەر مەن اتالاردى كورىپ وتىرمىز. مىسالى, توتەنشە جاعداي كەزىندە پسيحولوگ بولىپ قىزمەت اتقاراتىن ەكى ەرەسەك بەلسەندى پسيحولوگيالىق كومەك كلۋبىن جۇرگىزدى. كونسۋلتاتسيا تەگىن ۇيىمداستىرىلدى. كوپتەگەن ادامعا دەپرەسسيامەن كۇرەسۋگە كومەكتەستى. ال ءبىزدىڭ جاسوسپىرىمدەرىمىز ءارتۇرلى ءىس-شارالار, چەللەندجدەر مەن كونكۋرستار وتكىزىپ, بالالاردىڭ بوس ۋاقىتىن ءتيىمدى وتكىزۋلەرىنە سەپتىگىن تيگىزدى», دەيدى د.سادۋاقاسوۆا.
سونىمەن بىرگە ءباسپاسوز ءماسليحاتىندا ۆولونتەرلەردىڭ ماقتاارال اۋدانىنداعى سۋ تاسقىنىنان زارداپ شەككەن وتباسىلارعا كومەك كورسەتكەنى تۋرالى دا ايتىلدى. شىمكەنت جانە تۇركىستان وبلىسى بەلسەندىلەرى بىرىگىپ, جەرگىلىكتى اۋرۋحانا ءۇشىن 12 وتتەگى كونتسەنتراتىن ساتىپ اپەرگەن.