حقو قىزمەتكەرى ەكى بىردەي جىگىتتىڭ ءومىرىن قۇتقارىپ قالدى

«ەرجان ساعات 12-00-دە باستالاتىن ەكىنشى اۋىسىمداعى جۇمىسىنا كەلە جاتىپ,  جولداعى سۋ قۇبىرى قۇدىعىنان ىڭىرسىپ جاتقان داۋىستاردى ەستيدى. جاقىن كەلىپ قاراسا, ىشىندە شىعۋعا دارمەنسىز, ەسىنەن ايىرىلعالى جاتقان ەكى جىگىتتى كورەدى. سول ۋاقىتتا جولدان ءوتىپ بارا جاتقان باسقا ادامدار دا جينالىپ قالادى. ەرجان ابدىرازاقوۆ ويلانىپ جاتپاستان قۇدىققا تۇسەدى. وعان امانجول جانسەيىتوۆ دەگەن ازامات كومەكتەسەدى. ەكەۋلەپ ءجۇرىپ ەس-ءتۇسسىز جاتقان ەكى ازاماتتى قۇدىقتان شىعارادى. جەدەل-جاردەم كەلىپ, العاشقى دارىگەرلىك كومەك كورسەتىپ, ءارى قاراي اۋرۋحاناعا الىپ كەتەدى. جىگىتتەر تەزىرەك ايىعىپ, امان-ەسەن قاتارعا قوسىلسىن!

ال, ءبىز ەرجان سياقتى ءوز قىزمەتكەرلەرىمىزبەن ماقتانامىز! ول ءبىزدىڭ ۇزدىك قىزمەتكەرلەرىمىزدىڭ ءبىرى. ءۇش بالانىڭ اكەسى. بەيبىت كۇننىڭ باتىرلارى دەگەن وسى!», دەيدى «ازاماتتارعا ارنالعان ۇكىمەت» مك الماتى فيليالىنىڭ ديرەكتورى دانيار قىرىقباەۆ.

كەيىن بەلگىلى بولعانداي, «ازاماتتارعا ارنالعان ۇكىمەت» مك الماتى فيليالىنىڭ قوعاممەن بايلانىس جونىندەگى مەنەدجەرى جاڭىل اپەتوۆانىڭ ايتۋىنشا, «الماتى سۋ مەملەكەتتىك مەكەمەسىنىڭ جۇمىسشىلارى سابدەنوۆ پەن بەگاليەۆ كوشەسىنىڭ قيىلىسىنداعى كارىز قۇدىعىنا تۇسكەن. ول جەردە گاز قۇبىرى بولعان ەكەن. گازدان ۋلانىپ, ەكەۋى دە ەستەن تانعان. حقو قىزمەتكەرى ەرجان ادبىرازاقوۆ پەن جولاي ءوتىپ بارا جاتقان تاعى ءبىر ادام قۇدىققا ءتۇسىپ, ەكەۋىن الىپ شىققان.

جەدەل-جاردەم جەتكەنشە, ەكى جۇمىسشىنىڭ ەسىن جيىپ ۇلگەرگەن. ءوز كەزەگىندە «الماتى سۋ» مكك قوعاممەن بايلانىس ءبولىمىنىڭ جەتەكشىسى اقبوتا جىلىسوۆا وكىلدەرى قۇدىققا قۇلاعان ەكى ادامنىڭ وزدەرىنىڭ جۇمىسشىلارى ەكەنىن راستاپ: «كارىز قۇدىعىنان قۇتقارىلعاندار – ءبىزدىڭ جۇمىسشىلار. ءوتىم قىزمەتى دەپارتامەنتىنىڭ باقىلاۋشىلارى. جاقىن ماڭداعى دۇكەندەردىڭ ەسەپتەۋىش قۇرالدارىنىڭ دۇرىس جۇمىسىن تەكسەرىپ جۇرگەن. قۇدىققا نە ءۇشىن تۇسكەندەرى بەلگىسىز. ەكى قىزمەتكەر دە قازىر اۋرۋحانادا, جاعدايلارى جاقسى ەمەس, ورتاشا. سۋ مەن كارىز قۇبىرلارىنىڭ قۇدىعى بىردەي. ولار ونى اۋىز سۋدىڭ قۇدىعى دەپ شاتاسىپ تۇسكەن بولۋى مۇمكىن. ىشكى تەرگەۋ جۇمىستارى جۇرگىزىلىپ جاتىر», دەدى.