الماتى قالاسىنىڭ اكىمى باقىتجان ساعىنتاەۆ اپاتتان قايتىس بولعان پوليتسەيلەردىڭ وتباسىنا كوڭىل ايتتى. بۇل تۋرالى ول Twitter پاراقشاسىندا جازدى.
«بلوك-بەكەتتە قىزمەت اتقارىپ جۇرگەن پوليتسيا قىزمەتكەرلەرى جالعاس جانعازيەۆ پەن داستان ابدىقانوۆتىڭ جول اپاتى وقيعاسىنان قازا بولۋىنا بايلانىستى وتباسىلارى مەن جاقىندارىنا قايعىرىپ كوڭىل ايتامىن» دەپ جازدى ول.
ەسكە سالا كەتەيىك, بۇگىن تاڭعى ساعات 5 شاماسىندا الماتى وبلىسىنىڭ قاراساي اۋدانىنا قاراستى كوكساي شاعىن اۋدانىنىڭ اۋماعىندا كولىك اپاتى بولىپ, قاپەلىمدە ەكى ءتارتىپ ساقشىسى ءتىل تارتپاي كەتكەن ەدى.