وتكەن جارتى جىل ىشىندە بايلانىس وپەراتورلارى شالعاي اۋىلدارعا تالشىقتى-وپتيكالىق بايلانىس جەلىلەرىن جۇرگىزىپ, 649 اۋىلدى كەڭ جولاقتى ينتەرنەتكە قوستى, دەپ حابارلايدى Egemen.kz تسيفرلىق دامۋ مينيسترلىگىنىڭ ءباسپاسوز قىزمەتىنە سىلتەمە جاساپ.
ىسكە اسىرىلىپ جاتقان جوبا شەڭبەرىندە 2020 جىلدىڭ سوڭىنا دەيىن بايلانىس وپەراتورلارى 1250-دەن استام اۋىلدى ساپالى ينتەرنەتپەن قامتاماسىز ەتەدى. ول ءۇشىن 20 مىڭ شاقىرىم تالشىقتى-وپتيكالىق بايلانىس جەلىسى سالىنۋدا. مەملەكەتتىك-جەكە مەنشىك ارىپتەستىك اياسىندا جۇزەگە اسىرىلىپ جاتقان جوبا 2018 جىلى باستالدى. ونىڭ باستى ماقساتى - 3700-دەن استام مەملەكەتتىك ورگاندار مەن بيۋدجەتتىك ۇيىمداردى, ونىڭ ىشىندە مەكتەپ, اۋرۋحانا, اكىمدىك جانە ت.ب. كەڭجولاقتى ينتەرنەتكە قوسۋ. سونىمەن قاتار, جوبا جۇزەگە اسىرىلا باستاعالى بەرى شالعايداعى 962 اۋىل جىلدامدىعى جوعارى ينتەرنەتپەن قامتىلعان.
قر تسيفرلىق دامۋ مينيسترلىگى تەلەكوممۋنيكاتسيا كوميتەتىنىڭ توراعاسى ۆيتالي ياروشەنكونىڭ ايتۋىنشا, بۇل جوبا باسقا دا جوبالاردى جۇزەگە اسىرۋعا مۇمكىندىك تۋعىزباق.
"شالعايداعى اۋىلدارعا جىلدامدىعى جوعارى ينتەرنەتتى تارتۋ ءۇشىن ينفراقۇرىلىم قاجەت. قازىر بايلانىس وپەراتورلارى ءتيىستى ينفراقۇرىلىم - «وپتيكا» جەلىسىن جۇرگىزۋدە.ءبۇلموبيلدى وپەراتورلاردىڭ وسى "وپتوتالشىقتى" جەلىگە قوسىلۋىنا جانە ساپالى ينتەرنەتپەن قامتۋىنا جاعداي جاسايدى. وسىلايشا, 3G/4G ءموبيلدى تەحنولوگياسى نەمەسە سىمسىز بايلانىسۋ تەحنولوگياسى بويىنشا ءبىر اۋىل عانا ەمەس, جاقىن ماڭداعى اۋىلداردا دا كەڭجولاقتى ينتەرنەتكە قوسىلاتىن بولادى", - دەپ اتاپ وتتى ياروشەنكو.
ەلىمىزدە ينتەرنەت جەلىسىن ودان ءارى دامىتۋعا باعىتتالعان تاعى ءبىر جوبانىڭ جۇرگىزىلىپ جاتقانىن ەستەرىڭىزگە سالىپ وتەمىز. ونىڭ اياسىندا, 2020 جىلدىڭ سوڭىنا دەيىن ۇيالى بايلانىس وپەراتورلارى 3G/4G ءموبيلدى جانە FWA - FixedWireless Access سىمسىز بايلانىسۋ تەحنولوگيالارىن قولدانا وتىرىپ, تۇرعىن سانى 250-دەن كوپ اۋىلداردىڭ ءبارىن كەڭجولاقتى ينتەرنەتكە قوسادى. مينيسترلىك ۇيالى بايلانىس وپەراتورلارىمەن بىرگە ىنتىماقتاستىق تۋرالى ءتيىستى مەموراندۋمعا قول قويدى.
وسىلايشا, وسى جىلدىڭ سوڭىنا قاراي ەل حالقىنىڭ 99,3% كەڭ جولاقتى ينتەرنەتتى پايدالاناتىن بولادى.