ز ۇلىمدىقتارىن مويىندادى
سەربيانىڭ پارلامەنتى 1995 جىلى سەربيا باسشىلىعىنىڭ قولداۋىمەن بوسنيالىق سەربتەردىڭ بوسنيالىق مۇسىلمانداردى زۇلىمدىقپەن قىرىپ-جويعانى ءۇشىن الەم الدىندا كەشىرىم سۇرادى.
سوندا بوسنيالىق سەربتەردىڭ كوسەمدەرى رادوۆان كارادجيچ پەن گەنەرال راتكو ءملاديچتىڭ باسشىلىعىمەن سرەبرەنيتسا قالاسىندا سەگىز مىڭ قارۋسىز مۇسىلمانداردى قىرىپ سالعان ەدى. بۇل ەكىنشى دۇنيەجۇزىلىك سوعىستان كەيىنگى ەڭ ۇلكەن گەنوتسيدتىك ايۋاندىق ارەكەت بولدى. جاۋىز كارادجيچ قازىر حالىقارالىق اسكەري تريبۋنال تۇرمەسىندە وتىرسا, قانىشەر گەنەرال ملاديچ ءالى قاشىپ ءجۇر.
اقش ءازىر وتىر
كحدر-دا جاعداي كۇردەلى. بۇل جايىندا اقش-تىڭ تىنىق مۇحيت ايماعىنداعى تەڭىز جاياۋ اسكەرى كورپۋسىنىڭ قولباسشىسى گەنەرال كەيت ستالدەر وي بولىسە كەلىپ, سولتۇستىك كورەيادا جاعداي بۇدان بەتەر ۋشىعا تۇسسە, بۇل ەلدەگى اتوم قارۋىن باقىلاۋعا الۋ ءۇشىن وعان تەڭىز جاياۋ اسكەرىن جىبەرۋلەرى مۇمكىن دەدى. ونىڭ ويىنشا, سولتۇستىك پەن وڭتۇستىكتىڭ اسكەري قاقتىعىسىنان بۇرىن كحدر-عا قاۋىپ – كيم چەن ءيردىڭ كۇيرەۋى. سونداي جاعدايدا ەلدەگى اتوم قارۋى باقىلاۋسىز قالماۋعا ءتيىس.
حاماس-تى اتقىلادى
جۇما كۇنى ءيزرايلدىڭ اسكەرى گازا سەكتورىن زىمىراننان اتقىلاپ, راديكالدىق حاماس ۇيىمىنىڭ ءبىرشاما نىساندارىن ىستەن شىعاردى. بەيسەنبى كۇنى يزرايل جاعى گازا ۇستىنەن پاراقشالار تاستاپ, جەرگىلىكتى حالىققا اسكەري نىسانداردى اتقىلايتىنىن ەسكەرتكەن كورىنەدى. شىنىندا دا, اسكەري قارۋ-جاراق شىعارۋمەن اينالىساتىن ءتورت فابريكاعا ۇلكەن زارداپ كەلتىرىلىپتى. اسكەريلەردىڭ “گازاداعى لاڭكەستىك ارەكەتتەردەن يزرايل ازاماتتارىنا قاۋىپ تونۋىنە كەلىسپەيتىندىگى” جونىندەگى مالىمدەمەسىنە قاراعاندا, بۇل ايماقتا جۋىق ارادا تىنىشتىق بولا قويماستاي.
ءبوروديننىڭ ساندىراعى
جاقىندا بۇرىن دا ءوزىنىڭ داڭعويلىعىمەن كوزگە ءتۇسىپ جۇرگەن رەسەي-بەلورۋسسيا وداقتاس مەملەكەتى دەيتىننىڭ مەملەكەتتىك حاتشىسى سانالاتىن پاۆەل بورودين بەلورۋسسيا ەلشىسى ۆ.دولگولەۆتىڭ وداقتاس مەملەكەت قۇرۋدان بۇرىن كەدەن وداعىنا كوبىرەك كوڭىل ءبولۋ كەرەك دەگەن پىكىرىنە تۇسىنىكتەمە جاساپ, “وداقتاس مەملەكەتكە جاقىندا قازاقستان دا, ۋكراينا دا جانە باسقا دا ءبىزدىڭ رەسپۋبليكالار كىرەدى”, دەپ جاۋاپسىز مالىمدەمە جاسادى.
ۇكىمەت دەمالىستا
نورۆەگيادا پاسحا مەرەكەسى الدىندا ەلدىڭ بۇكىل مينيسترلەر كابينەتى دەمالىسقا كەتتى. مۇنى ولار وزدەرىنشە ەڭبەك زاڭدىلىعىن قاتاڭ ساقتايتىندىعىمەن تۇسىندىرەتىن كورىنەدى. ۇكىمەت جەكە ادام ەمەس, بۇكىل ەلدىڭ جۇمىسىن توقتاتىپ قويعاندا, ولاردىڭ ۇتاتىنى دا كوپ بولا قويماس. “بوياۋشى بوياۋشى دەگەنگە ساقالىن بويايدى” دەگەن ماقال, ءسىرا, وسىندايدا ايتىلسا كەرەك.
قىتايداعى قۇرعاقشىلىق
بۇكىل الەمدى توپانسۋ الەككە ءتۇسىرىپ جاتقاندا, قىتايدىڭ ءبىراز ايماعىن اپتاعان ىستىق كۇيدىرىپ, قۇرعاقشىلىقتان حالىق قاتتى زارداپ شەگىپ جاتقان كورىنەدى. كوكتەمنىڭ العاشقى ايىنىڭ اياعىندا-اق 7,73 ميلليون گەكتار ەگىستىك جەر كۇيىپ كەتىپتى. كۇن ىسي كەلە ونىڭ كولەمى كوبەيە ءتۇسۋى ابدەن مۇمكىن. 25 ميلليون ادام, سونداي-اق 18 ميلليون كۇش كولىگى ىشەتىن سۋعا دا ءزارۋ بولىپ قالىپتى.
وزگەنىكىنە تيىسپە
جاپونيا پارلامەنتىنىڭ جوعارعى پالاتاسىنىڭ دەپۋتاتى ماساتەسي ۆاكاباياسي داۋىس بەرگەن كەزدە قاسىنداعى جوق دەپۋتات ءۇشىن تۇيمەنى باسىپ, داۋىس بەرىپ جىبەرگەنى انىقتالعان سوڭ, پارلامەنتتەن كەتۋگە ءماجبۇر بولدى. ونىڭ ارەكەتى فوتوعا تۇسىرىلگەن ەكەن, ول جۇرتقا كورسەتىلىپتى.
سيقىرعا جازا بار
ليۆاننىڭ بەلگىلى تەلەجۇرگىزۋشىسى ءالي سابات ءوز تەلەشوۋلارىندا وزىنشە بولاشاققا بولجام ايتىپ, كورەرمەندەرگە كەڭەس بەرىپ جاتاتىن. 2008 جىلى ول ساۋد ارابياسىنا قاجىلىققا بارعان كەزىندە جەرگىلىكتى پوليتسيا ونى جۇرتتى سيقىرلادىڭ دەگەن ايىپپەن قاماۋعا العان ەدى. ەندى ونىڭ باسىنا ءولىم جازاسىنا كەسىلۋ قاۋپى ءتونىپ تۇر. بۇل ەلدە سيقىرلىققا تىيىم سالىنعان. اڭگىمە بۇل ەلدەگى سيقىرلىققا دەگەن نانىمعا تىرەلەدى. ايتپەسە, وركەنيەتتى ەلدەردە بۇل كۇلكى تۋدىراتىن نارسە عوي.
ازىرلەگەن ماماديار جاقىپ.