“نۇر وتان” حدپ وبلىستىق فيليالى “جاس وتان” جاستار قاناتىنىڭ مۇشەلەرى مەن قالاداعى جوعارى وقۋ ورىندارىنىڭ ستۋدەنت-جاستارى “اۋىلدىڭ گۇلدەنۋى – قازاقستاننىڭ گۇلدەنۋى” اتتى اكتسيا وتكىزۋگە باستاما كوتەردى. باعالى باستامانى وبلىس جاستارى ءبىراۋىزدان قولدادى. مۇنىڭ ءوزى ەلباسى نۇرسۇلتان نازارباەۆتىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا ءمۇمكىندىكتەرى” اتتى بيىلعى جولداۋىندا “جاستار – ءبىزدىڭ بولاشاعىمىزدىڭ نەگىزى”, – دەپ اتاپ وتكەنىندەي, ءۇستىمىزدەگى جىلعى 26 ساۋىردەن 30 تامىزعا دەيىن وتەتىن اكتسيا بارىسىندا جاستار قالانى عانا ەمەس, اۋىلداردى اباتتاندىرادى, كوگالداندىرادى, كورىكتەندىرەدى, وزەن اڭعارلارىن, كول جاعالاۋلارىن, جول بويلارىن قوقىستاردان, تۇرمىستىق قالدىقتاردان تازارتادى. بۇل جۇمىستارعا ورتا مەكتەپتەردىڭ 8-11 سىنىپ جانە كوللەدجدەر مەن ليتسەيلەردىڭ 45 مىڭ وقۋشىسى, ستۋدەنتتەردىڭ قۇرىلىس جانە “جاسىل ەل” وتريادتارىنىڭ 5 مىڭ جاساعى, قالا كاسىپورىندارى مەن اۋدان ورتالىقتارىنداعى 20 مىڭ جۇمىسشى جاستار تارتىلادى. ستۋدەنتتەردىڭ قۇرىلىس جاساقتارى مادەني-الەۋمەتتىك نىسانداردى كۇردەلى جانە اعىمداعى جوندەۋمەن اينالىسادى.
بۇل اكتسيانىڭ باستى ماقساتى – وبلىس جاستارىنىڭ ءوز ەلىنە پايدالى ىستەر اتقارۋىن, سالاماتتى ءومىر سالتىن, ولاردىڭ بويلارىندا وتان-سۇيگىشتىك قاسيەتتەر قالىپتاستىرۋ, ەڭبەككە تاربيەلەۋ.
اكتسيانى وتكىزۋ جونىندەگى وبلىستىق, قالالىق جانە ون ەكى اۋداندىق شتاب قۇرىلىپ, جۇمىس ىستەۋدە. سونداي-اق, ولاردىڭ جۇمىسىن جەرگىلىكتى جەردە ۇيلەستىرىپ وتىراتىن 148 كوماندالىق پۋنكت جانە 300-دەن استام وترياد, 1800 وقۋشى توبى قۇرىلدى. ولار اتقارىلاتىن جۇمىس كولەمىن, ورىندالۋ مەرزىمىن انىقتادى, وتريادتاردىڭ ءتىزىمىن جاسادى. اكتسياعا قاتىسۋشىلار وبلىس بويىنشا جالپى اۋماعى 379,9 گەكتار گۇلزارلار مەن ساياباقتاردى كورىكتەندىرەدى, 781,1 گەكتار وزەن اڭعارلارىن, 775,7 شاقىرىم جول بويىن قوقىستان تازارتادى, 200 مىڭ ءتۇپ كوشەت وتىرعىزادى, 10 940,5 توننا تۇرمىستىق قاتتى قالدىقتاردى تاسىپ شىعارادى دەپ كۇتىلۋدە.
وسى كەزەڭدە 200-دەن استام سپورت الاڭى مەن ستاديون جوندەلىپ, جاڭادان سالىنادى. جاز بويى 381 ەلدى مەكەن, 2314 كوشە اباتتاندىرىلادى. بۇل جۇمىستارعا قازىردىڭ وزىندە وبلىستىق بيۋدجەتتەن 500 ملن. تەڭگە قارجى بولىنگەن. بۇل قارجى كولەمى الدا كوبەيە تۇسپەك. وبلىستىق, قالالىق جانە اۋداندىق شتابتار جۇمىس جاسايتىن نىساندار مەن كوگالداندىرىلاتىن ورىنداردى, تازارتىلاتىن اۋماقتاردى انىقتاۋ ۇدەرىستەرى اياقتالىپ كەلەدى. جاستاردىڭ بىردەن جۇمىسقا كىرىسىپ كەتۋى ءۇشىن قازىردەن باستاپ قام جاسالۋدا. ولار ءبىر ۇلگىدەگى جۇمىس كيىمىمەن, تاماقپەن قامتاماسىز ەتىلەدى, اتقارعان جۇمىس كولەمىنە قاراي ەڭبەكاقى الادى. قازىردىڭ وزىندە “ترانسموستگرۋپپ”,“سترويدەتال” جاۋاپكەرشىلىگى شەكتەۋلى سەرىكتەستىكتەرى, “كومپانيا-ەمشان” زاڭدى تۇلعالار بىرلەستىگى سياقتى ىرگەلى كاسىپورىندار ستۋدەنت-جاستارمەن كەزدەسىپ, ولاردى وزدەرىندە جۇمىس ىستەۋگە قابىلداۋعا ازىرلىگىن بايقاتتى.
سونداي-اق, اكتسيا كەزىندە بەلسەندى جۇمىس ىستەگەن جاستاردى ماراپاتتاۋ ءۇشىن وبلىس اكىمدىگى 50 اۆتوكولىك, 1000 نوۋتبۋك ءبولىپ وتىر. بۇل جاستاردى ەكپىندى ەڭبەك ەتۋگە ىنتالاندىرادى. باعالى باستامانى جۇزەگە اسىرۋ بارىسىندا جاستار ءوز جەرىنە دەگەن سۇيىسپەنشىلىككە تاربيەلەنىپ, وعان قۇرمەتپەن قاراۋعا ۇيرەنەدى, وزگەلەرگە ءوز ىستەرىمەن ونەگە بولادى.
بۇل باستامانى ەلىمىزدە العاش رەت اقتوبە وبلىسىنىڭ جاستارى قولعا الىپ وتىر. ال اقتوبەلىك جاستاردىڭ باعالى باستاماسى ەلىمىزدىڭ تۇكپىر-تۇكپىرىندە قولداۋ تاباتىنىنا سەنىم مول.
ساتىبالدى ءساۋىرباي.
اقتوبە وبلىسى.