قوستاناي وبلىسىندا كارانتين رەجىمى قايتا كۇشەيدى

جيىنعا قاتىسۋشىلار كارانتين تالاپتارىن ساقتاۋ شارالارى بويىنشا جۇرگىزىلگەن مونيتورينگ ناتيجەلەرىنىڭ كوڭىل كونشىتپەيتىنىن جانە وبلىس اۋماعىندا ىندەتتىڭ تارالۋ دەڭگەيىنىڭ قارقىن الا باستاعانىن ءسوز ەتتى.  وسىعان بايلانىستى وبلىستىق شتاب 18-30 ماۋسىم ارالىعىندا مىناداي شەكتەۋ شارالارىن ەنگىزۋ تۋرالى شەشىم قابىلداپ وتىر:   

19 ماۋسىم ساعات  00.00-دەن  باستاپ "قوستاناي – اۋليەكول – سۇرعان", "قوستاناي – رۋدنىي", "ارقالىق – امانتوعاي" اۆتوجولدارىندا  3 سانيتارلىق بەكەت ورناتىلادى. اتتراكتسيوندار مەن سۋبۇرقاقتاردىڭ, ۇرلەمەلى كونسترۋكتسيالاردىڭ (باتۋتتار) جۇمىسىنا تىيىم سالىنادى; كاراوكە بار, بيليارد, بوۋلينگ ورتالىقتارىنىڭ, تاتۋ سالوندارى مەن ماسساج سالوندارىنىڭ جۇمىسى توقتاتىلادى; حقك ورتالىقتارى ونلاين رەجىمگە كوشەدى. ونلاين رەجىمدە جۇزەگە اسىرۋ مۇمكىن ەمەس قىزمەتتەر الدىن الا جازىلۋ ارقىلى ساعات 10-00-دەن 18-00-گە دەيىن كورسەتىلەدى; شاشتارازدار الدىن الا جازىلۋ بويىنشا 10-00-دەن 18-00-گە دەيىن جۇمىس ىستەيدى; ءبىلىم بەرۋ ورتالىقتارى, ۇيىرمەلەر, بالالاردى دامىتۋ ورتالىقتارى 9-00-دەن 16-00-گە دەيىن جۇمىس ىستەيدى (بالالار سانى 15-تەن اسپاۋى ءتيىس); ونەركاسىپ تاۋارلارىن وتكىزەتىن نىسانداردىڭ جۇمىسى 20-00-گە دەيىن توقتاتىلادى; ازىق-ت ۇلىك جانە ازىق-ت ۇلىكتىك ەمەس بازارلاردىڭ جۇمىسى 10-00-دە باستالىپ, 16-00-گە دەيىن توقتاتىلۋى ءتيىس; مەملەكەتتىك قىزمەتشىلەردىڭ 80%-ى قاشىقتان جۇمىس ىستەۋگە كوشەدى. جينالىستار, كەڭەستەر, سەمينارلار, كونفەرەنتسيالار سەلەكتورلىق ونلاينعا كوشەدى.

وڭىرلىك جەدەل شتاب الەۋمەتتىك قورعالماعان ساناتتاعى بالالار دەمالاتىن "بولاشاق" بالالار لاگەرىنىڭ جۇمىسىنا رۇقسات ەتۋ تۋرالى شەشىم قابىلدادى. الايدا, مۇنداعى سانيتارلىق شارا قاتاڭ ساقتالۋى كەرەك.

سونىمەن قاتار كەلەسى نىسانداردىڭ جۇمىسىنا بۇعان دەيىن دە سالىنىپ كەلگەن تىيىم ساقتالادى:

- ادامدار كوپ جينالاتىن ويىن-ساۋىق, سپورتتىق جانە باسقا دا بۇقارالىق ءىس-شارالاردى وتكىزۋ ورىندارى;

- وتباسىلىق,  ادەت-عۇرىپتىق جانە باسقا دا ءىس-شارالار, كەيتەرينگتىك قىزمەتتەر جانە مەرەكەلەردى ۇيىمداستىرۋ بويىنشا قىزمەت كورسەتۋ ورىندارى;

- كينوتەاترلار, تەاترلار, بارلىق ويىن الاڭدارى (اۋلالاردان باسقا);

- تۇنگى كلۋبتار, كومپيۋتەرلىك جانە ويىن كلۋبتارى, كاليان, بۋكمەكەرلىك كەڭسەلەر;

- ساۋدا-ويىن-ساۋىق ورتالىقتارىندا ورنالاسقان فۋد-كورتتار, كينوتەاترلار, ويىن-ساۋىق نىساندارى;

- قالا سىرتىنداعى 4 بالالار لاگەرىن قوسپاعاندا, بالالاردى ساۋىقتىرۋ لاگەرلەرى مەن مەكتەپ جانىنداعى لاگەرلەر;

سونداي-اق سپورتتىق جارىستارىن وتكىزۋگە تىيىم سالىنادى. ەپيدەميولوگيالىق جاعدايدى تۇراقتاندىرۋ ماقساتىندا  20-21 ماۋسىم ارالىعىندا قوستاناي جانە رۋدنىي قالالارىندا مىناداي قوسىمشا ۋاقىتشا شەكتەۋلەر ەنگىزىلەدى:

- قوعامدىق ورىنداردىڭ, ساياباقتاردىڭ, سكۆەرلەردىڭ, جاعالاۋلاردىڭ, جاعاجايلاردىڭ, اكۆاپاركتەردىڭ جۇمىسى توقتاتىلادى;

- 65 جاستان اسقان ادامداردىڭ كوشەگە شىعۋىنا تىيىم سالىنادى.

جيىن بارىسىندا ايماق  باسشىسى  وبلىس تۇرعىندارىن جەكە قاۋىپسىزدىك شارالارىن ساقتاۋعا زور جاۋاپكەرشىلىكپەن قاراۋعا شاقىردى.

"تالداۋ كورسەتكەندەي ينفەكتسيانىڭ تارالۋىنا ەڭبەك, الەۋمەتتىك, وتباسىلىق بايلانىستاردىڭ ارتۋى سەبەپ بولىپ وتىر. تۇرعىندار ماسكا كيمەيدى, قاشىقتىقتى ساقتامايدى, تۇرمىستا جانە جۇمىستا قول گيگيەناسىنا سالعىرت قارايدى.  سونىمەن قاتار, ءوز قىزمەتىن قايتا باستاعان نىسانداردا سانيتارلىق-دەزينفەكتسيالىق رەجيم دۇرىس ورىندالمايدى", - دەدى ارحيمەد مۇحامبەتوۆ.

جالپى قوستاناي وبلىسىندا بۇگىنگە دەيىن 247 COVID-19 ينفەكتسياسى تىركەلگەن. 

وبلىس اكىمى وسىناۋ سىندارلى كەزەڭدە كاسىپكەرلەرگە  ۇلكەن جاۋاپكەرشىلىك جۇكتەلەتىنىن ايتا كەلىپ,  ولاردىڭ ءوز جۇمىسشىلارىن قولعاپپەن, ماسكالارمەن جانە باسقا دا قورعانىس قۇرالدارىمەن قامتاماسىز ەتۋ قاجەتتىگىن ەسكەرتتى.

"ەپيدەميولوگيالىق جاعداي ناشارلاعان جاعدايدا, بۇرىن ەنگىزىلگەن كارانتيننىڭ بوساڭسۋى جويىلادى جانە وبلىس كۇشەيتىلگەن كارانتين جاعدايىنا ورالادى", - دەدى ارحيمەد مۇحامبەتوۆ.

 

 

قوستاناي وبلىسى