ورالدا ءۇش ادام جاساندى تىنىس الۋ اپپاراتىنا قوسىلعان

باتىس قازاقستان وبلىستىق دەنساۋلىق ساقتاۋ باسقارماسىنىڭ باسشىسى بولاتبەك كايۋپوۆ جۋرناليستەرگە ورال قالاسىندا كوروناۆيرۋستان قايتىس بولعان ازامات تۋرالى تولىعىراق ايتىپ بەردى. بولاتبەك امانگەلدى ۇلىنىڭ ايتۋىنشا, ناۋقاس اۋرۋى تۋرالى دارىگەرلەرگە دەر كەزىندە حابارلاماي, اسقىندىرىپ العان.

- ناۋقاس 10 مامىردان باستاپ مەديتسينا قىزمەتكەرلەرىنىڭ باقىلاۋىندا ءۇي كارانتينىندە بولدى. ياعني كۇن سايىن ارنايى بەكىتىلگەن ەمحانا دارىگەرى وعان حابارلاسىپ, جالپى جاعدايىن ءبىلىپ, دەنە قىزۋىن جازىپ وتىردى. 10 مامىردان باستاپ ناۋقاستىڭ تاماعى قىشىپ, السىزدىك بايقالعان. تابەتى تومەندەگەن. بىراق ول وسى بەلگىلەردى دارىگەرگە ايتپاعان, مەديتسينالىق كومەككە جۇگىنبەگەن. كۇن سايىن قوڭىراۋ شالعان مەديتسينا قىزمەتكەرلەرىنە جاعدايىن ايتپاعان. وسىلايشا 10 كۇن ۋاقىت جوعالتقان. تەك 19 مامىر كۇنى ءجۇرىپ-تۇرعاندا اۋا جەتپەي ەنتىگىپ, توسەكتەن تۇرا المايتىنداي السىزدىك پايدا بولعان كەزدە عانا جەدەل-جاردەم شاقىرتقان, - دەيدى دارىگەر.

بۇگىن ورال قالاسىنا كىرەر جولدارداعى بلوك-بەكەتتەر الىندى. حالىقتىڭ ءارى-بەرى ءجۇرىسى كوبەيەتىنى انىق. سوندىقتان ماماندار ساقتىق شارالارىن ساقتاپ, جەكە مەديتسينالىق قورعانىش قۇرالدارىن تاستاماي جۇرۋگە شاقىرۋدا.

قازىرگى ۋاقىتتا باتىس قازاقستان وبلىستىق جۇقپالى اۋرۋلار اۋرۋحاناسىندا ءۇش ادام اۋىر جاعدايدا وكپەنى جاساندى جەلدەتۋ اپپاراتىنا جالعانعان. بۇل ناۋقاستىڭ ءبىرى – 79 جاستا, ءبىرى – 68-دە, ال ەندى ءبىرى جاس بالا ەكەن.

جالپى ءوڭىر بويىنشا ينفەكتسيالىق ستاتسيونارعا 665 پاتسيەنت كەلىپ تۇسكەن, ونىڭ 30-ى – بالالار.

- بۇگىنگى مالىمەت بويىنشا ستاتسيونارلىق ەمدەلۋدە – 300 پاتسيەنت جاتىر. ونىڭ ىشىندە 12 بالا بار. ناۋقاستاردىڭ 135-ءى – كوروناۆيرۋستىڭ سيمپتومسىز تۇرىمەن اۋىرعان. 104 ناۋقاستا اۋرۋ جەڭىل وتۋدە. 57 ناۋقاستىڭ جاعدايى ورتاشا, ال تورتەۋىنىڭ جاعدايى اۋىر, - دەيدى بولاتبەك كايۋپوۆ.

باتىس قازاقستان