بۇگىندە جامبىل وبلىسىنىڭ تۇرعىندارىن اۋىز سۋ جانە گازبەن قامتۋ وزەكتى ماسەلەلەردىڭ ءبىرى بولىپ وتىر. وڭىردە سارىسۋ, تالاس, مويىنقۇم جانە وزگە دە ءبىراز اۋداندارداعى بىرقاتار ەلدى مەكەندەر ءالى دە اۋىز سۋ مەن كوگىلدىر وتىن تاپشىلىعىن كورۋدە.
وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى نۇرلان الدامجاروۆتىڭ ايتۋىنشا, بۇگىنگى تاڭدا ەلدى مەكەندەردىڭ 57,8 پايىزى ورتالىقتاندىرىلعان سۋمەن قامتىلعان. سونىمەن قاتار 2023 جىلى ءوڭىر تۇرعىندارىن تولىقتاي اۋىز سۋمەن قامتاماسىز ەتۋ جوسپارلانعان ەكەن. سالا باسشىسى اعىمداعى جىلى وڭىردە 17,4 ملرد تەڭگەگە 50 سۋمەن جابدىقتاۋ نىسانىنىڭ قۇرىلىسى جۇرگىزىلىپ جاتقانىن اتاپ ءوتتى. جىل سوڭىنا دەيىن 34 نىسان پايدالانۋعا بەرىلەدى دەپ كۇتىلۋدە. ءتيىستى قارجى «وڭىرلەردى دامىتۋ» جانە «جۇمىسپەن قامتۋدىڭ جول كارتاسى» مەملەكەتتىك باعدارلامالارى اياسىندا قاراستىرىلعان. سونىمەن قاتار سۋمەن جابدىقتاۋ نىساندارىنىڭ باسىم بولىگى جۋالى, بايزاق, ت.رىسقۇلوۆ جانە جامبىل اۋداندارىندا سالىنادى. سونداي-اق 2021-2023 جىلدارى 84 ەلدى مەكەنگە جۇزدەگەن شاقىرىم سۋ قۇبىرى تارتىلىپ, ناتيجەسىندە وبلىستىڭ بارلىق تۇرعىندارى تولىق تازا اۋىز سۋعا قول جەتكىزەدى. بۇل ورايدا وبلىس اكىمى بەردىبەك ساپارباەۆ كەستەدە بەلگىلەنگەن مەرزىمنەن قالىس قالماۋ ءۇشىن تاراز قالاسى مەن مەركى, شۋ جانە قورداي اۋداندارىنىڭ اكىمدەرىنە مەردىگەرلەرمەن تۋىنداعان ماسەلەلەردى شەشىپ, جوبالىق-سمەتالىق قۇجاتتاردى ۋاقتىلى دايىنداۋدى تاپسىردى. ماسەلەن, شۋ اۋدانىنىڭ ورتالىعى تولە بي اۋىلىنا گاز تارتۋ ماسەلەسى تالاي جىلدان بەرى شەشىلمەي كەلەدى. جەرگىلىكتى تۇرعىندار مەن گاز تارتۋشى «پاريەۆ» جاۋاپكەرشىلىگى شەكتەۋلى سەرىكتەستىگى اراسىندا باعانىڭ كوتەرىلۋىنە بايلانىستى ماسەلەلەر تۋىنداعان. سول سياقتى, وبلىس ورتالىعىنان شالعايدا جاتقان مويىنقۇم اۋدانىنىڭ ايدارلى اۋىلىندا دا اۋىز سۋ ماسەلەسى ءالى وزەكتى كۇيىندە قالىپ وتىر.
بۇگىنگى تاڭدا اۋىلداردى گازداندىرۋعا رەسپۋبليكالىق جانە وبلىستىق بيۋدجەتتەن, سونىڭ ىشىندە «جۇمىسپەن قامتۋدىڭ جول كارتاسى» اياسىندا ءتيىستى قاراجات قاراستىرىلۋدا. ناتيجەسىندە, بارلىعى 84 اۋىل گازداندىرىلاتىن بولادى. سونىمەن قاتار بيىل 30 اۋىل كوگىلدىر وتىنمەن قامتىلادى. الايدا وبلىستاعى 377 ەلدى مەكەننىڭ 192-سىنە عانا تابيعي گاز قۇبىرى تارتىلعان. بۇل 51 پايىزدى قۇرايدى. اتالعان ماسەلە اۋليەاتالىق الەۋمەت ءۇشىن ءالى كۇنگە دەيىن ماڭىزدى بولىپ وتىر. اۋىلداعى تۇرعىندار اتالعان ماسەلەلەرگە بايلانىستى شاعىمدارىن وبلىس باسشىلىعىنا دا ايتقان بولاتىن. ب.ساپارباەۆ ەلدى مەكەندەردى اۋى سۋ جانە كوگىلدىر وتىنمەن قامتۋدىڭ ماڭىزىن ايتا كەلە, ينجەنەرلىك ينفراقۇرىلىم جۇيەلى تۇردە دامۋى قاجەتتىگىن, تۇرعىندار جولدار رەتكە كەلتىرىلگەننەن كەيىن جەراستى ينجەنەرلىك جەلىلەرىن جوندەۋ ءۇشىن كوپ ۋاقىت وتپەي قايتا قازىلىپ, بۇزىلاتىنىنا ءجيى شاعىمدانىپ وتىرعانىن, سوندىقتان دا بارلىق جۇمىستار قاتار اتقارىلۋى كەرەك ەكەنىن اتاپ وتكەن.
سونىمەن قاتار الەۋمەتتىڭ الەۋەتىن ارتتىرۋعا باعىتتالعان ءتۇرلى جوبالاردىڭ مەرزىمىندە ورىندالۋى دا باستى ماسەلە. بۇل ورايدا, وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆا وڭىردە 2019-2020 جىلدارعا جوسپارلانعان 412 جوبانىڭ 305-ءى بويىنشا جوبالىق-سمەتالىق قۇجاتتامالاردىڭ ءالى دايىندالماعانىن جەتكىزدى. ونىڭ 56-سى كۇزگە دەيىن ماقۇلدانباق. جوبالاردىڭ كوپشىلىگى تاراز قالاسىندا جانە جۋالى, جامبىل, بايزاق, سارىسۋ, ت.رىسقۇلوۆ اۋداندارىندا جۇزەگە اسىرىلماعان. ال جامبىل وبلىسى اكىمى اپپاراتىنىڭ باسشىسى الماس ماديەۆتىڭ حابارلاۋىنشا, وبلىستىق بىرقاتار باسقارمالار, تاراز قالاسى مەن اۋدان اكىمدىكتەرى وبلىس اكىمىنىڭ كەيبىر تاپسىرمالارىن ۋاقتىلى ورىنداماعان. بۇل دا دەر كەزىندە ءتۇرلى الەۋمەتتىك جوبالاردىڭ جۇزەگە اسۋىنا قولبايلاۋ بولىپ وتىر.
جامبىل وبلىسى