پولشانىڭ كەلەسى پرەزيدەنتى كىم بولادى؟

قازىرگە دەيىن دۋدا – 43,7 پا­يىز, تشاسكوۆسكي 30,3 پايىز داۋىس جيناعان. ايتا كەتۋ كە­رەك, پولشا ورتالىق سايلاۋ كوميس­سياسى بيۋللەتەندەردىڭ 99,78 پا­يىزىن ساناپ شىقتى. سايلاۋ­دىڭ ناتيجەسى الداعى ۋاقىتتا ناقتى بەلگىلى بولادى. الايدا قازىردىڭ وزىندە پرەزي­دەنت­تى انىقتاۋ ەكىنشى كەزەڭگە قال­دىرىلعانى ايتپاسا دا تۇسىنىكتى.

مەملەكەت باسشىسى قىز­مە­تىنەن 11 كانديدات ۇمىتكەر بول­دى. ەلدە 27 مىڭنان استام ساي­لاۋ ۋچاسكەسى جۇمىس ىستەدى. پرە­زي­دەنت سايلاۋىنىڭ ءبىرىنشى تۋرى ما­مىر ايىندا ءوتۋى ءتيىس ەدى. بىراق كو­روناۆيرۋس پاندەمياسىنا باي­لانىستى سايلاۋ كەيىنگە شەگەرىلدى.

Exit poll جۇرگىزگەن ساۋال­نا­ماعا سۇيەنسەك, اندجەي دۋ­دانى قولدايتىندار سانى 42  پا­يىز­دى قۇراعان. ال ونىڭ باستى قار­سىلاسى – ۆارشاۆانىڭ مەرى رافال تشاسكوۆسكيگە حالىقتىڭ 30 پايىزى داۋىس بەرگەنىن ايتقان. ءۇشىنشى ورىن تاۋەلسىز ۇمىتكەر شيمون حولوۆنياعا بۇيىردى. ول 14 پايىز داۋىس جيناعان.

ا.دۋدا exit-poll-دىڭ ناتيجەسى شىققاننان كەيىن حالىققا جولداۋ جاساپ, قولدايتىندار سانى ارت­قا­نىن مالىمدەدى. وسىدان بەس جىل بۇرىن ءبىرىنشى كەزەڭدە دا­ۋىس بەرگەندەر سانى قازىرگىدەن ال­دەقايدا از بولاتىن. «بەس جىل بويى ساياساتتا ءجۇرىپ, كوپتەگەن سىنعا قالىپ, شابۋىل جاسالىپ, قيىن شەشىم قابىلدادىم. سونىڭ ارقاسىندا وسى ناتيجەگە قول جەتكىزىپ وتىرمىن», دەدى ول.

ال تشاسكوۆسكي ءوز سوزىندە باسقا ۇمىتكەرلەرگە داۋىس بەرگەن تۇر­عىنداردى ءوزىن قولداۋعا شاقى­رىپ, دۋداعا قارسى شىعۋعا ۇگىت­تەدى. «بۇل ناتيجە ماڭىزدى ما­سە­لەنى كورسەتتى. قوعامنىڭ 58 پايىزدان استامى وزگەرىستى قا­لايدى. سول ازاماتتارعا سىزدەردىڭ ۇمىتكەرلەرىڭىز ەكەنىمدى, وزگەرىستىڭ ۇمىتكەرى ەكەنىمدى ايتقىم كەلەدى», دەپ مالىمدەدى.

«بۇل ءان بۇرىنعى اننەن وز­گەرەك» دەمەكشى, بۇل جولعى سايلاۋدىڭ وزگەشەلىگى كوپ بولىپ تۇر. ماسەلەن, 2015 جىلعى داۋىس بەرۋ كەزىندە ەلەكتوراتتىڭ 49 پايىزى عانا قاتىسقان. بيىل بۇل كورسەتكىش 63 پايىزدى قۇرادى.

ەكىنشى كەزەڭنىڭ باستى ءفاۆو­ريتى – اندجەي دۋدا ەكەنىنە قاراماستان, تشاسكوۆسكيدىڭ دە مۇمكىندىگى مول. بىرىنشىدەن, قازىرگى پرەزيدەنتتى قولدايتىنداردىڭ باسىم بولىگى ورتا جاستان اسقاندار. ونىڭ ۇستىنە, تاياۋدا دۋدا مىرزا گەيلەرگە قاتىستى پىكىر ءبىلدىرىپ, ەلدەگى قۇقىق قورعاۋشىلار مەن شەتەلدىكتەردىڭ سىنىنا قالعان ەدى. ەندى وعان پولشادا قىرىن قارايتىندار تابىلۋى مۇمكىن.

ەكىنشىدەن, Ipsos كومپا­نياسى جۇرگىزگەن exit-poll-دىڭ ناتيجەسىنە سۇيەنسەك, تشاسكوۆس­كيدى كوبىنە جاستار جاعى قول­دايدى. ال دۋداعا داۋىس بەرگەن 18-29 جاس ارالىعىنداعىلار نە­بارى 19 پايىز عانا. ياعني, ەكىنشى كەزەڭدە باسقا ۇمىتكەرلەردى قول­داعان جاستاردىڭ تشاسكوۆسكيدىڭ جاق­تاسىنا اينالۋى ابدەن ىق­تيمال.

ۇشىنشىدەن, بيىلعى سايلاۋ ناۋقانى كەزىندە ۇمىتكەرلەر ءتۇر­لى ءتاسىلدى قولداندى. اسىرەسە حا­لىق­­ارالىق جوبالاردى دا پاي­دالا­نۋدى كوزدەگەن-ءدى. ماسەلەن, پرە­زي­دەنتتىكتەن ۇمىتكەرلەر ەندى ۆيس­لين مۇيىسىنە كانال قازۋ جوباسىن ساياسي ناۋقاننىڭ ءبىر بولىگىنە اينالدىردى.

ەستەرىڭىزدە بولسا, پولشا­داعى ۆيسلين مۇيىسىنە كانال سا­لۋ تۋرالى اڭگىمە قوزعالىپ, شە­شىم قابىلدانعان-دى. قۇرىلىس اياق­تالعاندا 100 شاقىرىمعا دەيىنگى سۋ جولى قىسقارتىلىپ, بالتىق تەڭىزىنە تىكەلەي شىعۋعا مۇمكىندىك جاسالماق. جوبا تۋرالى تالايدان بەرى ايتىلىپ كەلە جاتقانىمەن, ونىڭ قۇرىلىسى 2019 جىلى باس­تالعان-دى. پولشا پرە­زيدەنتى اندجەي دۋدانىڭ اي­تۋىنشا, كانال سالۋ ارقىلى پول­شا رە­سەي­دىڭ ىقپالىنان قۇتىلىپ, تاۋەل­سىزدىگىن نىعايتا تۇسپەك. ەل پرەزي­دەنتىنىڭ پايىمداۋىنشا, مۇنداي جوبالار قوسىمشا جۇمىس ورنىن اشادى.

پولشادا بۇل جوباعا قار­سى­لار جەتەرلىك. اسىرەسە ەلدەگى وپ­پو­زي­تسيا وكىلدەرى جوبانىڭ ءوزىن اق­تا­­مايتىنىن العا تارتادى. «ازا­مات­تىق الاڭ» وپپوزيتسيالىق بلوك تا­را­پىنان سايلاۋعا ءتۇسىپ جاتقان را­فال تشاسكوۆسكي جەڭىسكە جەت­سە, قۇ­رىلىستى توقتاتۋعا ۋادە بەردى.

ءبىر قىزىعى, ەكىنشى كەزەڭنىڭ ناتيجەسى ءبىرىنشى تۋردا ءۇشىنشى ورىن العان شيمون حولوۆنياعا بايلانىستى بولماق. ونىڭ 14 پا­يىز داۋىس جيناعانىن جوعارىدا ايتتىق. Gazeta Wyborcza باسى­لى­مىنىڭ حابارلاۋىنشا, ش.حو­لوۆنيا الداعى ۋاقىتتا ەكى ۇمىت­كەرگە قاتىستى ۇستانىمىن مالىم­دەمەك. ياعني, شيموننىڭ جاقتاس­تارى ەكىنشى كەزەڭدە كىمگە داۋىس بەرەتىنى ونىڭ ءبىر اۋىز سوزىنە بايلانىپ تۇر.