بۇل تۋرالى پرەزيدەنت جانىنداعى ورتالىق كوممۋنيكاتسيالار قىزمەتىنىڭ الاڭىندا وتكەن بريفينگتە بەلگىلى بولدى. ۇبت-عا دايىندىق بارىسى باياندالعان ءباسپاسوز جيىنىندا بۇدان بولەك سانيتارلىق تالاپتاردىڭ قالاي ساقتالاتىنى, نەگىزگى وزگەرىستەر مەن تالاپكەرلەرگە جاسالعان جاڭا مۇمكىندىكتەر جونىندە ايتىلدى.
ۇلتتىق تەستىلەۋ ورتالىعىنىڭ ديرەكتورى ديدار سماعۇلوۆ ەڭ الدىمەن پاندەميا جاعدايىندا ۇبت-نى وتكىزۋدىڭ باستى ەرەكشەلىكتەرى مەن قولعا الىنعان دايىندىق جۇمىستارىنىڭ بارىسىنا توقتالدى. ورتالىق باسشىسىنىڭ ايتۋىنشا, تالاپكەر تەستىلەۋگە كىرۋ الدىندا دەزينفەكتسيالاۋدىڭ 5 كەزەڭىنەن (توننەل, اياق كيىمىن تازارتاتىن كىلەمشە, قولىن انتيسەپتيكپەن ءسۇرتۋ, دەنە قىزۋىن ولشەۋ) وتەدى. وسىدان سوڭ تەست تاپسىرۋشى ءوزىنىڭ بەت الپەتىن ارنايى باعدارلاما ارقىلى سايكەستەندىرىپ, ءوزى تاعىپ كەلگەن مەديتسينالىق ماسكاسىن كىرەبەرىستە بەرىلەتىن جاڭاسىمەن الماستىرادى. ءارى قاراي جىلداعىداي تەكسەرىسپەن (ۇبت-عا رۇقسات ەتىلمەيتىن زاتتاردىڭ بار-جوعىن باقىلاۋ) تەستىلەۋگە كىرىپ, اۋديتورياداعى اراقاشىقتىعى ساقتالعان ورىنعا وتىرادى. ال تەستىلەۋ وتكىزىلەتىن اۋديتوريا ۋاقتىلى جەلدەتىلىپ, تەستىلەنۋشىلەردىڭ ءار لەگىنەن سوڭ تازارتىلۋى ءتيىس.
بيىلعى ۇبت-نىڭ نەگىزگى وزگەرىستەرىنە كەلسەك, ەندى مەملەكەتتىك گرانت تىلگە ەمەس, ءبىلىم بەرۋ باعدارلاماسىنا بولىنەدى. بۇل شىندىعىندا قوعامدا ەڭ كوپ تالقىلانعان جانە مەملەكەتتىك ءبىلىم گرانتتارىن تاعايىنداۋ جونىندەگى كونكۋرستىق كوميسسيا جىل سايىن كوتەرەتىن, بىراق وسىعان دەيىن شەشىمى تابىلماي كەلگەن ماسەلە بولاتىن. سەبەبى ورىس تىلىندە تەست تاپسىرۋشىلار نەبارى 50 بالمەن گرانتقا تۇسسە, ءدال سول ماماندىققا قازاق تىلىندە تاپسىرعان تالاپكەرلەر 70 بالمەن گرانتقا يە بولا الماي جاتاتىن ەدى. وسىدان سوڭ گرانت بولىنىسىندە داۋلى پىكىرتالاستار ورىن الىپ وتىردى. مىنە, بيىل اتا-انالار مەن تالاپكەرلەر تاراپىنان ايتىلعان سىن ءوز ناتيجەسىن بەرگەن سىڭايلى.
2020 جىلعى تەستىلەۋدە تالاپكەرلەرگە جاسالعان مۇمكىندىكتەر اياسى كەڭەيدى. ايتالىق, ۇلتتىق تەستىلەۋ ورتالىعىنىڭ سايتىندا ءار ءپان بويىنشا دايىندىق تەستىلەرىنىڭ ءبىر-ءبىرىن قايتالامايتىن 70 نۇسقاسى تەگىن ورنالاستىرىلدى. سونداي-اق بيىلعى مەكتەپ تۇلەكتەرىنىڭ قاشىقتان وقىتۋعا بايلانىستى مەملەكەتتىك ءبىتىرۋ ەمتيحاندارىنان بوساتىلعانى ۇبت-عا كوبىرەك كوڭىل بولۋگە جاعداي جاسادى. ءارى تالاپكەرلەرگە بيىل العاش رەت ۇبت وتكىزۋ پۋنكتىندە بەرىلەتىن قاراپايىم كالكۋلياتوردى قولدانۋعا رۇقسات بەرىلدى. تەستىلەۋ ۋاقىتىنىڭ بىلتىرعىدان تاعى 10 مينۋتقا ۇزارتىلۋى تەستىلەۋ جۇمىسىن تياناقتاۋعا مۇمكىندىك بەرەتىنى ءسوزسىز.