ەلىمىزدە اعىمداعى جىلدىڭ 1 مامىرىنان باستاپ ازاماتتىق اۆياتسيا سالاسى ءوز قىزمەتىن كەزەڭ-كەزەڭىمەن جانداندىرىپ كەلەدى, دەپ حابارلايدى Egemen.kz.
قر پرەزيدەنتى جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيا مەن كوروناۆيرۋستىڭ تارالۋىنا جول بەرمەۋ جونىندەگى ۆەدومستۆوارالىق كوميسسيا شەشىمدەرى نەگىزىندە بيىلعى 1 ساۋىرىنەن 1 مامىرىنا دەيىن بارلىق تۇراقتى ىشكى اۋە رەيستەرىن, اتاپ ايتقاندا 45 باعىت بويىنشا اپتا سايىن اتقارىلاتىن 540 رەيس توقتاتىلدى.
سونداي-اق, 2020 جىلعى 3 اقپانىنان باستاپ 97 باعىت بويىنشا اپتاسىنا 440 حالىقارالىق اۋە رەيسى نەمەسە بارلىق حالىقارالىق ۇشۋلاردىڭ 99% قىسقارتىلدى.
قالىپتاسقان جاعداي جولاۋشىلار اعىنى كورسەتكىشىنە تىكەلەي اسەر ەتتى. وتاندىق اۋە كومپانيالارى تاسىمالداعان جولاۋشىلار سانى بيىلعى قاڭتار-ماۋسىم ايلارىندا 2,1 ملن. ادام بولدى. بۇل 2019 جىلعى سايكەس كەزەڭىمەن سالىستىرعاندا 43% تومەن (3,7 ملن. ادام).
بۇگىنگى تاڭدا ىشكى رەيستەر بويىنشا اپتاسىنا 45 باعىتتا 497 رەيس قايتا جاڭعىرتىلدى. جالپى 1 مامىردان باستاپ 400 مىڭنان استام جولاۋشى تاسىمالداندى.
ۆەدومستۆوارالىق كوميسسيانىڭ 2020 جىلعى 11 ماۋسىمداعى شەشىمىنە سايكەس مينيسترلىك تۇركيامەن (ا.ج. 20 ماۋسىمدا) جانە وڭتۇستىك كورەيامەن (ا.ج. 22 ماۋسىمدا) حالىقارالىق اۋە رەيستەرىن قايتا باستاۋ ماسەلەسىن پىسىقتادى. سونداي-اق, اعىمداعى جىلدىڭ 1 تامىزىنان باستاپ تايلاند پەن گرۋزياعا رەيستەردى قايتا اشۋ جوسپارلانىپ وتىر.
ۇشۋلار كولىكتەگى باس سانيتارلىق دارىگەردىڭ قاۋلىسىنا سايكەس سانيتارلىق قاۋىپسىزدىكتىڭ جوعارى شارالارى جاعدايىندا ورىندالادى.
تۇركيا دەنساۋلىق ساقتاۋ مينيسترلىگى قابىلداعان كوروناۆيرۋستىق ينفەكتسيانىڭ تارالۋىنا قارسى ءىس-قيمىل جونىندەگى شارالارى شەڭبەرىندە 2020 جىلعى 4 شىلدەدەن باستاپ ەل اۋماعىنا قازاقستاننان رەيستەردىڭ كىرۋىن شەكتەۋ تۋرالى شەشىم قابىلدادى. تەك تۇركيا ازاماتتارى مەن جۇمىسقا جانە تۇركيادا تۇرۋعا رۇقساتى بار جولاۋشىلارعا كىرۋگە بولادى. تۇركيا جاعى ەپيدەميولوگيالىق جاعداي جاقسارعان كەزدە بۇل شەكتەۋ الىنىپ تاستالاتىنىن حابارلادى.
قر باس مەملەكەتتىك سانيتارلىق دارىگەرىنىڭ 2020 جىلعى 24 ماۋسىمداعى قاۋلىسىنا سايكەس ۆەنگريا, ءۇندىستان, گەرمانيا, چەحيا, مالايزيا, ەگيپەت, ۋكراينا, پولشا, وزبەكستان, قىرعىزستان, تاجىكستان ەلدەرىنە تۇراقتى رەيستەردى ورىنداۋعا رۇقسات ەتىلەدى. وسىعان بايلانىستى, مينيسترلىك قر سىرتقى ىستەر مينيسترلىگىمەن بىرلەسىپ سانيتارلىق-ەپيدەميولوگيالىق تالاپتارعا سايكەس اتالعان ەلدەرمەن رەيستەردى قايتا اشۋ ماسەلەسىن پىسىقتاۋدا.
اۋە كولىگى ينفراقۇرىلىمىن دامىتۋ باعىتىندا بيىل تۇركىستان قالاسىندا جاڭا حالىقارالىق اۋەجايدى ىسكە قوسۋ جوسپارلانىپ وتىر. بۇگىنگى تاڭدا وسكەمەن قالاسى اۋەجايىنىڭ ۇشۋ-قونۋ جولاعىن جاڭارتۋ جۇمىستارى باستالدى. سونداي-اق, شىمكەنت قالاسىنداعى اۋەجايدىڭ جاڭا تەرمينالىنىڭ قۇرىلىسى جانە ورال قالاسى اۋەجايىنىڭ اەروۆوكزالى كەشەنىن جاڭارتۋ جۇمىستارى جالعاسادى.
ىشكى ءتۋريزمدى دامىتۋ شەڭبەرىندە قارجىلاندىرۋ بولىنگەن جاعدايدا ءۇرجار جانە ءۇشارال قالالارىنداعى اۋەجايدىڭ تاعى ەكى ءۇشۋ-قونۋ جولاعى جاڭارتىلادى.