الەمدە سوڭعى 25 جىلدا بولماعان شەگىرتكەلەردىڭ ەڭ ءىرى شاپقىنشىلىعى ورىن الدى. بۇۇ ازىق-ت ۇلىك جانە اۋىل شارۋاشىلىق جونىندەگى ۇيىمىنىڭ مالىمەتىنشە, اسىرەسە زيانكەستەردىڭ قالىڭ ءنوپىرى اۋعانستان, پاكىستان, ءۇندىستان جانە افريكا قۇرلىعىنداعى ەلدەردە بايقالۋدا. ونىڭ سالدارىنان كوپتەگەن ايماقتار اشارشىلىققا ۇشىراۋى مۇمكىن. بۇل تۋرالى پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن ءباسپاسوز جيىنىندا اۋىل شارۋاشىلىعى مينيسترلىگى اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ توراعاسى المابەك مارس ايتتى.
وسى رەتتە كوميتەت توراعاسى قازاقستانداعى شەگىرتكەگە قارسى قابىلدانعان شارالار جونىندە تىزبەكتەدى. رەسپۋبليكالىق فيتوسانيتارلىق دياگنوستيكا جانە بولجامدار ادىستەمەلىك ورتالىعىنىڭ بولجامىنا سايكەس, بيىل 554 مىڭ گەكتار القاپقا ءۇيىرلى شەگىرتكەلەر, سونىڭ ىشىندە يتالياندىق پرۋس 95 مىڭ گەكتارعا, ازيالىق شەگىرتكە 164 مىڭ گەكتارعا جانە ماروككولىق شەگىرتكە 93 مىڭ گەكتارعا تارالۋى مۇمكىن.
بۇدان باسقا, ساياق شەگىرتكەنىڭ تارالۋى اۋقىمى 266 مىڭ گەكتاردى قۇراۋى ىقتيمال. بۇل ورايدا زيانكەستەرمەن كۇرەسكە رەسپۋبليكالىق بيۋدجەتتەن 1 ملرد تەڭگە ءبولىندى. اتالعان قاراجاتقا حيميالىق وڭدەۋ مەن پەستيتسيدتەر ساتىپ الىنعان.
«ساياق شەگىرتكەگە قارسى كۇرەسكە جەرگىلىكتى بيۋدجەتتەردەن 555 ملن تەڭگە قاراستىرىلىپ وتىر. سونىمەن قاتار ورتالىق قويمادا شەگىرتكەمەن كۇرەسۋ ءۇشىن جالپى 525 مىڭ گەكتار الاڭعا 47 مىڭ ليتر كولەمىندە پەستيتسيد قورى بار. ءۇيىرلى شەگىرتكەگە قارسى وڭدەۋدى ءتيىمدى جۇرگىزۋ ماقساتىندا پەستيتسيدتەردىڭ الۋان تۇرلەرى الىندى.
تۇتاستاي وڭدەۋ جۇمىستارىنا ارنايى 148 بۇرىككىش تەحنيكا جۇمىلدىرىلماق. مينيسترلىك وبلىس اكىمدىكتەرىمەن بىرلەسىپ, وڭىرلىك اكىمدەر باسقاراتىن ايماقتاردا جەدەل شتابتار قۇرىلدى. سونداي-اق حيميالىق وڭدەۋ جۇمىستارى بويىنشا مونيتورينگتىك جوسپار بەكىتىلدى.
شەگىرتكەلەردىڭ وشاقتارىن انىقتاۋ ءۇشىن 571 اۆتوكولىك, GPS ترەكەرلەرى, پلانشەتتەر پايدالانىلادى. 1200 تەكسەرۋشى تارتىلىپ, 38 ملن گەكتار زەرتتەلەدى دەپ كوزدەلۋدە. كورشىلەس ەلدەرمەن, اتاپ ايتقاندا قحر, رەسەي فەدەراتسياسى جانە وزبەكستان مەملەكەتىمەن شەكارالاس اۋماقتاردا زيانكەستەردىڭ وشاعىن انىقتاۋ ءۇشىن بىرلەسكەن زەرتتەۋلەر جۇرگىزىلەدى», - دەدى ا.مارس.
سپيكەردىڭ ايتۋىنشا, قازىر ماروككولىق شەگىرتكەگە قارسى حيميالىق وڭدەۋ جۇمىستارى جامبىل جانە تۇركىستان وبلىستارىندا اياقتالۋعا جاقىن. 28 مامىرداعى جاعدايعا سايكەس, وڭدەلگەن اۋماقتىڭ كولەمى 66 مىڭ گەكتار نەمەسە بولجامنىڭ 71%-ىن قۇراپ وتىر. ال الماتى, قاراعاندى جانە پاۆلودار وبلىستارىندا يتالياندىق پرۋسقا قارسى جۇمىستار باستالدى. بۇگىندە اتالعان ايماقتاردا وڭدەلگەن جەردىڭ كولەمى 12 مىڭ گەكتارعا نەمەسە بولجامنىڭ 4%-نا جەتكەن.