نۇر-سۇلتاندا #Birgemiz اكتسياسى اياسىندا جالپىۇلتتىق جوبانىڭ ەرىكتىلەرى قارتتارعا بارىپ, كومەك كورسەتۋدە. بۇل تۋرالى ەلوردا اكىمدىگىنىڭ رەسمي سايتىنا سىلتەمە جاساي وتىرىپ Egemen.kz حابارلايدى.
COVID-19 پاندەمياسىنا بايلانىستى اعا بۋىن وكىلدەرىنە كوروناۆيرۋس جۇقپاسىن بولدىرماۋ ءۇشىن ۇيدە بولۋ ۇسىنىلعانى بەلگىلى.
بۇل جولى ەرىكتىلەر جەكە ۇيدە تۇراتىن زەينەتكەرگە بارىپ, كوكونىس باقشاسىن اشۋعا كومەكتەسىپ, اۋلانى قوقىستان تازارتتى.
"وسى قيىن-قىستاۋ كەزەڭدە, اسىرەسە اعا بۋىن, جالعىزباستى ادامدار كومەك پەن قولداۋدى قاجەت ەتەدى. ولار ءۇشىن كوڭىل ءبولۋ ماڭىزدى, ءبىز بۇل جۇمىستى جالعاستىرامىز. سونىمەن قاتار ءبىز مەديتسينا ماماندارىنا كومەكتەسۋگە تىرىسامىز. بۇعان بىزگە كاسىپكەرلەر جاردەمدەسەدى. جاقىندا ءبىر كاسىپكەر 70 ليتر قىمىز بەردى, ەندى ءبىرى 300 مەديتسينا قىزمەتكەرىن تاماقتاندىرۋعا دايىن", دەيدى #Birgemiz ۇلتتىق جوباسىنىڭ ەرىكتىسى سۇلتان اللابەرگەنوۆ.
باتىرجان – مۇگەدەكتىگى بارىنا قاراماستان ەرىكتىلەر قاتارىنا قوسىلىپ, قالا تۇرعىندارىنا كومەك كورسەتىپ جۇرگەندەردىڭ ءبىرى.
"مەن كوروناۆيرۋسپەن كۇرەسۋگە ءوز ەركىممەن قوسىلدىم. جەرلەستەرىمنەن كارانتين تالاپتارىن قاتاڭ ساقتاۋدى سۇرايمىن: ماسكا تاعۋ, انتيسەپتيك قولدانۋ, الەۋمەتتىك قاشىقتىق ساقتاۋ كەرەگىن ەسكەرتەمىن", دەيدى ول.
سونىمەن قاتار ەرىكتىلەر ەلوردالىق كاسىپكەرلەرمەن بىرگە 100 دارىگەرگە تەگىن قىمىز تاراتۋدى ۇيىمداستىردى. قىمىز ءشول باسىپ, دەنەنى قۋاتتاندىرادى. حالىقتىق مەديتسينادا ول اۆيتامينوز ءۇشىن قولدانىلادى. سۋسىننىڭ قۇرامىندا ۆ دارۋمەنى, اسكوربين قىشقىلى جانە امين قىشقىلدارى بار. بارلىق بەرىلگەن قىمىز زەرتحانالىق تەكسەرۋدەن ءوتتى.
سونىمەن بىرگە, قازاقستاننىڭ استاناسىندا كارانتين ءتارتىبىن ساقتاۋ بويىنشا رەيدتەر جالعاسۋدا. وعان پوليتسيا قىزمەتكەرلەرىمەن بىرگە ەرىكتىلەر دە قاتىسادى. سوڭعى رەيد بارىسىندا 15 زاڭ بۇزۋشىلىق انىقتالدى.