قۇرلىقتىق حوككەي ليگاسىندا (قحل) ونەر كورسەتەتىن ەلوردانىڭ «بارىس» كلۋبى ەلدەگى ەپيدەميالىق احۋالعا بايلانىستى تۇراقتى بىرىنشىلىك الدىنداعى وقۋ-جاتتىعۋ جيىنىن كەيىنگە شەگەرۋگە ءماجبۇر. سونىمەن قاتار تامىز ايىنا جوسپارلانعان ءداستۇرلى پرەزيدەنت كۋبوگى وتپەيتىن بولدى.
جۋىردا قازاقستاندىق باق ەلدەگى جاعدايعا بايلانىستى «بارىس» تۇراقتى بىرىنشىلىكتىڭ بيىلعى ماۋسىمىنا قاتىسا الماي قالۋى ابدەن مۇمكىن ەكەنىن حابارلاعان. دەسە دە قحل پرەزيدەنتى الەكسەي موروزوۆ ەلوردا كومانداسى تۋرنيرگە قاتىسۋعا نيەتتى ەكەنىن جەتكىزدى. ال كلۋب ءباسپاسوز قىزمەتى ەلدەگى قاتاڭداتىلعان كارانتين شاراسى 2 تامىزعا دەيىن سوزىلعان سوڭ «بارىس» ماۋسىم الدىنداعى جاتتىعۋ جيىنىن 3 تامىزعا اۋىستىرعانىن حابارلادى. دەمەك كوماندا جاتتىعۋ جيىنىن وتكىزۋدى جوسپارلاپ وتىرسا, قحل-دىڭ بيىلعى ماۋسىمىنا قاتىسادى دەگەن ءسوز. قازىر يۋري ميحايليس باسشىلىعىنداعى كوماندا ماۋسىم الدىنداعى دايىندىعىن قالاي وتكىزەمىز دەپ باس قاتىرىپ جاتقاندا, كلۋبتىڭ جازعى ترانسفەرىنە شولۋ جاساپ كورەيىك.
بيىلعى بىرىنشىلىك پاندەمياعا بايلانىستى مەجەلەگەن ۋاقىتىنان بۇرىن اياقتالعاننان كەيىن, «بارىس» ساپىنان كوماندانى ورگە سۇيرەگەن بىرنەشە ويىنشى كوماندادان كەتتى. اتاپ ايتقاندا, باس باپكەر اندرەي سكابەلكادان باستاپ, قاقپاشى ەددي پاسكۋالە, تاسقامال قورعاۋشى اتتە وحتاماا, وتكەن ماۋسىمدا «بارىستىڭ» ەڭ ۇزدىك شابۋىلشىسى اتانعان كوربەن نايت پەن تاعى ءبىر تاجىريبەلى شابۋىلشى يرو پاكارينەن الداعى ماۋسىمدا قحل-دىڭ وزگە كوماندالارىندا ونەر كورسەتەتىن بولدى.
سونداي-اق قازاقستاندىق كوماندانىڭ ساپىنان كەتكەندەر اراسىندا ءوز جەرلەستەرىمىز ماديار ىبىرايبەكوۆ, دامير رىسباەۆ, ماكسيم سەمەنوۆ, تالعات جايلاۋوۆ جانە كانادالىق داستين بويد سىندى ويىنشىلار بار. وتانداستارىمىزدىڭ اراسىنداعى ەڭ تاجىريبەلىسى ماكسيم سەمەنوۆ پەن تالعات جايلاۋوۆ ەكەنى داۋسىز.
قحل-دىڭ جاڭا ماۋسىمى باستالۋىنا شامامەن ءبىر جارىم ايعا جۋىق ۋاقىت قالدى. ال «بارىس» ءالى ترانسفەر بازارىندا بەلسەندى ەمەس. دەگەنمەن جوعارىدا كلۋبتان كەتكەن ويىنشىلاردىڭ ورنىن باسادى دەگەن ۇمىتپەن شەتتەن ءۇش حوككەيشى كەلىسىمشارتقا وتىردى. ماسەلەن, وتكەن ايدا كلۋب قۇرامى فينليانديالىق قاقپاشى يوني ورتيو جانە شۆەتسيالىق شابۋىلشى ياكوب ليليامەن تولىقتى. سونىمەن قاتار كانادالىق شابۋىلشى مەتت فرەتتين دە كارەراسىن نۇر-سۇلتاننىڭ «بارىسىندا» جالعاستىراتىن بولدى.
ەندى وسى ءۇش حوككەيشىنىڭ وتكەن ماۋسىمدارداعى ستاتيستيكاسىنا زەر سالىپ كورەيىك. 26 جاستاعى ياكوب ليليا بىلتىرعى ماۋسىمدا ۇلتتىق حوككەي ليگاسىنىڭ «كولامبۋس» كلۋبىندا 37 ماتچ وتكىزىپ, نەبارى 5 ۇپاي جيناعان. قاقپاشى يوني ورتيو شۆەيتساريانىڭ «تسيۋريح» كلۋبىنىڭ قاقپاسىن 29 ماتچتا قورعاپ, ورتا ەسەپپەن ءار ويىندا 2 شايبا وتكىزىپ العان. سونداي-اق 91,7% قاقپاعا باعىتتالعان سوققىنى قايتارا بىلگەن. ال مەتت فرەتتين بىلتىرعى ماۋسىمدى «اق بارستىڭ» ساپىندا وتكىزىپ, 60 كەزدەسۋدەن كەيىن 33 (11 گول+22 پاس) ۇپاي جيناعان.
مىنە, «بارىستىڭ» بىلتىر كوماندانى جوعارى ورىنعا سۇيرەگەن حوككەيشىلەردىڭ ورنىن باسادى دەگەن ويىنشىلارىنىڭ ناتيجەسى. كوماندا ءۇشىن قانشالىقتى ءتيىمدى ترانسفەر بولعانىن الداعى ماۋسىمنىڭ ەنشىسىنە قالدىردىق. ەندى ءبىر جارىم ايدىڭ ىشىندە «بارىس» جاڭا ويىنشى الادى دەگەنگە سەنۋ قيىن. ويتكەنى پاندەمياعا بايلانىستى كلۋبتىڭ قارجىلىق جاعدايى وتكەن جىلمەن سالىستىرعاندا اسا ءماز ەمەس. ونىڭ ۇستىنە كلۋب تىزگىنىن قولىنا العان باس جاتتىقتىرۋشى يۋري ميحايليس ءوزىنىڭ ءبىر سۇحباتىندا جاستارعا سەنىم ارتاتىنىن ايتقان ەدى. بالكىم, الداعى ۋاقىتتا «بارىستىڭ» جاستار كومانداسى سانالاتىن «نوماد» جانە «سنەجنىە بارسى» قۇرامىندا ونەر كورسەتكەن جاس حوككەيشىلەر قحل-دا باق سىناۋى دا عاجاپ ەمەس.
ايتپاقشى وسىدان بىرەر كۇن بۇرىن «بارىستىڭ» باس مەنەدجەرى ۆياچەسلاۆ بەلان AllHockey.ru باسىلىمىنا سۇحبات بەرىپ, كلۋبتىڭ العا قويعان ماقساتى ءاردايىم جوعارى ورىننان كورىنۋ كەرەك ەكەنىن ايتىپتى. «كلۋبتىڭ باستى ماقساتى – گاگارين كۋبوگىنىڭ پلەي-وفف كەزەڭىنە دەيىن جەتۋ. مۇمكىندىگىنشە بىلتىرعى جەتىستىگىمىزدەن جوعارى ناتيجە كورسەتۋ», دەپتى ول.