قاراعاندى وبلىسىندا جۇرگىزۋشىلەر جىل سوڭىنا دەيىن جاڭارتىلعان "قاراعاندى – بالقاش" تاسجولىمەن جۇرە الادى, دەپ حابارلادى يدم ءباسپاسوز قىزمەتى, - دەپ حابارلايدى Egemen.kz.
بۇل تۋرالى رەسپۋبليكالىق ماڭىزى بار اۆتوموبيل جولىنىڭ ۋچاسكەلەرىن تەكسەرۋ بارىسىندا "QazAvtoJol" ۇك" اق باسقارما توراعاسى ۇلان ءالىپوۆ مالىمدەگەن.
ۇزىندىعى 363 شاقىرىمدى قۇرايتىن "قاراعاندى – بالقاش" تاسجولىن قايتا جاڭارتۋ جۇمىستارى 2019 جىلى باستالعان بولاتىن. قازىرگى تاڭدا تاسجولدىڭ بارلىق ۋچاسكەلەرىندە قۇرىلىس-مونتاجداۋ جۇمىستارى بەلسەندى تۇردە جۇرگىزىلىپ جاتىر. ناقتىراق ايتقاندا, جەر قازۋ جۇمىستارىنىڭ 73% (22,7 ملن تەكشە مەتر) ورىندالعان. سونداي-اق, جولدىڭ 95 شاقىرىمىندا جول نەگىزىنىڭ قوسىمشا قاباتى, 41 شاقىرىمىندا جول نەگىزىنىڭ تومەنگى قاباتى, 68 شاقىرىمىندا جول نەگىزىنىڭ جوعارعى قاباتى, 58 شاقىرىمىندا جول جابىندىسىنىڭ تومەنگى قاباتى توسەلدى. بۇدان بولەك, جولشىلار 165 سۋ وتكىزۋ قۇبىرىن ورناتىپ ۇلگەرگەن.
قايتا جاڭارتۋدان وتكەن سوڭ جول 4 جولاعى بار ءى-ب تەحنيكالىق ساناتىنداعى جولعا سايكەستەندىرىلەتىن بولادى. ايتا كەتۋ كەرەك, جولدى كەڭەيتۋ ۋچاسكەلەردەگى اپاتتىلىق دەڭگەيىن ايتارلىقتاي تومەندەتىپ, جولدىڭ كولىكتى وتكىزۋ قابىلەتىن بىرنەشە ەسەگە ارتتىرا تۇسپەك.
جوبا 28 كوپىر مەن جول وتپەلەرىنىڭ, 377 سۋ وتكىزۋ قۇبىرىنىڭ, دەمالىس الاڭدارى مەن ەلدى مەكەندەر ماڭىندا ورناتىلاتىن اۆتوپاۆيلونداردىڭ قۇرىلىسىن قاراستىرادى.
مەردىگەرلىك ۇيىمدار – "سپ كازگەرستروي" جانە CITIC Construction Co.Ltd كومپانيالارى. قۇرىلىس جۇمىستارىنا تەحنيكانىڭ 1720 بىرلىگى, 2250 ادام جۇمىلدىرىلعان. 500 ادام – نىسانعا جاقىن ورنالاسقان ەلدى مەكەندەردىڭ تۇرعىندارى.
جولشىلاردىڭ الدىندا وسى جىلدىڭ سوڭىنا دەيىن اۆتوموبيل جولىنىڭ تولىق بويىندا جول جابىندىسىنىڭ تومەنگى قاباتى بويىنشا قوزعالىستى اشۋ مىندەتى تۇر.