اقتوبە وبلىسىندا قاتاڭ شەكتەۋ جانە كارانتيندىك شارالار ەنگىزىلدى. قاۋلىعا وبلىستىڭ باس مەملەكەتتىك سانيتارلىق دارىگەرى نۇرسۇلۋ بەركىمباەۆا قول قويدى. مۇنداي قۇجات بيىل كوكتەمنىڭ العاشقى ايىندا دا قابىلدانعانى بەلگىلى. دەگەنمەن كۆي-ءدىڭ تارالۋىن بولدىرماۋ جونىندەگى العاشقى قاۋلىمەن سالىستىرا قاراعاندا سوڭعىسىنىڭ سالماعى اجەپتاۋىر اۋىر, جاۋاپكەرشىلىگى بارىنشا جوعارى.
ويتكەنى سوڭعى ۋاقىتتا اۋىلداعى اعايىندار اراسىندا دا كۆي مەن ۆيرۋستىق پنەۆمونيا دەرەگى ءورشىپ بارادى. ىرعىز جانە ويىل سەكىلدى شالعايداعى اۋدانداردا اتالعان جۇقپالى دەرتتى جۇقتىرعان تۇرعىندار سانى كوبەيدى. اۋىلداعى اۋرۋحانالار جانىنان قوسىمشا ينفەكتسيالىق بولىمشەلەر اشىلىپ, پروۆيزورلىق ستاتسيونارداعى كەرەۋەتتەر سانى كەڭەيتىلۋدە. ەمحانالار جانىنان كۇندىزگى ەم جۇرگىزەتىن ورىندار اشىلدى. ارنايى سەنىم تەلەفوندارى مەن ونلاين كەڭەستەر دە اۋىل تۇرعىندارىنىڭ اقپاراتتىق سۇرانىسىن وتەۋگە قىزمەت ەتەدى. بۇل جونىندە ويىل اۋداندىق اۋرۋحاناسىنىڭ باس دارىگەرى ساندىبەك نۇرباەۆ ايتىپ بەردى.
بۇگىندە وبلىس اۋماعىندا پۋلمونولوگ ماماندارعا سۇرانىس كۇرت ارتتى. سوندىقتان مامان تاپشىلىعىن رەتتەۋدىڭ ءبىر جولى رەتىندە نەفرولوگ, تەراپەۆت جانە حيرۋرگتەردى ارنايى حاتتاما بويىنشا وكپەگە ەم جۇرگىزۋگە رۇقسات پەن قۇقىق بەرۋ شارالارى قولعا الىنعان. سونداي-اق اۋدانداردا ءدارى-دارمەكتەر تاپشىلىعى دا بايقالادى. بۇل ماسەلەنى شۇعىل شەشۋ جونىندە شارالار بەكىتىلگەن.
العاشقى كارانتين كەزىندە اقتوبە وبلىسىندا ەپيدەميالىق جاعداي تۇراقتى بولعانى ءمالىم. ءتىپتى ءبىر دە ءبىر كۆي جۇقتىرعان تۇرعىن تىركەلمەگەن كۇندەر دە كەزدەستى. وسىعان قاراپ ىندەت شارىقتاۋ شاعىنا جەتتى دەپ وي قورىتۋدىڭ دا ءجونى بار ەدى. ايتسە دە ەلىمىزدەگى ەكى ايعا سوزىلعان توتەنشە جاعداي رەجىمىنەن كەيىن بلوك-بەكەتتەر الىنىپ, اۋىلدار مەن وبلىس ورتالىقتارى اراسىنداعى قارىم-قاتىناس قالپىنا كەلگەن كەزدە شالعاي ەلدى مەكەندەردە ىندەتكە شالدىعۋشىلار كەزدەسە باستادى. سەبەبى اعايىننىڭ دۇعا, قۇران باعىشتاۋ داستارقاندارى مەن وزگە دە وتباسىلىق شارالارعا بىردەن باس قويۋى, اۋىل مەن قالا تۇرعىندارىنىڭ ارالاسىپ كەتۋى, سيمتومپسىز ازاماتتار ىندەتتىڭ تارالۋىنا تۇرتكى بولدى.
توتەنشە جاعداي مەن قاتاڭ كارانتيندىك رەجىمدى ارىگە سوزا ءتۇسۋ كەرەك ەدى دەۋشىلەر دە بار. بۇل تۇجىرىمدار ءبىر قاراعاندا قيسىندى سەكىلدى كورىنگەنىمەن سانيتارلىق نورمالار مەن قاۋىپسىزدىك تالاپتارى ورىندالماعان جاعدايدا مەملەكەت تاراپىنان بەلگىلەنگەن كەز كەلگەن قاتاڭ شارانىڭ ءوزى ىندەتتى اۋىزدىقتاۋعا كومەكتەسە المايتىنىن ۇعىنا الساق كەرەك-ءتى.
اقتوبە وبلىسىندا 2020 جىلدىڭ شىلدە ايىنىڭ ءتورتىنشى جۇلدىزى كۇنى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باسقارۋ دەپارتامەنتى مەن وبلىستىڭ باس سانيتار دارىگەرى قابىلداعان قاۋلى تارماقتارى بۇعان دەيىنگى قاۋلىمەن سالىستىرعاندا ەداۋىر كەڭەيتىلگەنىن ايتۋ شارت. مۇندا شەكتەۋ شارالارى جونىندەگى تارماقتار مەن جولدار دا قىزمەت كورسەتۋ نىساندارىن بارىنشا كەڭ قامتىدى. بۇل قابىرعالى قۇجات تالاپتارى قاعاز جۇزىندە نەمەسە ەلەكتروندى ءماتىن تۇرىندە قالىپ قويماي, تولىقتاي ورىندالسا ەپيدەميانى اۋىزدىقتاۋعا وڭ سەپتىگىن تيگىزەتىنى انىق. قاۋلى تەك ورىندالۋمەن عانا قۇندى.
اقتوبە