قىزىلقوعا اۋدانىندا وتكەن ەكى ماۋلىكتە 11 530 گەكتار اۋماقتىڭ قۇرعاق ءشوبى ورتەنىپ كەتتى. بۇل تۋرالى وبلىستىق توتەنشە جاعدايلار دەپارتامەنتى ءمالىم ەتتى, دەپ حابارلايدى Egemen.kz.
ءباسپاسوز قىزمەتىنىڭ اقپاراتىنا قاراعاندا, 12 شىلدەدە ساعات 12:25-تە ساعىز اۋىلدىق وكرۋگىنەن 70 شاقىرىم قاشىقتاعى تاسقۇدىق ەلدى مەكەنىنىڭ اۋماعىندا قۇرعاق ءشوپ ورتكە شارپىلدى. دالا ءورتى ساعات تۇنگى 23:25-تە اۋىزدىقتالىپ, 13 شىلدەدە ساعات 00:30-دا تولىقتاي ءسوندىرىلىپتى. وعان مۇقىر اۋىلدىق وكرۋگىنىڭ 15 تۇرعىنى مەن 1 تەحنيكا, كەنباي كەن ورنىنان 5 ادام مەن 1 تەحنيكا تارتىلدى. ءورتتىڭ تۇتانۋىنا نايزاعايدىڭ جارقىلى سەبەپ بولعان.ورتەنگەن جەردىڭ اۋماعى – 880 گەكتار.
"سول كۇنى, 12 شىلدەدە ساعات 12:30-دا اتالعان اۋدان اۋماعىنداعى تاسشاعىل اۋىلدىق وكرۋگىنەن 36 شاقىرىمداعى اپانتاي, جاپالاق-1, جاپالاق-2, قوسوبا, ءاجىباي, قاراعاي, ۇشاق ۇشى, ايعىرشاعىل, جۋالى, قوسبيەك, ءشارىپ, ءامىر, بايقوڭىر ۋچاسكەلەرىندە 10 000 گەكتار اۋماقتا دالالىق قۇرعاق ءشوپ ورتەندى. بۇل ۋچاسكەلەردەگى ءورت 13 شىلدەدە 03:30-دا اۋىزدىقتالىپ, تاڭعى ساعات 04:20-دا تولىعىمەن ءسوندىرىلدى. مۇندا دا دالا ءورتى نايزاعايدىڭ جارقىلىنان تۇتانعان. ءورتتى سوندىرۋگە توتەنشە جاعدايلار دەپارتامەنتىنىڭ 7 قىزمەتكەرى مەن 1 تەحنيكاسى, تاسشاعىل, كوزدىقارا, ميالى اۋىلدارىنان 26 ادام مەن 9 تەحنيكا جۇمىلدىرىلدى" -دەپ حابارلادى دەپارتامەنتتىڭ ءباسپاسوز قىزمەتىنەن.
سونىمەن بىرگە, 13 شىلدەدە تاسشاعىل اۋىلدىق وكرۋگىنەن 15 شاقىرىم جەردە دالا ءورتى تىركەلىپ, قاراعاي, قاراقۇدىق, بايبەك, ءاجىباي ۋچاسكەلەرىندە 650 گەكتار اۋماقتىڭ قۇرعاق ءشوبى جانىپ كەتتى. بۇل ۋچاسكەلەردەگى جالىندى اۋىزدىقتاۋعا 10 تەحنيكامەن جۇمىلعان ەرىكتى ءورت ءسوندىرۋ جاساقتارىنىڭ 80 ادام ءورتتى ساعات 23:20-دا تولىقتاي ءسوندىردى.