قارجى نارىعىن رەتتەۋ جانە دامىتۋ اگەنتتىگىنىڭ تۇركىستان وبلىسىنداعى وكىلدىگى 1 شىلدەگە دەيىن قارجىلىق ۇيىمداردىڭ رەسمي تىركەلۋىن قاداعالاپ, كەيىن تەكسەرۋ جۇرگىزبەك. ناتيجەسىنە قاراي شارا قولدانىلادى, - دەپ حابارلادى Egemen.kz.
اگەنتتىكتىڭ تۇركىستان وڭىرلىك وكىلدەر باسقارماسىنىڭ باسشىسى نۇرجان ورمانوۆتىڭ ايتۋىنشا, ميكروكرەديتتىك ۇيىمدار, لومباردتار رەسمي قايتا تىركەۋدەن ءوتىپ, زاڭ تالاپتارىنا ساي جۇمىسىن باستايدى.
"تۇركىستان وبلىسىندا 25 ميكروكرەديتتىك ۇيىم رەسمي جۇمىس ىستەسە, بۇگىنگى تاڭدا ونىڭ 22-ءسى ءوتىنىش بەرىپ, 17-ءىنىڭ قۇجاتتارى تىركەلگەن. قالعانى قارالۋدا. سونداي-اق, وڭىردە 141 لومبارد جۇمىس ىستەيدى, ونىڭ 41-ءى ءوتىنىش بەرىپ, 35-ءىنىڭ قۇجاتتارى راسىمدەلدى. تىركەۋ جۇمىستارى 1 شىلدەگە دەيىن جالعاساتىن بولادى", دەدى نۇرجان قونىس ۇلى.
اگەنتتىك شاعىن جانە ورتا كاسىپكەرلىك سۋبەكتىلەرىنە قولداۋ شارالارىن كورسەتۋ ءتارتىبىن دە قاداعالايدى. سونىمەن قاتار, ۇلتتىق بانكتىڭ ەنشىلەس ۇيىمدارى ارقىلى جۇزەگە اسىرىلاتىن جەكە تۇلعالاردىڭ يپوتەكالىق تۇرعىن ءۇي قارىزدارىن جانە يپوتەكالىق قارىزداردى قايتا قارجىلاندىرۋ باعدارلامالارىن ىسكە اسىرۋ, وسى باعدارلامالار شەڭبەرىندە بانكتەر قابىلداعان مىندەتتەمەلەردىڭ ورىندالۋىن باقىلايدى.
سونداي-اق بريفينگتە باسقارما باسشىسى اگەنتتىكتىڭ قىزمەتتىك مىندەتتەرى جونىندە ماعلۇمات بەردى.