كوروناۆيرۋس ىندەتىنىڭ تارالۋىنا بايلانىستى ەلىمىزدە ەنگىزىلگەن توتەنشە جاعدايعا وراي جامبىل وبلىسىنداعى ساۋدا ورىندارى, بازارلار ءوز جۇمىسىن توقتاتقان بولاتىن.
اسىرەسە وبلىس ورتالىعى تاراز قالاسىنداعى ساۋدا نۇكتەلەرىنە باقىلاۋ جۇمىستارى كۇشەيتىلدى. بۇل رەتتە ساۋدا ورىندارىنىڭ اكىمشىلىگىنەن بولەك, ءاربىر تۇرعىن قاۋىپسىزدىك شارالارىن ساقتاۋعا مىندەتتى. جۋىردا عانا تاراز قالاسىنداعى جازعى قوعامدىق تاماقتانۋ ورىندارى, شاشتاراز, سۇلۋلىق سالونى, كەيبىر ساۋدا نۇكتەلەرى سياقتى بىرقاتار نىساندارعا جۇمىسىن باستاۋعا رۇقسات بەرىلگەن ەدى. الايدا, باستى تالاپ – كارانتين رەجيمىن قاتاڭ ساقتاۋ, تۇرعىنداردىڭ قاۋىپسىزدىگىن مەيلىنشە قامتاماسىز ەتۋ ەدى. بىراق, بىرقاتار تەكسەرۋ جۇمىستارىنىڭ ناتيجەسىندە كوپتەگەن نىسانداردا قاۋىپسىزدىك ەرەجەلەرى ساقتالماعان.
وسى ورايدا, قالاداعى باۋىرجان مومىش ۇلى كوشەسىنىڭ بويىندا ورنالاسقان ساۋدا ورىندارىنا رەيد جۇمىستارى جۇرگىزىلىپ, زەردەلەۋ جۇمىستارىنىڭ ناتيجەسىندە كوپتەگەن جاعدايدا كارانتين تالاپتارى ساقتالماعان بولىپ شىقتى. كارانتين تالاپتارىن ساقتاماعان ازاماتتارعا قالالىق اكىمدىك تاراپىنان حاتتاما تولتىرىلىپ, زاڭ اياسىندا شارا قولدانىلعان. سول سياقتى, تارازداعى «مىڭبۇلاق», «ديانا», «ايرىلماس», «زارينا» جانە «گاۋحار» ساۋدا ورتالىقتارىنا دا رەيد جۇمىستارى جۇرگىزىلگەن ەدى. مۇندا دا كارانتين تالاپتارىن ساقتاماعان ازاماتتار انىقتالعان. ياعني, ساۋدا جاساۋدا نەگىزگى تالاپتار ساقتالماعان. ەندى بۇگىندە وڭىردەگى بلوك-بەكەتتەر الىنىپ, بىرقاتار ساۋدا نۇكتەلەرىنە جۇمىس ىستەۋگە رۇقسات بەرىلدى. سونىمەن قاتار, بۇگىنگى تاڭدا وبلىستاعى ەڭ ۇلكەن ساۋدا نىسانى بولىپ سانالاتىن تاراز قالاسىنداعى «اۋىل – بەرەكە» بازارىنداعى جەمىس-كوكونىستەردىڭ, قۇرىلىس ماتەريالدارى مەن اۋىلشارۋاشىلىق ونىمدەرىنىڭ كوتەرمە ساۋدا سەكتورى دا جۇمىس ىستەپ تۇر. دەگەنمەن, رۇقسات بەرىلگەن ساۋدا نۇكتەلەرىندە دە كارانتين تالاپتارى, جالپى قاۋىپسىزدىك ماسەلەسى تولىق ساقتالماي وتىر. جامبىل وبلىسىنىڭ اكىمى بەردىبەك ساپارباەۆ اتالعان بازار اۋماعىندا بولىپ, بىرقاتار ماڭىزدى ماسەلەلەرگە توقتالعان بولاتىن. وسى ۋاقىتقا دەيىن اكىم بازار اۋماعىن رەتكە كەلتىرۋدى, ساۋدا ورىندارىن جاقسارتۋدى, ىڭعايلى جاعداي جاساۋ ماسەلەلەرىنە نازار اۋدارۋدى تاپسىرعانىمەن, كۇنى بۇگىنگە دەيىن بۇل نۇسقاۋلار تولىعىمەن ورىندالماعان. سونداي-اق, بەردىبەك ساپارباەۆ بازاردا جايلى ساۋدا پاۆيلوندارىنىڭ جوقتىعىن, ءتىپتى كەيبىر ساتۋشىلاردىڭ جەردە ساۋدا جاساپ وتىرعانىن, وعان قوسا كولىك قۇرالدارىنىڭ بازارداعى رەتسىز قوزعالىسى ءورت قاۋپىن تۋدىراتىنىن ايتىپ, بازار جۇمىسىن سىنعا العان ەدى. «سانيتارلىق-ەپيدەميولوگيالىق تالاپتاردىڭ ساقتالۋى دا ويداعىداي ەمەس. ساتۋشىلار دا, ساتىپ الۋشىلار دا بەتپەردە كيمەيدى. ادامدار اراسىنداعى الەۋمەتتىك اراقاشىقتىق ساقتالمايتىنىن كورىپ وتىرمىز. نارىق قىزمەتكەرلەرى ازىق-ت ۇلىك ەمەس سەكتورداعى جۇمىستى قايتا باستاۋدى سۇراۋدا. الايدا, بازار اكىمشىلىگى قاجەتتى سانيتارلىق تالاپتاردىڭ ساقتالۋىن قامتاماسىز ەتە الماي وتىر. ءتيىستى شارالار قابىلداڭىزدار, سودان كەيىن عانا بازاردى تولىق اشۋ تۋرالى ايتۋعا بولادى», دەگەن بەردىبەك ساپارباەۆ بازار باسشىلىعىنا ءبىراز ەسكەرتۋ جاسادى.
بۇل تەك «اۋىل – بەرەكە» بازارىنا عانا قاتىستى سىن ەمەس. بۇدان بولەك, تاراز قالاسىندا «ورتالىق» جانە «اتاكەنت» بازارلارى دا جۇمىس ىستەيدى. الايدا, بۇلاردىڭ دا كوپشىلىگىندە مىندەتتى سانيتارلىق, كارانتيندىك جانە ورتكە قارسى تالاپتار ورىندالماعان. ەگەر ءورت بولا قالعان جاعدايدا, وقيعا ورنىنا ورتكە قارسى قىزمەت تەحنيكاسىنىڭ جەتۋى دە باستى ماسەلە. بۇل ورايدا جامبىل وبلىستىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆ بازارلاردىڭ بىردە-ءبىرى ارنايى بەكىتىلگەن تالاپتارعا سايكەس كەلمەيتىنىن ايتادى. «ادامدار ماسكاسىز ءجۇر. سانيتارلىق تازالاعىشتار جوق. اراقاشىقتىق ساقتالمايدى», دەيدى بەرىك جارقىنبەكوۆ.
بازار حالىق كوپ شوعىرلاناتىن ورىن بولعاندىقتان, مۇندا قاۋىپسىزدىك شارالارىنىڭ قاتاڭ ساقتالۋى ماڭىزدى. بۇگىندە وڭىردە بلوك-بەكەتتەردىڭ الىنۋى, كەيبىر نىسانداردىڭ جۇمىسىن باستاۋىنا رۇقسات بەرىلۋى ىندەتتىڭ تولىعىمەن جويىلعانىن بىلدىرمەيدى. سوندىقتان دا جەرگىلىكتى حالىقتىڭ قاۋىپسىزدىگى ءۇشىن كاراتيتن تالاپتارىنىڭ اسىرەسە بازارلاردا تولىعىمەن ساقتالعانى دۇرىس.
جامبىل وبلىسى