جۋرناليست, زەرتتەۋشى اسقار وماروۆ تاريح عىلىمدارىنىڭ دوكتورى دارحان قىدىرالىنىڭ بۇگىن قازاقپاراتقا بەرگەن سۇحباتىندا اشارشىلىق قۇرباندارىن ەسكە الۋ ءۇشىن ارنايى «الاپات قاسىرەت» كۇنىن بەلگىلەۋ تۋرالى ۇسىنىسىنا پىكىر ءبىلدىردى.
«حح عاسىردىڭ وتىزىنشى جىلدارى قازاق دالاسىندا بولعان اشارشىلىقتىڭ قۇپياسىن اشىپ, وعان ءادىل باعا بەرۋ جونىندە قوعام تالابى جىلدان جىلعا كۇشەيىپ كەلەدى. وسى رەتتە تاريح عىلىمدارىنىڭ دوكتورى, ارىپتەسىمىز دارحان قىدىرالى بۇگىن قازاقپارات اگەنتتىگى ارقىلى جاقسى ءبىر ۇسىنىستى ورتاعا تاستادى. مەن دە ءبىر اۋىز پىكىر بىلدىرسەم دەيمىن»,- دەپ باستادى اسقار وماروۆ.
زەرتتەۋشى دارحان قىدىرالىنىڭ اشارشىلىق جىلدارىن «الاپات قاسىرەت» دەپ اتاۋىن قولدادى.
«بىرىنشىدەن, اشارشىلىق جىلدارىن «الاپات قاسىرەت» كەزەڭى دەپ اتاۋدى قولدايمىن. حالقىمىزدىڭ باسىنان وتكەن سول ناۋبەتتى ءبىز وسى ۋاقىتقا دەيىن بىردە اشارشىلىق, بىردە زۇلمات دەپ ءجۇرمىز. اشارشىلىق ءسوزىنىڭ ءوزى – «گولودوموردىڭ» تىكەلەي اۋدارماسى. ال زۇلمات - كەڭ ۇعىم. مۇنداي اۋقىمداعى ناۋبەت الەم حالقىنىڭ ءبىرازىنىڭ باسىنان وتكەن. اقتابان كۇيدە شۇبىرىپ, سىردان ءوتىپ القاكولگە جەتىپ قۇلاعان قازاقتىڭ تاريحىنداعى اۋىر قاسىرەتتىڭ ءبىرىنىڭ «اقتابان شۇبىرىندى, القاكول سۇلاما» دەگەن اتاۋمەن تاريحتا قالعانى بەلگىلى. مۇنداي اۋىر قاسىرەتتى حالقىمىز جادىنان وشىرە المايدى. سوۆەت بيلىگى تۇسىندا اشارشىلىق جايىندا اۋىز اشۋعا تىيىم سالىنعاندىقتان, وتكەن عاسىرداعى ناۋبەتتىڭ ناقتى اتاۋى بولمادى. بۇل ۇلى تراگەديا بولعاندىقتان ءبىز قازاق دالاسىنداعى سول اشارشىلىق كەزەڭىن «الاپات قاسىرەت» دەپ اتاساق بولادى»,- دەدى اسقار وماروۆ.
ول بۇل قاسىرەتتىڭ رەسمي تۇردە ناقتى باعاسىن الۋى ءۇشىن عالىمدار وسىعان دەيىن جاۋاپسىز كەلگەن سۇراقتاردى زەرتتەۋى كەرەك ەكەنىن ايتادى.
«الاپات قاسىرەتتىڭ بولعانىن مويىندادىق, تاريحى زەرتتەلىپ جاتىر. سەبەبى حالقىمىزدىڭ باسىنا مۇنداي قاسىرەتتىڭ اينالىپ سوققانىن, بولشەۆيكتەردىڭ قانعا بويالعان قىزىل يدەولوگياسىنىڭ قايتا ورالعانىن قالامايمىز! الاپات قاسىرەت قايتالانباسىن! مەنىڭشە بۇل ماسەلەمەن عالىمدار اينالىسۋ قاجەت. كىم كىنالى؟ قانشا ادام قىرىلدى؟ بۇل قولدان جاسالعان زۇلماتىن ساياسي ستاتۋسى قانداي؟ ناقتى جاۋاپسىز سۇراقتار وتە كوپ. سول كەزدە عانا «الاپات قاسىرەت» تاريحي كەزەڭى رەسمي تۇردە ناقتى باعاسىن الا الادى»,- دەپ قورىتىندىلادى ا.وماروۆ.