اعىمداعى جىلى جامبىل وبلىسىنىڭ تالاس اۋدانىندا 77 جوبا جۇزەگە اسادى. بۇل ماقساتقا 5,6 ميلليارد تەڭگەدەن استام قارجى بولىنگەن. سونىمەن قاتار, اۋداندا «Wind Power City» جاۋاپكەرشىلىگى شەكتەۋلى سەرىكتەستىگىنىڭ جەل ەلەكتر ستانتسياسىندا وسى جوبالار اياسىندا 1,8 ميلليارد تەڭگەنىڭ ينۆەستيتسيالارى تارتىلعان. قازىردىڭ وزىندە مۇندا جالپى قۋاتتىلىعى ساعاتىنا 9 مۆت-تى قۇرايتىن 7 جەل گەنەراتورى سالىنعان. ينۆەستورلاردىڭ ايتۋىنشا, ستانتسيا تامىز ايىنىڭ باسىندا جۇمىس ىستەي باستايدى. سونداي-اق, جوبانىڭ ەكىنشى كەزەڭىندە جەل قوزعالتقىشتارىنىڭ سانى 9-عا ارتادى.
تالاس اۋدانىنا ارنايى بارعان جامبىل وبلىسىنىڭ اكىمى بەردىبەك ساپارباەۆ وبلىس بالامالى ەنەرگەتيكا سالاسىندا ايتارلىقتاي الەۋەتكە يە ەكەنىن, ايماقتىڭ كليماتتىق جاعدايلارىن مۇمكىندىگىنشە ءتيىمدى پايدالانۋ قاجەتتىگىن اتاپ ءوتتى. «جاڭارتىلاتىن ەنەرگيا كوزدەرى جوبالارىنىڭ كومەگىمەن كوپتەگەن ەلدىمەكەندەردى ەلەكتر قۋاتىمەن قامتاماسىز ەتىپ قانا قويماي, ەكولوگيامىزدى ساقتاۋعا بولادى», -دەدى بەردىبەك ساپارباەۆ.
سونداي-اق, اۋدان ورتالىعى قاراتاۋ قالاسىنداعى «كوكتال» سۋمەن جابدىقتاۋ جۇيەسىنىڭ, اۋدان ورتالىعىنىڭ ورتالىق قازاندىعىنا سۋ بەرۋ قوسالقى جەلىسىنىڭ جانە جاڭا تازارتۋ قوندىرعىلارىنىڭ قۇرىلىس بارىسىمەن دە تانىستى. جالپى, اۋدان اۋىلدارىن تازا اۋىز سۋمەن قامتاماسىز ەتۋگە 1,1 ميلليارد تەڭگەدەن استام قاراجات بولىنگەن. اۋى سۋ جۇيەسى بيىل قاراتاۋ قالاسى مەن مايتوبە اۋىلىنا جۇرگىزىلەدى. ال, بوستاندىق جانە تامابەك اۋىلدارىنداعى اۋىز سۋ جۇيەسى اعىمداعى جوندەۋدەن وتەتىن بولادى.
جامبىل وبلىسى