كوروناۆيرۋس ىندەتىنىڭ تارالۋ قاۋپى سەيىلگەن جوق

ازاماتتاردىڭ دەنساۋلىقتارىنا زيان كەلتىرمەۋ ءۇشىن, اسىرەسە, كوپشىلىك جينالاتىن جەرلەردە قاۋىپسىزدىك شارالارىن ساقتاۋعا شاقىرامىن.

كارانتين رەجيمى جەڭىلدەتىلگەنىمەن, ءالى دە ساقتالۋدا. سوندىقتان دارىگەرلەردىڭ كەڭەسىنە قۇلاق سالىپ, تالاپتارىن ورىنداعانىمىز ابزال.

قازاقستان كورشىلەس مەملەكەتتەر اراسىندا العاشقىلاردىڭ كوروناۆيرۋسقا قارسى ارەكەتتەر جاسادى. توتەنشە جاعداي كەزىندە, كارانتيندىك شەكتەۋلەردەن ازاماتتارىمىز ءبىراز قولايسىز جاعدايلارعا ۇشىرادى. بۇل ارينە وكىنىشتى, بىراق باسقا امال جوق.

مەديتسينا سالاسى قىزمەتكەرلەرىنىڭ بىلىكتىلىگى مەن قاجىرلىلىعىنىڭ ارقاسىندا ساۋىعۋشىلار قاتارى كوبەيۋدە. دەگەنمەن, ونىڭ ناتيجەلى بولۋىنا كارانتين تالاپتارىن بۇلجىتپاي ورىندالۋى كەرەك ەكەنى بەلگىلى. سوندىقتان, وتباسى, اعايىن-تۋىستىڭ جانە قالا بەرسە ەلىمىزدىڭ كەلەشەگى ءوز قولىمىزدا ەكەنىن ۇمىتپايىق!

وكىنىشكە وراي, ىندەت ەلباسىنى دا اينالىپ وتپەدى. وعان قاراماستان, نۇرسۇلتان ءابىش ۇلى نازارباەۆ قاشىقتىقتان جۇمىس ىستەپ ءجۇر. بىرنەشە ەل پرەزيدەنتتەرى ءوز نيەتتەرىن ءبىلدىرىپ, قازاقستاننىڭ تۇنعىش پرەزيدەنتىنە ساۋىعىپ كەتۋىنە تىلەكتەستىك نيەتتەرىن جەتكىزدى. مەن دە شىن جۇرەكتەن تىلەكتەس ەكەنىمدى ايتقىم كەلەدى. سونىمەن بىرگە, باسقا دا وتانداستارىمىزعا ساۋىعىپ, وتباسىلارىمەن قاۋىشقاندارىن تىلەيمىن.

وسى ورايدا, مەملەكەت باسشىسى قاسىم-جومارت كەمەل ۇلى توقاەۆتىڭ حالىققا جولداۋلارىندا ىندەتكە قارسى شارالاردى ايتا وتىرىپ, سابىرلىققا شاقىردى. ەل باسشىلىعىنىڭ تىكەلەي تاپسىرماسىمەن ىندەتپەن كۇرەسۋگە قوسىمشا قارجى ءبولىنىپ, حالىققا قولداۋ كورسەتىلۋدە.

ارينە, ءومىر بولعان سوڭ ءارتۇرلى جاعداي ورىن الىپ جاتادى. وسى رەتتە, اتادان قالعان "جۇمىلا كوتەرگەن جۇك جەڭىل" دەگەن ءسوز بار. ەستەرىڭىزدە بولسا, ماقتاارالعا ونىن العان جاعداي ەلدى الاڭداتتى. وسى جاعدايدا ءبىز بىرلىگىمىزدى, ەلدىگىمىزدى كورسەتتىك. ونى ماقتاارالدىق اعايىندارىمىز ءىس جۇزىندە سەزىندى. سۋ باسۋ سالدارىنان زارداپ شەككەن وتانداستارىمىزعا ەلىمىزدىڭ تۇپكىر-تۇپكىرىنەن كومەك لەزدە جەتىزىلدى. كۇن دەمەي, ءتۇن دەمەي كورشىلەس اۋىل ازاماتتارى كەلىپ, ەلدى مەكەندەردى سۋ باسۋدان قورعادى.

جاقسىلىقتىڭ ەرتە كەشى بولمايدى دەگەن بابالار! ەل باسىنا ءىس تۇسكەندە قاسىنان تابىلۋ ول بورىشىم! اعايىن مەن جولداستىڭ قايعىسىن ءبولىسۋ ول پارىزىم! ال كارانتيندىك جاعدايدىڭ تالابىن ورىنداپ, بارىنشا ساقتانۋ كوپشىلىك الدىندا جانە ارىپتەستەرىمنىڭ الدىندا جاۋاپكەرشىلىگىم دەپ بىلەمىن.

سول سەبەپتى اعايىندار, ءار جاعدايعا تۇسىنۋشىلىكپەن قاراپ, كەشىرىمدى بولايىق. ءاربىر ءىستىڭ سوڭى قايىرىمدى بولسىن. بولعان ىسكە بولاتتاي بولايىق!

پارلامەنت ءماجىلىسىنىڭ دەپۋتاتتارى دارىگەرلەردىڭ بارلىق تالاپتارىن ورىنداپ, قاشىقتىقتا جۇمىس جاساپ جۇرگەنىنە مىنە, ءۇش ايدان استى. جۇمىس كەستەسى جوسپارلى تۇردە ماڭىزدى ىستەرگە تولى. وزىندىك قيىندىقتارى بار. دەگەنمەن, ءاربىر ارىپتەسىم ساپالى زاڭ شىعارۋعا ات سالىسىپ, حالقىمىزدىڭ ءومىر ءسۇرۋ ساپاسىن ارتتىرۋ ماقساتىندا دەپۋتاتتىق ساۋالدار جولداۋدا.

جەڭىستى كۇندەرىمىز كوپ بولسىن!

ەرجان قۇدايبەرگەن,قر پارلامەنتى ءماجىلىسىنىڭ دەپۋتاتى