قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ ساياسي قۋعىن-سۇرگىن قۇرباندارىن اقتاۋ جونىندەگى مەملەكەتتىك كوميسسيانىڭ ماڭىزىنا توقتالىپ, ميسسياسىن ءتۇسىندىرىپ بەردى. بۇل تۋرالى ول ءوزىنىڭ فەيسبۋك پاراقشاسىندا جازبا قالدىردى.
«بۇگىن پرەزيدەنت قاسىم-جومارت توقاەۆ ءوز ۇندەۋىندە ساياسي قۋعىن-سۇرگىن قۇرباندارىن اقتاۋ جونىندەگى مەملەكەتتىك كوميسسيانىڭ قۇرىلعاندىعىن جاريا ەتتى. بۇل - تاريحي ادىلدىكتى قالپىنا كەلتىرۋ ىسىندەگى ەلىمىزدىڭ كەزەكتى قادامى. سول جىلدارداعى قۋعىن-سۇرگىن - تاريحىمىزداعى جازىلماعان جارا», - دەگەن داۋرەن اباەۆ پروتسەستەردىڭ جابىقتىعى, قۇپيالىعى كوپتەگەن اقتاڭداق قالدىرعانىن, كىناسىز قۋعىن-سۇرگىنگە ۇشىراعانداردىڭ بارلىعى بىردەي اقتالماعانىن اتاپ ءوتتى.
«حالقىمىزدىڭ قۇقى ءۇشىن دە كۇرەسكەندەردى اقتاۋعا ءتيىسپىز. ماسەلەن, 1910-1930 جىلدارداعى حالىق كوتەرىلىسىنە قاتىسۋشىلاردى ايتالىق, 1929 جىلعى باتپاققارا كوتەرىلىسىنە قاتىسقان 500 ادامنىڭ تەك ۇشەۋى عانا اقتالعان. تاريحتى وزگەرتىپ, تاس-تالقان بولعان تاعدىرلاردى قالپىنا كەلتىرە المايمىز», - دەدى ول.
ولگەندەرگە قايتا ءومىر بەرۋ دە مۇمكىن ەمەستىگىن ايتقان اباەۆ, قۇربان بولعاندار ۇرپاعىنىڭ بولاشاق ۇرپاق الدىنداعى پارىزى - جازىقسىز سوتتالعانداردىڭ جارقىن بەينەسىن ساقتاۋ ەكەنىن باسا ايتتى.
«جاڭادان قۇرىلعان ورگاننىڭ ميسسياسى - ساياسي قۋعىن-سۇرگىن قۇرباندارىن تولىقتاي ساياسي جانە زاڭدى تۇردە اقتاۋ ماقساتىندا جۇيەلى جۇمىستاردى ۇيىمداستىرۋ. پرەزيدەنتتىڭ كوميسسيا الدىنا قويعان مىندەتتەرى جانە ونىڭ اياسىندا جۇرگىزىلەتىن جۇمىستار مىناداي:
جاپپاي ساياسي قۋعىن-سۇرگىن قۇرباندارىن اقتاۋ تۋرالى زاڭنامالىق ۇسىنىستار ازىرلەۋ; جاپپاي ساياسي قۋعىن-سۇرگىن قۇربانىنا تەڭەستىرىلەتىن جانە ساياسي اقتاۋعا جاتاتىن تۇلعالار ساناتىن بەكىتۋ; اقتالعانداردى جەرلەنگەن جەرلەرىن ىزدەۋ جانە ول ورىنداردى كۇتىپ-ۇستاۋدى رەتكە كەلتىرۋ بويىنشا ۇسىنىستار ازىرلەۋ; اقتالعانداردىڭ قۇقىقتارىن قالپىنا كەلتىرۋ ماسەلەلەرى بويىنشا وتىنىمدەر مەن شاعىمداردى قاراۋ. اتالعان مىندەتتەر مەملەكەتتىك كوميسسيا جۇمىسى سۇلباسىن ناقتى بەينەلەيدى. ونىڭ بارىسى جايىندا حالىققا تۇراقتى اقپارات بەرىلىپ وتىرادى», - دەدى داۋرەن اباەۆ.ەسكە سالايىق, بۇگىن مەملەكەت باسشىسى قاسىم-جومارت توقاەۆ ساياسي قۋعىن-سۇرگىن قۇرباندارىن اقتاۋ ءۇشىن ارنايى مەملەكەتتىك كوميسسيا قۇرۋدى تاپسىرعان بولاتىن.