سولتۇستىك قازاقستاندا ىندەتكە شالدىققاندار سانى 59 ادامعا جەتتى. وسى ۋاقىتقا دەيىن جامان ىندەتپەن كۇرەستە الدىڭعى ورىندا كەلە جاتقان ءوڭىر بۇگىنگى تاڭدا بۇرىنعى قارقىنىنان ايرىلىپ قالدى. ونىڭ باستى سەبەبى رەسەي فەدەراتسياسىمەن ەكى اراداعى شەكارانىڭ اشىلعاندىعى بولىپ وتىر.
قازىر كورشى ەلدەن كۇنىنە 350 ادام وتەدى. سولاردىڭ اراسىنان ىندەتكە ۇشىراعاندار كوپتەپ شىعۋدا. كەشە عانا رەسەيدەن كەلگەن بەس قازاقستان ازاماتىنىڭ بويىنان جامان ىندەت تابىلدى. ولاردىڭ ۇشەۋى ومبى وبلىسىنىڭ اۋماعىندا ۆاحتالىق ادىسپەن جۇمىس ىستەپ جۇرگەن قازاقستان ازاماتتارى ەكەن. ال تاعى ءبىر ازامات قازاقستان اۋماعىنا رەسەي فەدەراتسياسىنىڭ رۋبتسوۆسك قالاسىنان كەلىپتى. ونىمەن جاقىن ارالاسقان 1988 جىلى تۋعان قازاقستان ازاماتىنىڭ بويىنان دا كورونوۆيرۋس تابىلىپ وتىر.
سىرتتاي قاراعاندا بۇلاردىڭ بويىنان پاندەميانىڭ ەش بەلگىسى بايقالمايدى, ال تەكسەرە كەلگەندەگى العاشقى قورىتىندى ولاردا ۆيرۋستىڭ بارىن انىقتاعان. قازىر ءبارى دە كارانتيندىك ستاتسيونارعا جاتقىزىلدى. ەگەر ءجىتى جۇرگىزىلەتىن ساراپ العاشقى قورىتىندىنى راستايتىن بولسا ولار قالالىق اۋرۋحانانىڭ ينفەكتسيا بولىمىنە جاتقىزىلادى.
قازىر قالا كوشەلەلەرىندە حالىق ەركىن جۇرە باستادى. بەتپەردەنى تەك دۇكەندەرگە نەمەسە باسقا دا عيماراتتارعا كىرگەندە عانا تاعادى. نە سەبەپتى ەكەنىن كىم ءبىلسىن, ىستىق كۇندەرى جويىلادى دەگەن ۆيرۋس تا ازايماي وتىر. حالىقتىڭ دا جاماندىققا ەتى ۇيرەنىپ كەلە جاتقانى قاۋىپ ويلاتادى. ساقتىق شارالارىن ەستەن شىعارماۋدىڭ قاجەتىلىگى ارتا تۇسكەن.