دەنساۋلىق ساقتاۋ ءمينيسترى ەلجان ءبىرتانوۆ ورتالىق كوممۋنيكاتسيالار قىزمەتىندە وتكەن ونلاين بريفينگتە كوروناۆيرۋستىڭ ءوسىم دەڭگەيى جوعارى وڭىرلەردى اتادى.
«اپتانىڭ سوڭعى دەرەكتەرىنە سۇيەنسەك, ءوسىم دەڭگەيى 6 وڭىردە جوعارى. جاقىندا عانا ۆەدومستۆوارالىق كوميسسيانىڭ وتىرىسى ءوتتى. كەيبىر وڭىرلەر بويىنشا ءبىز اقپارات بەرىپ جاتىرمىز. مىسالى ماڭعىستاۋ, باتىس قازاقستان, قىزىلوردا, شىعىس قازاقستان وبلىستارىندا جوعارى ءوسىم بولعان. بىراق قازىر جاعداي تۇراقتالىپ كەلە جاتىر. سول سياقتى نۇر-سۇلتان قالاسىندا دا ءبىراز ءوسىم بولدى. ول ءوسىم قازىر 2 پايىزعا تومەندەدى», دەدى ەلجان ءبىرتانوۆ.
بۇدان سوڭ, مينيستر ءار وڭىردە ەپيدەميولوگيالىق جاعدايعا بايلانىستى ەرەكشە شەكتەۋ شارالارى ەنگىزىلەتىنىن ايتتى.
«وڭىرلەردە شەكتەۋ شارالارىن ەنگىزۋگە باس سانيتارلىق دارىگەرلەردىڭ قۇقىقتارى بار. ارنايى شەكتەۋلەر ءوسىم دەڭگەيى جوعارى اۋداندارعا ەنگىزىلەدى. مىسالى اتىراۋ وبلىسىنىڭ ءبىر عانا تەڭىز كەنىشىندە ءوسىم جوعارى بولىپ, باسقا ەلدى مەكەندەردە جاعداي دۇرىس بولعاننان كەيىن تەك قانا سول اۋدانعا شەكتەۋ شارالارى ەنگىزىلەدى», دەدى ول.