ساپارباەۆ اكىمدەرگە سوگىس جاريالادى

«بۇل جەرگىلىكتى الدىن-الۋ جۇمىستارىنىڭ السىزدىگىن جانە كارانتيندىك شارالاردىڭ ءتيىستى دەڭگەيدە ساقتالماي وتىرعاندىعىن كورسەتەدى.  ەكونوميكالىق قاجەتتىلىككە بايلانىستى شاعىن جانە ورتا بيزنەستىڭ كەيبىر سالالارىنىڭ قىزمەتىنە شەكتەۋلەر الىنىپ تاستالدى. دەگەنمەن, بۇل قاۋىپسىزدىك شارالارىن ەلەمەۋگە بولادى دەگەندى بىلدىرمەيدى. كارانتيندىك رەجيمنىڭ تالاپتارى ساقتالۋى كەرەك جانە وعان بارلىعى مىندەتتى. الايدا, تاراز قالاسى مەن اۋدان ورتالىقتارىندا كوپتەگەن تۇرعىندار قورعانىش مەديتسينالىق ماسكالارىن پايدالانباۋدا. ال, ساۋدا ورىندارى مەن باسقا دا نىسانداردا ازاماتتاردىڭ قاۋىپسىزدىگىن قامتاماسىز ەتۋ بويىنشا ءتيىستى تالاپتار ورىندالماي وتىر. ايتالىق, تالاس جانە بايزاق اۋداندارىندا ءبىر جەردە ادامداردىڭ كوپ جينالۋىنا قاتىستى جاعدايدىڭ سالدارىنان اۋرۋشاڭدىقتىڭ ءوسۋى ورىن العان», دەدى بەردىبەك ساپارباەۆ.

وبلىستىق تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتىنىڭ باسشىسى بەرىك جارقىنبەكوۆ اعىمداعى جىلدىڭ 24 ناۋرىزىنان 21 مامىرىنا دەيىن ايماقتا كوروناۆيرۋستىق ينفەكتسيانىڭ 229 جاعدايى تىركەلگەنىن جەتكىزدى. ونىڭ باسىم بولىگى تاراز قالاسى مەن قورداي جانە بايزاق اۋداندارىندا ورىن العان. وسى ۋاقىتقا دەيىن اۋرۋدىڭ وڭىرىمىزگە سىرتتان كەلۋ جاعدايلارى كوبىرەك بايقالسا, سوڭعى كەزدەرى جەرگىلىكتى تۇرعىندار اراسىندا جۇقتىرۋ دەرەگى ءوسىپ وتىر ەكەن. اتالعان دەپارتامەنت باسشىسى اۋرۋدىڭ كوبەيۋىنىڭ نەگىزگى سەبەپتەرى رەتىندە كاسىپكەرلىك پەن ساۋدا نىساندارىنا ادامداردىڭ كوپ جينالۋى, ماسكالىق رەجيمنىڭ بۇزىلۋى, الەۋمەتتىك قاشىقتىقتىڭ ساقتالماۋى ەكەنىن اتاپ ءوتتى. ماسەلەن, سوڭعى كۇندەرى تالاس اۋدانىندا كوروناۆيرۋستىق ينفەكتسيانىڭ 6 وقيعاسى تىركەلگەن. العاشقى ناۋقاس ورتالىق اۋداندىق اۋرۋحاناعا جاتقىزۋ كەزىندە بەلگىلى بولعان. زەرتحانالىق زەرتتەۋ  بارىسىندا اتالعان ناۋقاسپەن بايلانىستا بولعان 4 ادامنىڭ ىندەت جۇقتىرعاندىعى انىقتالعان. اۋدانداعى كەلەسى ينفەكتسيا اۋدان ورتالىعى قاراتاۋ قالاسىنىڭ تۇرعىنىنان تابىلعان.

ال وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ ايتۋىنشا, وبلىستىڭ 36 ەلدىمەكەنىندە كوروناۆيرۋستىق ينفەكتسيا انىقتالعان. سوڭعى اپتاداعى ىندەت جۇقتىرۋ دەرەگى بايزاق اۋدانىنىڭ سارىكەمەر اۋىلىندا انىقتالعان. قازىرگى تاڭدا جۇقپالى اۋرۋلار اۋرۋحاناسىندا 70 ناۋقاس ەم الىپ جاتسا, 1504 ادام دارىگەرلەردىڭ باقىلاۋىنداعى ءۇي كارانتينىنە الىنعان. ەمدەلىپ شىققانداردىڭ سانى جالپى سانى 155 بولسا, 1 ادام قايتىس بولعان.

جيىندا بەردىبەك ساپارباەۆ جەرگىلىكتى اتقارۋشى ورگاندار مەن سالالىق ۆەدومستۆو باسشىلارىنا حالىق اراسىندا ءتۇسىندىرۋ شارالارىن كۇشەيتۋ كەرەكتىگىن, كەيىنگى كەزدەرى جۇمىستارىن السىرەتىپ العان ءموبيلدى توپتاردىڭ قىزمەتىن قايتا جانداندىرۋ قاجەتتىگىن ايتتى. سونداي-اق, باسقوسۋدا تۇرعىندار تاراپىنان تۇسكەن وتىنىشتەرگە بايلانىستى حالىققا قىزمەت كورسەتۋ ورتالىقتارىنىڭ قىزمەتىن 25 مامىردان قايتا باستاۋ تۋرالى شەشىم قابىلداندى. سونىمەن قاتار, ءوز جۇمىسىندا جىبەرگەن كەمشىلىكتەرى ءۇشىن تاراز قالاسىنىڭ, تالاس جانە بايزاق اۋداندارىنىڭ اكىمدەرىنە سوگىس جاريالانىپ, وسى باعىتقا جەتەكشىلىك ەتەتىن تاراز قالاسى اكىمىنىڭ ورىنباسارى قىزمەتىنەن بوساتىلدى. بۇدان بولەك, قورداي, بايزاق جانە تالاس اۋداندارى اكىمدەرىنىڭ ورىنباسارلارىنىڭ جەكە جاۋاپكەرشىلىگى قارالاتىن بولادى.

شتاب وتىرىسىندا ازاماتتاردىڭ جەكەلەگەن ساناتتارىنا ارنالعان الەۋمەتتىك تولەمدەرگە قاتىستى ماسەلە دە جان-جاقتى سارالاندى. مەملەكەت تاراپىنان قاراجات قاراستىرىلعانىمەن, جەرگىلىكتى جەرلەردە الەۋمەتتىك جاردەماقىلاردى تولەۋ قارقىنى كوڭىل كونشىتپەيدى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى جورابەك باۋبەكوۆتىڭ ايتۋىنشا, ت.رىسقۇلوۆ اۋدانىندا ازىق-ت ۇلىك جانە تۇرمىستىق جيىنتىقپەن قامتاماسىز ەتۋ تولەمى بار-جوعى 38 پايىزعا عانا ورىندالعان. ال, تاراز قالاسى جانە وبلىستىڭ بارلىق اۋداندارىندا مەملەكەت تاراپىنان اتاۋلى الەۋمەتتىك كومەككە بولىنگەن قاراجات تولىق يگەرىلمەگەن. بۇل رەتتە بەردىبەك ساپارباەۆ جەرگىلىكتى اتقارۋشى ورگانداردىڭ باسشىلارىن الەۋمەتتىك قامسىزداندىرۋ جانە تۇرعىنداردى جۇمىسپەن قامتۋ جايىنا باسا نازار اۋدارۋعا شاقىردى. بۇعان جۇمىسپەن قامتۋدىڭ جول كارتاسىنىڭ ينفراقۇرىلىمدىق جوبالارى مەيلىنشە وڭ ىقپالىن تيگىزەدى. الايدا, اتالعان باعىتتاعى جۇمىستاردى شيراتا ءتۇسۋ قاجەت. ماسەلەن, جوسپار بويىنشا 18 مىڭنان استام تۇرعىن جۇمىسپەن قامتۋدىڭ ءارتۇرلى شارالارىنا تارتىلۋى ءتيىس بولسا, بۇگىنگى تاڭدا جوبالار بويىنشا 7 مىڭ ادام عانا جۇمىس تارتىلعان.

جامبىل وبلىسى