كەنتاۋ قالاسى قوتىر بۇلاق ەلدى مەكەنىندە سالىنىپ جاتقان كۇن ساۋلەسىنەن قۋات الاتىن ەلەكتروستانتسيا قۇرىلىسى جىل سوڭىنا دەيىن اياقتالادى. "Hevel Kazahstan" جسش جۇزەگە اسىرىپ جاتقان جوبانىڭ قۇنى –15,9 ملرد تەڭگە. سونداي-اق, كەنتاۋدا پوليەتيلەندى قۇبىر, رادياتور شىعارۋ تسەحتارى جانە "تەمىر-بەتون بۇيىمدارىن ءوندىرۋ زاۋىتى" بيىل ىسكە قوسىلادى, - دەپ حابارلادى Egemen.kz.
تۇركىستان وبلىسىنىڭ اكىمى ومىرزاق شوكەەۆتىڭ توراعالىعىمەن وتكەن اپتالىق ماجىلىستە اتقارىلعان جۇمىستار جايلى بايانداعان كەنتاۋ قالاسىنىڭ اكىمى داۋرەن ماحاجانوۆ وسىنداي دەرەكتەردى كەلتىردى. "بيىل "اۋىل – ەل بەسىگى" باعدارلاماسى اياسىندا شاعا جانە وراڭعاي اۋىلدارىندا ءبىر مەكتەپ كۇردەلى جوندەۋدەن ءوتتى. 36 جول جوندەلىپ, جاياۋ جۇرگىنشى جولدارى سالىندى, كوشەلەر جارىقتاندىرىلۋدا. "جۇمىسپەن قامتۋدىڭ جول كارتاسى" باعدارلاماسىمەن 1 مەكتەپ كۇردەلى, 35 مەكتەپ اعىمداعى جوندەۋدەن ءوتتى. كوشەلەر جوندەلىپ, ساياباقتار اباتتاندىرىلدى. كوپىر جانە جاياۋ جۇرگىنشى جولدار جوندەلۋدە. اتالعان باعدارلاما اياسىندا 300-دەن استام جۇمىس ورنىن اشۋ جوسپارلانعان", – دەدى كەنتاۋ قالاسىنىڭ اكىمى.
وبلىس اكىمى كەزىندە ءوندىرىسى وركەندەگەن ءوڭىر بولعان 65 جىلدىق تاريحى بار كەنتاۋ قالاسىن تۇركىستانمەن قاتار دامىتۋدى مىقتاپ قولعا الۋدى تاپسىردى. قالاعا قاراستى اۋىلدىق وكرۋگ حالقىنىڭ الەۋمەتتىك, قۇرىلىس, ينفراقۇرىلىمدىق مۇڭ-مۇقتاجدارى مەن وزەكتى ماسەلەلەرىن دەر كەزىندە شەشۋدى قالا اكىمىنە جۇكتەدى. سونداي-اق اۋىلشارۋاشىلىعى, كاسىپكەرلىك جانە ءوندىرىستى دامىتىپ, يننوۆاتسيالىق جوبالارعا باسىمدىق بەرۋدى مىندەتتەدى.
تۇركىستان وبلىسى