اقش-تىڭ لاس-ۆەگاس قالاسىنداعى MGM Grand كەشەنىندە وتكەن كاسىپقوي بوكس كەشىندە قازاقستاندىق بوبىرجان مومينوۆ امەريكالىق كەمەرون كراەلمەن كۇش سىناستى, - دەپ جازادى Egemen.kz
ءبىرىنشى ورتا سالماقتا ونەر كورسەتىپ جۇرگەن 28 جاستاعى جەرلەسىمىز بۇگىنگى كۇنگە دەيىن 10 رەت رينگكە كوتەرىلىپ, بارلىعىندا جەڭىسكە جەتكەن. سەگىز باسەكەدە ايقىن باسىمدىق تانىتتى. كەزىندە بوبىرجاننىڭ مەكسيكانىڭ ايگىلى بوكسشىسى ساۋل الۆارەستىڭ سپارينگ-ارىپتەسى بولعانىن جانكۇيەرلەر جاقسى بىلەدى. ال 26 جاستاعى اقش-تىڭ وكىلى 36 كەزدەسۋ وتكىزىپ, 17 مارتە مەرەيى ۇستەم بولدى. 16 رەت ۇتىلىپ, تاعى ءۇش جەكپە-جەكتە تەڭ ەسەپ تىركەلدى. ايتۋلى باسەكەدە ەڭ سوڭعى التىنشى راۋندقا دەيىن سوزىلعانىمەن, تورەشىلەردىڭ بارلىعى مومينوۆتىڭ مىقتىلىعىن ءبىراۋىزدان مويىندادى.
لاس-ۆەگاستاعى بوكس كەشىنىڭ باستى جەكپە-جەگىندە اسا جەڭىل سالماقتاعى فيليپپيندىك مايك پلانيا WBO رەيتينگىندە ءبىرىنشى ورىندا تۇرعان دجوشۋا گريەردى ەكى رەت نوكداۋنعا جىبەرىپ, ۇپاي سانىمەن جەڭىسكە جەتتى.