ناۋرىزدىڭ باسىندا قمدب توراعاسى, باس ءمۇفتي ناۋرىزباي قاجى تاعان ۇلى ەلدەگى توتەنشە جاعداي تالابىن ەسكەرە وتىرىپ, ءمۇفتيات تاراپىنان جۇرگىزىلىپ كەلگەن دارىستەردى ونلاين رەجيمگە كوشىرۋ جايلى تاپسىرما بەرگەن بولاتىن. سوعان ساي ءدىني باسقارما جانىنداعى «حيكمەت» ستۋدياسى توتەنشە جاعداي كەزىندە ەلگە بەلگىلى يمام-ۇستازداردىڭ ءدارىسىن ونلاين تاراتۋدى باستاپ كەتتى, دەپ حابارلادى قمدب ءباسپاسوز قىزمەتى.
باس ءمۇفتي ناۋرىزباي قاجى تاعان ۇلى توتەنشە جاعداي كەزىندە جۇما ناسيحاتىن كورەرمەنگە تىكەلەي ەفيردە جەتكىزدى. ودان بولەك «يسلام ادەبى», «قۇرانداعى قيسسالار», «پايعامبارلار تاريحى», «يسلام تاريحى», «سويلەۋ ادەبى» جانە «40 حاديس دارىستەرى» سىندى كۇندەلىكتى ۋاعىز-ناسيحات LIVE رەجيمىندە ءوتتى. وسى كۇنگە دەيىن ءدىني باسقارماداعى ۇستازداردىڭ تەك youtube جەلىسىندە 80-گە جۋىق ءدارىسى ۇسىنىلدى. باس ءمۇفتيدىڭ ءار اپتا سايىن بولاتىن جۇما ناسيحاتى تىكەلەي ەفيردەن 12 رەت كورسەتىلدى. سونىمەن قاتار قمدب رامازان ايىندا دا ونلاين جوبالاردى توقتاتقان جوق.
كۇن سايىن قمدب-نىڭ ءبولىم باسشىلارى مەن مەشىت يمامدارى «30 كۇنگە 30 سۇحبات» ونلاين سۇحبات جوباسى بويىنشا ۋاعىز-ناسيحات ايتتى. وڭىردەگى وكىلدىكتەردىڭ دە youtube ارنالارىنان 120 ونلاين سۇحبات ءوتتى. ءدىني باسقارمانىڭ muftyat.kz سايتىندا كۇن سايىن رامازان ايىنا قاتىستى ماقالالار مەن سۇحباتتار, جاڭالىقتار جاريالاندى. سونىمەن قاتار ramadan.muftyat.kz سايتى ىسكە قوسىلىپ, بارلىق اقپاراتتار مەن سۇراقتار اتالعان سايتتا جاريالاندى.
ءدىني باسقارمانىڭ youtube جانە Instagram پاراقشالارى ارقىلى 320 ونلاين ءدارىس وتكىزىلدى. ءمuftىyatkz Instagram پاراقشاسى ارقىلى كۇن سايىن «ەركىن اڭگىمە» جوباسى كورەرمەن نازارىنا ۇسىنىلدى. تىكەلەي ەفيرگە ءدىني باسقارمانىڭ ءار ايماقتاعى باس يمامدارى مەن بەلگىلى ۇستازدار ۋاعىز-ناسيحات ايتىپ, جەلى قولدانۋشىلارىنىڭ سۇراعىنا جەدەل تۇردە جاۋاپ بەردى.
باس ءمۇفتي ناۋرىزباي قاجى تاعان ۇلىنىڭ باستاماسى بويىنشا ەلىمىزدىڭ ءار وڭىرىندە يمامدار مەن قاريلاردىڭ اتسالىسۋىمەن ءبىر اي بويى ونلاين قۇران حاتىم وقىلدى. قاسيەتتى قادىر ءتۇنى «مىڭ ايدان دا قايىرلى قادىر ءتۇنى» اتتى ەكى ساعاتتىق ونلاين باعدارلاما ۇيىمداستىرىلدى. تىكەلەي ەفيردە وتكەن جوباعا باس ءمۇفتي ارنايى قاتىسىپ, قۇران حاتىم دۇعاسىن جاسادى.
سونىمەن قاتار ەلگە بەلگىلى ۇستازدار قاسيەتتى قادىر ءتۇنىنىڭ ماڭىزىنا توقتالىپ, تاعىلىمدى سۇحبات ءوربىتتى. ءدىني باسقارما ورازا ايت قارساڭىندا دا ارنايى باعدارلاما ۇسىندى. قمدب توراعاسى ناۋرىزباي قاجى تاعان ۇلى بارشا مۇسىلمان جاماعاتىن ۇلىق مەرەكەمەن قۇتتىقتاپ, يگى تىلەگىن جەتكىزدى. اتالعان جوبا بارىسىندا ەل اعالارى دا ورازا ايتپەن قۇتتىقتاسا, يمام-ۇستازدار وسىناۋ ۇلىق كۇننىڭ قاسيەتى تۋراسىندا اڭگىمە ءوربىتتى.
قايىرىمدىلىق – ءدىني باسقارما جۇمىسىنىڭ ءبىر باعىتى. كارانتين كەزىندە يگى ىستەر ىركىلمەي, جالعاسىن تاپتى. «زەكەت» قورى مۇقتاج جانداردىڭ ءوتىنىشىن ونلاين قابىلدادى. سونىمەن قاتار جەر-جەردە «زەكەت» قورى مەن مەشىتتەردىڭ ۇيىتقى بولۋىمەن اۋىزاشار قورجىندارى ۇيىمداستىرىلدى.
ايتا كەتەيىك, ەلىمىزدە توتەنشە جاعداي اياقتالعانىمەن, ىندەتتىڭ قاۋپى سەيىلگەن جوق. وسىنى ەسكەرگەن قمدب تىكەلەي ەفيردەگى دارىستەردى جالعاستىرىپ جاتىر.