اسقار مامين ۇكىمەتتىڭ جۇمىسى تۋرالى ەسەپ بەردى

ۇكىمەت باسشىسى مۇنايعا الەمدىك باعانىڭ تومەندەۋىنە جانە سىرتقى ەكونوميكالىق كونيۋنكتۋرانىڭ ناشارلاۋىنا قاراماستان, 2019 جىلدىڭ قورىتىندىسى بويىنشا قازاقستان ەكونوميكاسىنىڭ سوڭعى 6 جىلداعى ەڭ جوعارى ءوسىمى – 4,5%-عا قول جەتكىزىلگەنىن اتاپ ءوتتى. سونىمەن قاتار ءوسىمنىڭ 85%-ى شيكىزاتتىق ەمەس سالالاردى دامىتۋ ەسەبىنەن قامتاماسىز ەتىلدى.

ەكونوميكا ءوسىمىنىڭ نەگىزگى درايۆەرلەرى — وڭدەۋ ونەركاسىبى (4,5%), قۇرىلىس (12,9%), كولىك (5,1%) جانە ساۋدا (7,6%) بولدى. نەگىزگى كاپيتالعا cالىنعان ينۆەستيتسيالار 8,5%-عا, ونىڭ ىشىندە جەكە ينۆەستيتسيالار 9,5%-عا ءوستى. سىرتقى ساۋدا اينالىمى $97 ملرد دەيىن ءوستى, سىرتقى ساۋدانىڭ وڭ سالدوسىنىڭ ءوسىمى $19 ملرد قۇرادى. ينفلياتسيا جوسپارلانعان ءدالىز شەگىندە 5,4%-دى قۇرادى. ەڭبەك نارىعىندا تۇراقتىلىق ساقتالدى. جۇمىسسىزدىق دەڭگەيى 4,8% بولدى. ەڭ تومەنگى جالاقى 1,5 ەسە ءوستى. 

وسى جىلدىڭ 5 ايىنىڭ قورىتىندىسى بويىنشا قازاقستاننىڭ ءجىو 1,7%-عا تومەندەدى. بۇل رەتتە ەكونوميكانىڭ نەگىزگى سالالارىندا ءوسىم قامتاماسىز ەتىلدى. تاۋارلار ءوندىرىسى 4,8%-عا ارتتى.

"قازىرگى جاعدايدا ۇكىمەتتىڭ نەگىزگى مىندەتى – ەكونوميكا وسىمىنىڭ وڭ قارقىنىنا شىعۋ ۇشىن قاجەتتى جاعدايلاردى جاساۋ. ول ءۇشىن ەلىمىزدەگى الەۋمەتتىك-ەكونوميكالىق تۇراقتىلىقتى ساقتاۋ بويىنشا اۋقىمدى شارالار قابىلدانىپ جاتىر", — دەدى ا. مامين.

ۇكىمەت باسشىسى توتەنشە جاعداي كەزىندە ەكونوميكانى تۇراقتاندىرۋعا جانە حالىقتى قولداۋعا باعىتتالعان جەدەل ءارى شۇعىل شارالاردىڭ 2 توپتاماسى (بيىلعى 23-30 ناۋرىز ارالىعى) قابىلدانعانىن اتاپ ءوتتى. الەۋمەتتىك ءالجۋاز توپتارعا قارجىلىق كومەك كورسەتىلدى, ونىڭ ىشىندە قاجەتتى ءدارى-دارمەكتەرمەن جانە ازىق-ت ۇلىكپەن قامتاماسىز ەتىلدى, بانك نەسيەلەرى بويىنشا تولەمدەر ۋاقىتشا توقتاتىلدى, سالىق جانە باسقا دا مىندەتتى تولەمدەردى تولەۋ مەرزىمى كەيىنگە شەگەرىلدى. داعدارىس جاعدايىندا جەكە سەكتوردىڭ تۇراقتىلىعىن قامتاماسىز ەتۋ ءۇشىن شوب-تى جەڭىلدىكپەن نەسيەلەۋ جانە بيزنەستى اۋقىمدى ىنتالاندىرۋ شارالارى قابىلداندى.

مەملەكەتتىك باعدارلامالار اياسىندا جۇمىسپەن قامتۋ شارالارىمەن وسى جىلدىڭ سوڭىنا دەيىن 1,2 ملن-نان استام ازامات قامتىلاتىن بولادى. جۇمىسپەن قامتۋدىڭ جاڭا جول كارتاسى اياسىندا 6,5 مىڭنان استام جوبا ىسكە اسىرىلادى. بۇل 255 مىڭ جۇمىس ورنىن اشۋعا جانە ينجەنەرلىك-كوممۋنيكاتسيالىق جانە الەۋمەتتىك ينفراقۇرىلىمدى جاڭعىرتۋ ارقىلى وڭىرلەردە حالىقتىڭ تۇرمىس ساپاسىن جاقسارتۋعا مۇمكىندىك بەرەدى. بيزنەستىڭ جول كارتاسى ەكونوميكانىڭ ارالاس سالالارىندا 100 مىڭ جاڭا تۇراقتى جۇمىس ورنىن قۇرۋعا نەگىز بولادى.

ۇكىمەت 2020 جىلعا ارنالعان ەكونوميكالىق ءوسىمدى قالپىنا كەلتىرۋ جونىندەگى كەشەندى جوسپاردى ازىرلەپ, بەلسەندى تۇردە ىسكە اسىرۋدا. ول ىسكەرلىك بەلسەندىلىكتى ىنتالاندىرۋعا, جۇمىسپەن قامتۋدى جانە حالىقتىڭ تابىسىن قولداۋعا باعىتتالعان ناقتى سالالىق شارالاردى قامتيدى. كەشەندى جوسپاردى ىسكە اسىرۋ ءۇشىن پارلامەنت قىسقا مەرزىمدە زاڭناماعا شۇعىل تۇزەتۋلەر توپتاماسىن قاراستىرىپ جاتىر. 

بيىلعى 1 تامىزعا دەيىن ەكونوميكالىق ءوسىمدى قالپىنا كەلتىرۋ جونىندەگى مەملەكەتتىك كوميسسيانىڭ جۇمىسى اياسىندا 2025 جىلعا دەيىنگى ستراتەگيالىق جوسپاردىڭ جاڭا رەداكتسياسى ازىرلەنەدى. ول ەلىمىزدىڭ جاڭا ەكونوميكالىق باعدارىنىڭ نەگىزگى باعىتتارىن انىقتايدى.

"جاڭا ەكونوميكالىق شىنايىلىق ورتا مەرزىمدى پەرسپەكتيۆادا ەلدىڭ ساپالى ءارى تۇراقتى دامۋىن قامتاماسىز ەتۋ ءۇشىن ەكونوميكالىق ساياساتقا تۇبەگەيلى وزگەرىستەردى ەنگىزۋدى تالاپ ەتەدى", — دەپ اتاپ ءوتتى ا. مامين.