توتەنشە جاعداي كەزىندەگى شەكتەۋلەر ءوڭىردىڭ, ونىڭ ىشىندە اۋدانداردىڭ ءوز مۇمكىندىكتەرىنىڭ قاي دەڭگەيدە ەكەنىن ايقىنداي ءتۇستى. مىسالى, تۇركىستان وبلىسى سارىاعاش اۋدانىنا بۇرىندارى وزگە دە وبلىستاردان جۇمىرتقا جەتكىزىلەتىن.
ال كارانتين كەزىندە الىس-بەرىس توقتاعان سوڭ اۋدانداعى جۇمىرتقا شىعاراتىن فابريكاعا سۇرانىس ارتقان. تاۋلىگىنە 220 مىڭ جۇمىرتقا وندىرىلەتىن فابريكا ءونىمى بۇگىندە اۋدانداعى بازارلار مەن ساۋدا ورىندارىن تولىق قامتىپ وتىر.
قۇس اسىرايتىن كاسىپورىندا 212 مىڭ تاۋىق بار. جۇمىرتقانىڭ ورتاشا باساسى 25-28 تەڭگە ارالىعىندا ساۋدالانادى. ەۋروپا تەحنولوگياسى ۇلگىسىندە جۇمىس ىستەيتىن ءوندىرىس ورنىنىڭ نەگىزگى بولىگى اۆتوماتتاندىرىلعان. جەرگىلىكتى 50 ازامات تۇراقتى جۇمىسپەن قامتىلعان. كاسىپورىن باسشىلارى فابريكانى كەڭەيتىپ, 2 تسەح قوسۋدى جوسپارلاپ وتىر. جەم قويماسى سالىنۋدا. ءبىر جىلدا 5 مىڭ توننا بيداي جەيتىن قۇستارعا جەم جەتكىزۋ قيىن ەكەن. جەم قويماسى دايىن بولعان سوڭ, بالاپان باعاتىن ورىن سالىنباق.
تۇركىستان وبلىسى