ەلدە توتەنشە جاعداي جاريالانعاندا ءدۇيىم جۇرت بارىنشا ۇيدە بولىپ, قاشىقتان ەڭبەك ەتسە, العى شەپتىڭ باتىرلارى وزگەلەردىڭ اماندىعى ءۇشىن ءوز جانىن قاتەرگە تىگىپ باقتى. بۇل رەتتە اسكەريلەر, پوليتسەيلەر جانە دارىگەرلەرمەن قاتار جەدەل اقپارات تاراتىپ, حالىقتى ساقتىققا شاقىرعان جۋرناليستەردىڭ دە ەڭبەگى ءبىر توبە.
قولىنا قالام الىپ, اقپارات تاراتۋعا اسىققان جۋرناليستەر قاي كەزدە دە ميسسياسىنان مىزعىعان ەمەس. مەيلى ءورت, مەيلى اپات, مەيلى تاسقىن بولسىن سول وقيعا ورنىنان دەرەۋ ساپالى, سەنىمدى اقپارات تاراتادى. ەلدە توتەنشە جاعداي جاريالانىپ ۇلتتىڭ يممۋنيتەتى سىنالار ساتتە دە جۋرناليستەر شيراق قيمىلداپ, كاسىبي مىندەتىن جوعارى دەڭگەيدە اتقارا الاتىنىن تاعى ءبىر دالەلدەدى. بۇل ۋاقىتتا ەپيدەميالىق جاعدايعا بايلانىستى ەلەڭدەگەن ەلدىڭ سۇراعى كوپ بولعانى بەلگىلى. حالىق پەن بيلىك اراسىنداعى دانەكەر رەتىندە جۋرناليستەر مىڭ ساۋالدى ءتيىستى ورگانعا جەتكىزىپ, تولىمدى حابار بەرىپ وتىردى. اراسىندا كوروناۆيرۋسپەن كۇرەستىڭ قالىڭ ورتاسىندا ءجۇرىپ رەپورتاج جاساعاندار دا بار. سونىڭ ءبىرى «Qazaqstan» ۇلتتىق تەلەارناسى جاڭالىقتار قىزمەتى الماتى بيۋروسىنىڭ جەتەكشىسى جازيرا ورازقىزى جەر-جاھاندا تاراعان جۇقپالى ىندەت جاعادان العاندا, ءسات سايىن وزگەرگەن جاڭالىقتاردى جالپاق جۇرتقا جەتكىزۋ ءۇشىن جۋرناليستەر قاۋىمىنىڭ قاربالاسقا تولى جۇمىسى ودان سايىن قىزا تۇسكەنىن ايتادى.
– «الماتىدان كوروناۆيرۋس انىقتالدى» دەگەن العاشقى حابار ايتىلعان كۇننەن باستاپ جۇمىس ءتارتىبىمىز تۇتاس وزگەردى. الەۋمەتتىك جەلىلەردە سان ءتۇرلى جاڭالىقتار شىعا باستادى, ونىڭ ىشىندە بۇرمالانعانى دا, شىندىققا جاناسپايتىنى دا بولدى. ونسىز دا بويىن ۇرەي مەن قورقىنىش بيلەگەن جۇرتقا رەسمي اقپاراتتى دەر كەزىندە بەرۋ, ساعات سايىن حابار تاراتۋ ۇلتتىق ارنانىڭ باستى قاعيداتىنا اينالدى. جاڭالىقتار قىزمەتىنىڭ جۇرگىزۋشىلەرى مەن تىلشىلەرى ىندەت جۇقتىرۋىمىز مۇمكىن دەگەن قورقىنىشقا قاراماستان, قىزمەتىنە ادال بولىپ, ابىرويمەن اتقارۋعا تىرىستى. وقيعا ورنىنان تىكەلەي ەفيرلەر, تەلەفون ارقىلى حابارلاۋ, ماڭىزدى ءارى سوڭعى اقپاراتتى ساپالى, جىلدام جەتكىزۋ ءۇشىن تىنىم تاپپادى, – دەيدى ول.
ونىڭ ايتۋىنشا, مۇنشالىقتى كوپ ارنايى شىعارىلىمدار ادەتتە مەرەكەلەردە, ايتۋلى كۇندەردە جاسالعان بولسا, كارانتين كەزىندە اياق استىنان تىكەلەي ەفيرگە شىعۋ ۇيرەنشىكتى جۇمىسقا اينالعان.
«الماتىدا كوروناۆيرۋس جۇقتىرعان العاشقى ادام تىركەلگەن ساتتەن باستاپ 600-دەن استام ىندەت وشاعى انىقتالىپتى. قالا اكىمى ب.ساعىنتاەۆتىڭ ەسەبىندە ايتىلعانداي, ءبىر تاۋلىكتە 132 ينفەكتسيا وشاعى تىركەلگەن كەزدەر دە بولعان. ءتۇسىرىلىم توپتارى ىندەت وشاقتارىنا جاقىن بارماۋعا تىرىستى. دەگەنمەن, ءبىزدىڭ باستى قارۋىمىز – اقپارات. تەلەكورەرمەندەرىمىزگە سارالانعان, سالماقتى, تەكسەرىلگەن, ماڭىزدى, وزەكتى جاڭالىقتاردى بەرۋ ءۇشىن كەيدە ءبىراز تەر توگۋگە تۋرا كەلەدى. اقپارات الۋدىڭ سان الۋان امالدارىن قولدانامىز. باستىسى, ماتەريالىڭدى كورگەندە كورەرمەن كوكەيىندە ەشقانداي ساۋال, كۇمان قالماۋىن ويلاۋىمىز قاجەت. قاۋىپسىزدىك شارالارىن دا قاتاڭ ۇستاندىق, ءالى دە كارانتين تالاپتارىن ساقتايمىز», دەيدى جازيرا ورازقىزى.
بۇل قاتاڭ ءتارتىپ حالىقتىڭ ءبىرازىن ۇيگە تىققانمەن ونىڭ دا ءبىر قايىرى بولدى. جاقسىلىق كورە بىلگەن ادامعا وقشاۋلاۋ رەجىمى جاڭا مۇمكىندىكتەرگە جول اشتى. كەز كەلگەن جاعدايعا بەيىم ارىپتەستەرىمىز كارانتين كەزىندە ءوز ءۇيىن ءموبيلدى ستۋدياعا اينالدىرىپ, جاڭا فورماتتا اقپارات تاراتۋدى دا ۇيرەنگەن.
«بىلەسىز بە, جاڭالىقتار ءبولىمى پاندەميا اكەلگەن جاڭاشىلدىققا دا اقىرىنداپ بوي تۇزەي باستادى. بۇل رەتتە ءجۋرناليستىڭ ءۇيى ءموبيلدى ستۋدياعا اينالعانى بار. قاشىقتان جۇمىس ىستەگەن تىلشىلەر ۇيالى تەلەفون ارقىلى ماڭىزدى مالىمەتتەردى ءوز باسپاناسىنان ونلاين حابارلاپ وتىردى. بۇل جاڭا ۇردىسكە ۇيرەنىسۋ العاشىندا وڭاي بولمادى. وپەراتور, جارىق قويۋشى, رەجيسسەر سىندى تاعى دا باسقا كوپتەگەن ماماندارسىز ەفيرگە شىعۋ ۇلكەن جاۋاپكەرشىلىك پەن ەڭبەكتى تالاپ ەتتى», دەيدى Atameken Business ارناسىنىڭ تەلەجۇرگىزۋشىسى قايىربەك بايمىرزا.
ارىپتەسىمىزدىڭ سوزىنە سەنسەك, اتالعان تەلەارنانىڭ 90% قىزمەتكەرى ۇيدەن جۇمىس ىستەپ, قالعان قىزمەتكەرلەر رەداكتسيادا بارلىق سانيتارلىق تالاپتاردى ورىنداي وتىرىپ جۇمىس ىستەگەن. ۇيدە تەلەارناداعىداي تەحنيكالىق مۇمكىندىكتەر بولماسا دا جاڭا جاعدايدا ەفير ۋاقىتى ارتىپ, باستىسى – جاڭالىقتار جەلىسىنەن جاڭىلماعان. اڭداپ قاراساق, كوروناۆيرۋس كوپ تۇسىنىكتىڭ تونىن تەرىس اينالدىردى. قوعامعا قالىپتى جاعدايعا باسقا قىرىنان قاراۋعا, كوپ نارسەنىڭ قادىرىن بىلۋگە ۇيرەتتى. سابىرعا شاقىردى, سابامىزعا كەلتىردى. ەلدەگى كەيبىر كەمشىن تۇستاردى تۇزەتۋگە جول اشتى...
قازىرگىدەي قيىن ساتتە العى شەپتە قىزمەت ەتكەن ءاربىر مامان يەسىنىڭ ەڭبەگى ولشەۋسىز. «جەگەنى جانتاق, ارقالاعانى التىن» ارىپتەستەردىڭ جۇمىسىن ادال اتقارۋ ءۇشىن ەڭ قاتەرلى ايماقتاردان اقپارات تاراتقان ەرەن ەڭبەگى ەلەنىپ, حالىقتىڭ سەنىمى ارتا تۇسسە ەكەن دەگەن تىلەگى بار. وكىنىشكە قاراي, بۇگىندە كوروناۆيرۋس ينفەكتسياسىن جۇقتىرعاندار سانى 19 مىڭنان اسسا دا ىندەتتىڭ بارىنا سەنبەيتىندەر ءالى دە بار. قايتكەندە دە باستى مىندەتىمىز اقپاراتتاندىرۋ, قۇلاقتاندىرۋ بولعاندىقتان, قوعامدى قاۋىپسىزدىك شارالارىن قاتاڭ ساقتاۋعا شاقىرۋ جالعاسا بەرەدى.
قۋانىشتى جاڭالىقتار تاراتار كۇنىمىز كوپ بولسىن!