بۇل تۋرالى وبلىستىق پوليتسيا دەپارتامەنتى حابارلاما تاراتتى. وندا جول قاۋىپسىزدىگىن قامتاماسىز ەتۋ ماقساتىندا قالا ورتالىعىندا ورناتىلعان ستاتسيونارلى جىلدامدىق ولشەگىش قۇرىلعىلارى 11 ماۋسىم 20:00 ساعاتتان باستاپ جۇمىس ىستەيتىنى ايتىلعان, - دەپ حابارلايدى Egemen.kz.
بۇگىننەن باستاپ ن.نازارباەۆ داڭعىلىنىڭ زاۆودسكايا كوشەسىمەن قيىلىساتىن تۇسىندا, تاۋەلسىزدىك داڭعىلى بويىنداعى ع.مۇراتباەۆ كوشەسىنەن كەلەتىن كوپىر استىندا, وسى داڭعىلداعى اراي شاعىن اۋدانى №2 ءۇي ماڭىندا, ياسساۋي مەن ع.مۇسىرەپوۆ كوشەلەرى قيىلىسىندا جانە بەيبارىس سۇلتان كوشەسىندەگى №9 كوپ قاباتتى ءۇي جانىندا ورناتىلعان قۇرىلعىلار ىسكە قوسىلادى. ولاردىڭ الدىنا ەسكەرتۋ بەلگىلەرى قويىلدى. قالعان 8 قۇرىلعى كەزەڭ-كەزەڭىمەن ىسكە قوسىلادى.
دەپارتامەنت وسىعان بايلانىستى جۇرگىزۋشىلەردەن جول ءجۇرۋ ەرەجەلەرىن بۇزباۋدى, جىلدامدىق رەجيمىن ساقتاۋدى جانە ەسكەرتۋ بەلگىلەرىنە نازار اۋدارۋدى سۇرايدى.
قىزىلوردا وبلىسى