ەلىمىزدە جۇزدەگەن ۆولونتەر تاۋلىك بويى دارىگەرلەرمەن بىرگە قىزمەت ەتۋدە. ولار وقشاۋلانعان ناۋقاستاردى باقىلاپ, اۋرۋحانا, پروۆيزور ورتالىقتارىندا دارىگەرلەرگە كومەكتەسۋدە. ۆولونتەرلەردىڭ ماقساتى – ىندەتتىڭ تارالۋىن توقتاتۋعا بارىنشا اتسالىسۋ.
وبلىس ورتالىعىنداعى «بايانتاۋ» سپورت كەشەنىندە ارنايى گوسپيتال اشىلدى. بۇل جەردە كوروناۆيرۋستىق ينفەكتسياعا ۇقساس بەلگىلەرى بار ناۋقاستار قابىلدانادى. ال وسى كەشەندە سپورت نۇسقاۋشىسى بولىپ قىزمەت ەتكەن ۆولونتەر – ازامات قارعوجينوۆ ترياج ورتالىعىندا ۆولونتەر دوستارىمەن بىرگە دارىگەرلەرگە كومەكتەسۋدە. ولار ورتالىقتا تازالىق ساقتاۋ, ناۋقاستارعا ازىق-ت ۇلىك جەتكىزۋ سياقتى قىزمەتتەردى اتقارادى.
– ارينە, العاشقىدا فيزيكالىق, پسيحولوگيالىق تۇرعىدان قيىن بولدى. قازىر ۇيرەندىك. ارنايى قورعانىش كيىمىن كيەمىز, – دەيدى ازامات.
سپورتشى, ۆولونتەر زافار شافيكوۆ كۇندىزگى اۋىسىمدا جۇمىس ىستەيدى.
قازىر پروۆيزورلىق ورتالىققا اينالعان اۋرۋحانادا ازامات پەن زافار سەكىلدى ۆولونتەرلەر از ەمەس. بارلىعى دا ارنايى قورعانىش كيىمدەرىن كيىپ, اۋىسىمعا دايىن جۇرەدى. ىندەتپەن كۇرەسىپ جۇرگەن دارىگەرلەرگە كومەك كورسەتەدى. جەرگىلىكتى ەكى كوللەدج ۇجىمى تۇسكى جانە كەشكى اس ازىرلەيدى. مىسالى, يانا كاسيان مۋزىكالىق كوللەدجدە سكريپكادان ساباق بەرسە, قازىر ول وقىتۋشىلىعىن ۋاقىتشا اسپازدىققا اۋىستىرىپتى. يانا باستاعان قىزدار پروۆيزورلىق گوسپيتالدا قىزمەت ەتىپ جۇرگەن 25 دارىگەرگە تۇسكى اس ازىرلەيدى.
ال پاۆلودارلىق بلوگەر كونستانتين مۋزالەۆسكي 14 ساعات بويى جابىق قورعانىش كيىمدە ءجۇرىپ, دارىگەرلەر كومەكتەسۋدە. ول دا ۆولونتەر-سانيتار اتاندى.
– مەن «بايانتاۋ» ترياج ورتالىعىنا الەۋمەتتىك جەلىلەردەگى دارىگەرلەر شاقىرۋىن كورىپ, بىردەن كەلدىم, – دەيدى كونستانتين مۋزالەۆسكي. – بلوك-بەكەتتەردە, اۋرۋحانالاردا دارىگەرلەرمەن بىرگە ىندەتپەن كۇرەسۋگە كىرىستىم. اۋىسىم سايىن ورتالىقتا جاتقان ناۋقاستارعا كومەكتەسەمىن, ولارعا كەلگەن سالەمدەمەلەردى جەتكىزەمىن, جاڭادان تۇسكەن ناۋقاستاردى تىركەيمىن.
ۆولونتەر جىگىت كونستانتين تولىق جابىق كيىم كيىپ جۇمىس ىستەۋدىڭ قيىندىعىن ءوز كوزىمەن كورىپ, ءوز دەنەسىمەن سەزىنىپ, دارىگەرلەر جۇمىسىنىڭ وڭاي ەمەستىگىن تۇسىنگەنىن, ولاردى قولدايتىنىن جەتكىزدى.
– ىستىق كۇندە قورعانىش جابىق كوستيۋمدە جۇمىس ىستەپ جۇرگەندەردى كوردىم. قورعانىش جابىق كيىم دەگەنىڭىز – ءىشى ىستىق, ءتىپتى ەركىن قوزعالۋىڭىزعا كەدەرگى جاسايتىن ارنايى كيىم. ءبىر-ءبىرىمىزدى, دارىگەرلەردى, سانيتارلاردى اجىراتۋ ءۇشىن قورعانىش كيىم سىرتىنا ماركەرمەن قىزمەتىمىزدى, اتى-ءجونىمىزدى جازىپ قويادى. ايتپەسە, ءبارىمىز بىردەيمىز. ءبىر-ءبىرىمىزدى ءسوزسىز-اق ۇعىنىپ, تۇسىنىسەمىز. ال «قىزىل» – جابىق جەردەن, «جاسىل» الاڭعا ءوتۋ ءۇشىن مىندەتتى تۇردە قورعانىش كيىمىن شەشىپ, سۋعا ءتۇسىپ, دۋش قابىلدايسىڭ. «جاسىل» الاڭعا شىققاندا ازداپ دەمالىپ, تاماق ءىشىپ الدەنىپ الاسىڭ. جۇمىسقا قايتا ورالعاندا, ياعني «قىزىل» الاڭعا وتكەندە قايتادان جاڭا قورعانىش كيىمىن كيىپ, بەتپەردە, كوزىلدىرىك تاعامىز. «بايانتاۋ» پروۆيزور ورتالىعىندا ناۋقاستار ءۇشىن بارلىق جاعداي جاسالعان. بارلىق ءدارى-دارمەك قازىر تولىق جەتكىلىكتى, – دەيدى ۆولونتەر.
ءوڭىردىڭ باس ەپيدەميولوگى ساۋلە وسپانوۆانىڭ ايتۋىنشا, گوسپيتالدا بارلىق مەديتسينالىق تالاپتار ساقتالعان. سپورت كەشەنىنە 200 پروۆيزورلىق توسەكتىك ورىن قويىلعان. عيماراتتىڭ اۋماعىندا «جاسىل», «قىزىل» ايماقتار بار. ناۋقاستار «قىزىل» ايماق ارقىلى تازا ايماققا وتەدى. قىزمەتكەرلەر ءۇشىن قوسالقى ەسىكتەر جاسالعان. گوسپيتالعا تۇسكەن ناۋقاستار كۇندەلىكتى ءومىر ءۇشىن قاجەتتى زاتتارمەن قامتاماسىز ەتىلگەن. سونداي-اق call-ورتالىعى جۇمىس ىستەيدى, گوسپيتالدا wi-fi بار. بۇل ارقىلى ناۋقاستار كومپيۋتەرلەردە جۇمىس ىستەۋگە مۇمكىندىك الادى. ترياج-ورتالىقتىڭ ىسكە قوسىلۋى اۋرۋحانالار مەن جەدەل جاردەم قىزمەتىنىڭ جۇكتەمەسىن ازايتۋدا. بۇل جەردە جەدەل شەشىم قابىلدايتىن تاجىريبەلى دارىگەرلەر جۇمىس ىستەيدى. بارلىق مەديتسينا قىزمەتكەرى جەكە قورعانىش قۇرالدارىمەن تولىق قامتاماسىز ەتىلگەن. مەديتسينا قىزمەتكەرلەرىنىڭ دە, ناۋقاستاردىڭ دا ەپيدەميالىق قاۋىپسىزدىگى – اسا ماڭىزدى.
پاۆلودار وبلىسى