قاراعاندى گۇلزارلارىن ساندەۋ ماقساتىندا جاستار اراسىندا ۇيىمداستىرىلعان بايقاۋ ءوز مارەسىنە جەتتى. «ازامات» قوعامدىق بىرلەستىگىنىڭ باستاماسىمەن «ينكليۋزيۆتى ەرىكتىلەر مەكتەبى» جوباسى اياسىندا وتكىزىلگەن «جەڭىس گۇلدەرى» اتتى بايقاۋدىڭ جەڭىمپازدارى انىقتالدى. جاقىن كۇندەرى جاستار قالاداعى باقتارعا وزدەرىنشە كورىك بەرمەك.
ەرەكشە ءبىلىم بەرۋ قاجەتتىلىكتەرى بار بالالاردى الەۋمەتتىك ماڭىزى بار ءىس-ارەكەتكە تارتۋ ماقساتىندا ۇيىمداستىرىلعان بايقاۋ قاتىسۋشىلارى 1 اقپان مەن 15 مامىر ارالىعىندا قالا گۇلزارلارىنىڭ ديزاينىن ۇسىنۋى كەرەك بولاتىن. بايقاۋعا قاراعاندى قالاسىنداعى 22 ءبىلىم بەرۋ ۇيىمى قاتىستى. ونىڭ 19-ى مەكتەپ, ۇشەۋى مەكتەپكە دەيىنگى مەكەمەنىڭ تالىمگەرلەرى. جۇمىستارىن پرەزەنتاتسيا, فوتو, ماكەت جانە بەينەماتەريالدار رەتىندە كورسەتىپ, جوبالارىن تانىستىردى. سونىمەن قاتار تاڭدالعان گۇلدەر اتاۋى, تۇستەرى مەن كومپوزيتسياسىنىڭ تۇتاستىعى, ەرەجەگە سايكەس وسىمدىك تۇقىمدارىن سەبۋ, كۇتۋ, كوشەتتەردى دايىنداۋ تەحنولوگيالارى بويىنشا ۇسىنىستارى دا ەسكەرىلدى.
ۇزدىك دەپ تانىلعاندار حالىقارالىق بالالاردى قورعاۋ كۇنى قارساڭىندا قاراعاندى قالاسىنداعى نۇركەن ءابدىروۆ ەسكەرتكىشىنىڭ جانىندا ءبىر جىلدىق گۇل كوشەتتەرىن وتىرعىزدى.