وسىعان قاتىستى ساراپشىلاردىڭ دا پىكىرى قىرىق قۇبىلا باستادى. كەشەگى پىكىر ۇلتتىق بانكتە دوللاردىڭ ماسساسى كوبەيىپ كەتتى, سۇرانىس جوق دەسە بۇگىنگى پىكىر ودان سايىن سالماقتى. ساراپشىلار مۇناي, شيكىزات باعاسىنان ءمان كەتە باستاعان تۇستا ارزان دوللار ءبىز ءۇشىن قۋانا قوياتىنداي جاعداي ەمەس ەكەنىن ايتىپ جاتىر. سەبەبى ارزان دوللار يمپورت باعاسىن تۇراقتاندىرعانمەن, ارزانداۋىنا اسەر ەتە المايتىنى بەلگىلى بولىپ قالدى.
ۇزاق جىلدار بويى ۇلتتىق بانكتە بىرنەشە توراعانىڭ كەڭەسشىسى بولعان قارجىگەر ءىلياس يساەۆ اقش دوللارىنا اسەر ەتىپ وتىرعان فاكتور رەتىندە گەوساياسي جاعدايلاردى ايتادى. قىتاي مەن اقش اراسى شيەنەلىسىپ بارادى. ودان بولەك اقش-تىڭ ىشكى جاعدايى دا ءماز ەمەس. كوپتەگەن ەلدەر حالىقارالىق ساۋدا اينالىمىندا اقش دوللارىنان باس تارتىپ, ۇلتتىق ۆاليۋتاسىن قولدانا باستادى: ەاەو ەلدەرى دە ءوز ارا ساۋدا اينالىمىندا ۇلتتىق ۆاليۋتالارىنا باسىمدىق بەرۋگە نيەت تانىتىپ ءجۇر. «الداعى جارتى جىلدىقتا دوللارعا سۇرانىسقا سەبەپ بولاتىن فاكتور كورىپ تۇرعان جوقپىن. اقش دوللارى مەن تەڭگە ءدالىزى 1 اقش دوللارى 400-420 تەڭگە دالىزىندە بولادى.بۇل بىزگە ەكى جاقتى اسەر ەتىپ جاتىر. اقش دوللارىمەن باعالانىپ كەلەتىن يمپورت باعاسى قىمباتتامايدى. ال كەرى اسەرى شيكىزات, مۇناي ەكسپورتى ءۇشىن اقش دوللارىن تولەم قۇرالى رەتىندە پايدالانىمىز. مۇناي باعاسىنان قۇن كەتە باستاعان ۋاقىتتا بۇل ءبىز ءۇشىن اسا ءتيىمدى باعا ەمەس» دەيدى ءىلياس يساەۆ.
قازاقستان قور بيرجاسىنداعى تاڭەرتەڭگىلىك ساۋدا-ساتتىق قورىتىندىسى بويىنشا دوللاردىڭ باعاسى شامامەن 6 تەڭگەگە ارزاندادى. بۇل اقپاراتتى كەشكىسىن قازاقستان قور بيرجاسىنىڭ رەسمي سايتى حابارلادى.
2 ماۋسىمدا وتكەن تاڭەرتەڭگىلىك ساۋدا-ساتتىق ناتيجەسىندە امەريكالىق ۆاليۋتا ارزاندادى – ونىڭ باعاسى بىردەن 5,7 تەڭگەگە تومەندەدى.
رەسمي ۆاليۋتا باعامىنا سايكەس, قازىر 1 دوللار 402,7 تەڭگەگە باعالانۋدا. قازاقستان قالالارىنداعى اقشا ايىرباستاۋ نۇكتەلەرى سوڭعى ساۋدا-ساتتىق ناتيجەلەرىنە بايلانىستى شەتەلدىك ۆاليۋتا باعاسىن جاڭارتتى.
الماتىنىڭ اقشا ايىرباستاۋ نۇكتەلەرىندە دوللاردى 402,8-406 تەڭگەدەن ساتىپ الۋعا بولادى. الماتىدا دوللاردىڭ ورتاشا باعاسى 403,9 تەڭگەدەن ساتىلىپ جاتىر.