20 ماۋسىم مەن 5 شىلدە ارالىعىندا ەلىمىزدە ۇبت وتكىزىلەدى. بيىلعى جىلى تەستىلەۋگە 132 مىڭعا جۋىق ادام قاتىسادى. بۇل تۋرالى ۇكىمەت وتىرىسىندا ءبىلىم جانە عىلىم ءمينيسترى اسحات ايماعامبەتوۆ ايتتى.
«ۇبت بيىل 17-رەت وتكىزىلەتىن بولادى. وسى كەزەڭ ارالىعىندا تەستىلەۋگە 2 ميلليونعا جۋىق ادام قاتىسىپ شىقتى. 2019 جىلدان باستاپ ۇبت جىلىنا 4 رەت وتكىزىلۋدە: قاڭتار, ناۋرىز, تامىز ايلارىندا وتكىزىلۋدە. بيىل ۇبت فورماتى وزگەرگەن جوق. بارلىعى 5 ءپان, 3 مىندەتتى جانە 2 بەيىندى ءپان بويىنشا تەستىلەۋ قاعاز جۇزىندە وتكىزىلەدى. بارلىق تەست تاپسىرمالارىنىڭ سانى - 120, ماكسيمالدى بالل - 140. ۇبت-عا قاتىسۋ ءۇشىن وتىنىشتەردى قابىلداۋ 15 ساۋىردەن 10 مامىرعا دەيىن جۇرگىزىلدى, - دەدى مينيستر
اسحات ايماعامبەتوۆ وسى جىلى وتىنىشتەردى قابىلداۋ العاش رەت ونلاين فورماتتا وتكەنىن اتاپ ءوتتى. تەك ينتەرنەتى جوق وڭىرلەردىڭ تۇلەكتەرى ءۇشىن ءداستۇرلى فورماتتا قۇجاتتار تاپسىرۋ مۇمكىندىگى بەرىلدى.
«جالپى بيىل مەكتەپ تۇلەكتەرىنەن تەستىلەۋگە قاتىسۋ ءۇشىن 111 109 نەمەسە 82 پايىز ءوتىنىش تاپسىرىلدى. بۇل وتكەن جىلمەن سالىستىرعاندا 11 پايىزعا نەمەسە 15 مىڭعا جۋىق ادامعا جوعارى. سونداي-اق, الدىڭعى جىلداردا مەكتەپ بىتىرگەن تۇلەكتەردى قوسقاندا بارلىعى بيىل 131 755 ادام تەست تاپسىراتىن بولادى», - دەدى اسحات ايماعامبەتوۆ.
ءمينيستردىڭ ايتۋىنشا, الدىڭعى جىلدارى مەكتەپ بىتىرگەن تۇلەكتەردى قوسقاندا, بيىل بارلىعى 131 755 ادام تەست تاپسىرادى. ۇبت بەكىتىلگەن مەرزىمدە, ياعني, 20 ماۋسىمنان 5 شىلدەگە دەيىن سانيتارلىق تالاپتاردى قاتاڭ تۇردە ساقتاۋ ارقىلى 161 ۇبت پۋنكتىندە وتكىزىلەدى.