بالالاردى قورعاۋدىڭ حالىقارالىق كۇنى قارساڭىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ «جان شۋاعى» پسيحولوگيالىق ورتالىعىنىڭ ماماندارى الماتى قالاسىنداعى بالاباقشا تاربيەلەنۋشىلەرىمەن پسيحولوگيالىق ترەنينگ پەن ۆەبينار وتكىزدى.
ونلاين فورماتتا ۇيىمداستىرىلعان شارانى قىزدار ۋنيۆەرسيتەتىنىڭ الەۋمەتتىك دامۋ جونىندەگى پرورەكتورى جاڭاگۇل سۇلتانوۆا اشىپ, بۇل اتاۋلى داتا ەلدىڭ بولاشاعى سانالاتىن وسكەلەڭ ۇرپاقتىڭ دەنساۋلىعى مەن قاۋىپسىزدىگىنە اعا بۋىن جاۋاپتى ەكەنىن ەسكە سالاتىن كۇن ەكەنىن اتاپ ءوتتى.
– قۇرمەتتى دوستار! بارشاڭىزدى بۇگىنگى بالالاردى قورعاۋدىڭ حالىقارالىق كۇنىمەن قۇتتىقتايمىن! الاشتىڭ ايتۋلى اقىنى ماعجان جۇماباەۆ «ارىستانداي ايباتتى, جولبارىستاي قايراتتى, مەن جاستارعا سەنەمىن!» دەپ كەيىنگى تولقىنعا ۇلكەن ءۇمىت ارتقان. راسىندا دا مەملەكەتتىڭ كەلەشەكتە قانداي بولماعى جاڭا بۋىنعا تىكەلەي بايلانىستى ەكەندىگى راس. ولاردىڭ دەنى ساۋ, ءبىلىمدى دە بىلىكتى, زياتكەرلىك الەۋەتى جوعارى بولۋى ۇلكەن ماڭىزعا يە. قازاقستانداعى مەكتەپكە دەيىنگى ءبىلىم بەرۋ مەكەمەلەرى مەن وقۋ ورىندارى وسى تاراپتا جۇيەلى جۇمىس ىستەپ جاتىر. اتاۋلى كۇنگە وراي ۇيىمداستىرىلىپ وتىرعان بۇگىنگى پسيحولوگيالىق شارا دا وسىنىڭ ءبىر كورىنىسى ىسپەتتەس, – دەدى جاڭاگۇل سۇلتانوۆا.
ۆەبينار بارىسىندا «جان شۋاعى» پسيحولوگيالىق ورتالىعىنىڭ ماماندارى «دامەلى» بالاباقشاسىنىڭ قىزمەتكەرلەرى, تاربيەلەنۋشىلەرى مەن ولاردىڭ اتا-انالارىنا «بالالاردىڭ بوس ۋاقىتىن ءتيىمدى ۇيىمداستىرۋ شارالارى» تاقىرىبىندا ءتۇرلى جاتتىعۋلار جاساپ, اقىل-كەڭەستەرىمەن ءبولىستى.
– ماسەلەن, «مەن كۇلگەندى ۇناتامىن» ويىن جاتتىعۋى بۇلدىرشىندەردىڭ قايىرىمدى, كوڭىل-كۇيىنىڭ جاقسى بولۋىنا سەپتەسەدى. اتالعان ويىن ءتۇرىن كۇنىنە بىرنەشە رەت قايتالاپ كوڭىل-كۇيدى كوتەرۋگە بولادى. كۇلكى – مىنەز-ق ۇلىقتىڭ سيقىرلى كىلتى. ادام كۇلگەندە ءوز كوڭىلىنىڭ كۇيىن تابادى, دەنساۋلىعىن جاقسارتادى جانە اينالاسىنداعى ادامداردىڭ احۋالىنا دا اسەر ەتەدى, – دەيدى پسيحولوگيالىق ورتالىق ديرەكتورى كۇلماش ەلشىباەۆا.
ەكى ساعاتقا جۋىق ۋاقىتقا سوزىلعان شارا سوڭىندا اتالعان بالاباقشا ديرەكتورى گۇلميرا ساحىباەۆا ءسوز الىپ, وسىنداي يگىلىكتى ىسكە مۇرىندىق بولعانى ءۇشىن قازاق ۇلتتىق قىزدار پەداگوگيكالىق ۋنيۆەرسيتەتىنىڭ ۇجىمىنا العىسىن ءبىلدىردى. سونىمەن قاتار ول الداعى ۋاقىتتا دا وقۋ ورنىنىڭ پسيحولوگ ماماندارىمەن بىرلەسىپ وسى تاقىلەتتەس ماڭىزدى جيىنداردى تۇراقتى وتكىزىپ تۇرۋعا نيەتتى ەكەندىگىن جەتكىزدى.
ايتا كەتەيىك, اتاۋلى داتانىڭ 1925 جىلى شۆەيتساريانىڭ جەنەۆا قالاسىندا وتكەن بالالاردىڭ دەنساۋلىعى مەن بەيبىت ءومىر ءسۇرۋى تۋرالى الەمدىك كونفەرەنتسيادا نەگىزى قالانعان. حالىقارالىق بالالار كۇنىنىڭ ءوزىنىڭ بايراعى بار. ءوسىمدى, ۇيلەسىمدىكتى, بالعىندىق پەن شۇرايلىلىقتى بىلدىرەتىن جاسىل ءتۇستى فوندا كورسەتىلگەن جەردىڭ اينالاسىنا قىزىل, سارى, كوك جانە اق ستيليزاتسيالانعان مۇسىندەر ورنالاستىرىلعان. ادامداردىڭ بۇل ءپىشىنى الۋاندىلىق پەن توزىمدىلىكتى بىلدىرەدى. ورتاعا ورنالاستىرىلعان جەردىڭ بەلگىسى – ورتاق ءۇيىمىزدىڭ سيمۆولى.