پارلامەنت ءماجىلىسىنىڭ جالپى وتىرىسىندا دەپۋتاتتار بىرنەشە قۇجاتتى جۇمىسقا الىپ, بىرقاتار زاڭ جوباسى ماقۇلدادى.
جالپى وتىرىس بارىسىندا پالاتا بىرقاتار راتيفيكاتسيالاناتىن زاڭ جوبالارىن جۇمىسقا الدى. ەڭ الدىمەن دەپۋتاتتار 3 زاڭ جوباسى بويىنشا قورىتىندى ازىرلەۋدى ماقۇلدادى. اتاپ ايتار بولساق, ەركىن ساۋدا ايماعىن قۇرۋ تۋرالى كەلىسىمگە قاتىسۋشى مەملەكەتتەردىڭ اراسىندا تاسىمالداناتىن تاۋارلاردى كەدەندىك رەسىمدەۋدىڭ جانە كەدەندىك باقىلاۋدىڭ تارتىبىنە, قازاقستان مەن گرۋزيا ۇكىمەتتەرى اراسىنداعى حالىقارالىق اۆتوموبيل قاتىناسى تۋرالى كەلىسىمگە, حالىقارالىق قارجى كورپوراتسياسىنىڭ قازاقستاندا وفيستەر قۇرۋ جانە ولاردىڭ قىزمەتى تۋرالى كەلىسىمدى راتيفيكاتسيالاۋعا قاتىستى قۇجاتتار بويىنشا قورىتىندى ازىرلەنەتىن بولدى.
ودان ءارى ۇلتتىق ەكونوميكا ءمينيسترى رۋسلان دالەنوۆ دەپۋتاتتارعا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە ينۆەستيتسيالىق احۋالدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ۇسىندى. قۇجات سالىق سالۋدىڭ وزەكتى مىندەتتەرىن شەشۋ ماقساتىندا ازىرلەندى.
ءمينيستردىڭ ايتۋىنشا, زاڭ جوباسى جەكە تۇلعالارعا سالىق سالۋدى جەڭىلدەتۋ, ينۆەستيتسيالاردى ىنتالاندىرۋ, سالىقتىق اكىمشىلەندىرۋ باعىتتارىن قامتيدى.
بايانداما بارىسىندا سالىق تولەۋشىلەرگە قولايلى بولۋ ماقساتىندا كولىك سالىعىن تولەۋ مەرزىمىن وسى جىلدىڭ 31 جەلتوقسانىنان كەلەسى جىلدىڭ 1 ساۋىرىنە اۋىستىرۋ ۇسىنىلدى. سونىمەن قاتار ينۆەستيتسيالىق سالىقتىق كرەديتتى ەنگىزۋ ۇسىنىلدى. زاڭ جوباسى بويىنشا كرەديت كورپوراتيۆتىك تابىس سالىعى جانە م ۇلىك سالىعى بويىنشا 3 جىلعا بەرىلەتىن بولادى. ول پايىزسىز بولادى, بىراق شارتتار ورىندالماعان جاعدايدا ءوسىمپۇل ەسەپتەلمەك.
«ماقتانى قايتا وڭدەۋگە, اشىتقى, كونديتەرلىك ونىمدەر, قانت قىزىلشاسىنان قانتتى وندىرۋگە ەسەپتەلگەن قوسىلعان قۇن سالىعىن ازايتۋ بويىنشا نورمانى قولدانۋ ۇسىنىلادى. بۇل اۋىل شارۋاشىلىعى ونىمدەرىن قايتا وڭدەۋدى, ءوندىرىس كولەمىن ۇلعايتۋدى ىنتالاندىراتىن بولادى.
ەكسپورت كەزىندە قوسىلعان قۇن سالىعىن قايتارۋ ءراسىمىن وڭايلاتۋ ماقساتىندا وتاندىق وندىرۋشىلەر ءۇشىن قوسىلعان قۇن سالىعىن جەڭىلدەتىلگەن تۇردە قايتارۋ قۇقىعىن بەرۋ ۇسىنىلادى: ياعني تەكسەرۋسىز – 50%, قالعان 50%-ى تەكسەرۋدەن كەيىن.
كولىك قۇرالدارى مەن اۋىل شارۋاشىلىعى تەحنيكاسىنىڭ كومپونەنتتەرىن ءوندىرۋ ءۇشىن قوسىلعان قۇن سالىعى بويىنشا جەڭىلدىكتى قولدانۋ ۇسىنىلادى. بۇل وتاندىق اۆتوكولىكتەردەگى قازاقستاندىق قامتۋ ۇلەسىن ارتتىرادى», دەدى مينيستر.
زاڭ جوباسى ءبىرىنشى وقىلىمدا ماقۇلداندى.
ودان كەيىن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قالدىقتاردى ەنەرگەتيكالىق كادەگە جاراتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ەكىنشى وقىلىمدا ماقۇلداندى.
قۇجات بويىنشا بايانداما جاساعان ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى شاۆحات وتەمىسوۆ زاڭ جوباسىن ەكىنشى وقىلىمعا دايىنداۋ بارىسىندا قۇقىقتىق ولقىلىقتاردى ءارى قۇقىق قولدانۋدا تۋىندايتىن قايشىلىقتاردى بولدىرماۋعا, سونداي-اق نورمالاردىڭ رەداكتسياسىن جاقسارتۋعا جانە ولاردى تالاپتارعا سايكەس كەلتىرۋگە باعىتتالعان بىرقاتار تۇزەتۋ قاراستىرىلعانىن ايتتى.
اتالعان قۇجات قالدىقتاردى ەنەرگەتيكالىق كادەگە جاراتۋ جونىندەگى جوبالاردى ىسكە اسىرۋ ءۇشىن قۇقىقتىق قولداۋ تەتىكتەرىن قۇرۋ ماقساتىندا ازىرلەندى. وسىعان بايلانىستى, زاڭ جوباسىندا ەكولوگيا, ەلەكتر ەنەرگەتيكاسى جانە جاڭارتىلاتىن ەنەرگيا كوزدەرىن پايدالانۋ سالاسىنداعى قولدانىستاعى زاڭناماعا وزگەرىستەر مەن تولىقتىرۋلار ەنگىزۋ كوزدەلەدى.
«زاڭ جوباسىن ءبىرىنشى وقىلىمدا تالقىلاعان كەزدە ايتىلعانداي, ول قالدىقتاردى ەنەرگەتيكالىق كادەگە جاراتۋ ءۇشىن قۇقىقتىق بازا قالىپتاستىرۋ ماقساتىندا ازىرلەندى. قۇجات تۇرمىستىق قاتتى قالدىقتاردى تەرميالىق جولمەن وڭدەۋ ارقىلى ەلەكتر ەنەرگياسىن الۋدى كوزدەيدى. بۇل پروتسەستەر ەكولوگيالىق جانە ەكونوميكالىق وڭ ناتيجە الۋعا ىقپال ەتەتىن بولادى», دەدى شاۆحات وتەمىسوۆ.