بۇگىن وبلىس اكىمى ارحيمەد مۇحامبەتوۆ ىندەتتىڭ تارالۋىنا جول بەرمەۋ جونىندەگى جەدەل شتاب وتىرىسىن وتكىزدى.
سوڭعى دەرەك بويىنشا, قوستاناي وبلىسىندا بۇگىنگە دەيىن COVID-19 ۆيرۋسىن جۇقتىرعان 112 ادام تىركەلىپ, 50 ادام ساۋىعىپ شىققان. قاتەرلى ىندەتتەن 2 ادام كوز جۇمعان.
شتاب وتىرىسىندا وبلىس اۋماعىندا كارانتيندىك ءىس-شارالاردى جەڭىلدەتۋدىڭ 4-ءشى كەزەڭىن ەنگىزۋ تۋرالى شەشىم قابىلداندى. الايدا ەپيدەميولوگيالىق اھۋالعا بايلانىستى بۇل شەشىمدەر وزگەرىپ كەتۋى مۇمكىن.
جەدەل شتاب ساۋدا ورىندارى مەن وزگە دە قوعامدىق مەكەمەلەردىڭ جۇمىس ىستەۋ ءتارتىبىن ناقتىلادى. سونىمەن 25 مامىردان باستاپ:
اۋماعى 2000 شارشى مەتردەن اساتىن ءىرى ساۋدا ورىندارى مەن دۇكەندەردىڭ جۇمىسى جاندانادى. بىراق بۇل نىساندارداعى فۋد-كورت, كينوتەاتر, ويىن-ساۋىق نىساندارى جۇمىس ىستەمەيدى; مەكتەپكە دەيىنگى تاربيە بەرۋ ۇيىمدارى - دامىتۋ, ءبىلىم بەرۋ ورتالىقتارى, ۇيىرمەلەر, فاكۋلتاتيۆتەر جۇمىس ىستەي باستايدى; قوعامدىق تاماقتاندىرۋ نىساندارى ساعات 7-00-دەن 22-00-گە دەيىن جۇمىس ىستەيتىن بولادى. ءبىر ەسكەرەتىن جايت, مۇندا تاماق ۇستەلدەرىنىڭ اراسى 2 مەتردەن كەم بولماۋى كەرەك جانە تاماقتانۋشىلار سانى 30 ادامنان اسىپ كەتپەۋى ءتيىس. بانكەت, ۇيلەنۋ تويى, مەرەيتوي, اتاۋلى مەرەكەلىك كەشتەر, سونداي-اق مەكتەپ تۇلەكتەرىنىڭ باسقوسۋى سياقتى ءىس-شارالارىن وتكىزۋگە رۇقسات جوق. ماسساج سالوندارى; كىتاپحانالار, مادەني نىساندار (30 ادامعا دەيىن); سپورت نىساندارى مەن ارنايى جاتتىعۋ جاساۋ ورىندارى (30 ادامعا دەيىن); قوناق ۇيلەر ( مۇنداعى باسسەيندەر, جاتتىعۋ زالدارى, بيليارد, كينوزالدار, ءماجىلىسحانالار جۇمىس ىستەمەيدى).سونداي-اق, وڭىرلىك جەدەل شتاب شەشىمىمەن ايماقتا ەپيدەميولوگيالىق اھۋال جاقسارعانعا دەيىن مىناداي نىساندار جۇمىسىن توقتاتا تۇرادى جانە كەيبىر شەكتەۋلەر ساقتالىپ قالادى:
- ۆوكزالدار, اۆتوستانتسيالار;
- ەلدى مەكەندەر اراسىنداعى قارىم-قاتىناس;
- تۇرعىندارعا ساعات 22-00-دەن 6-00-گە دەيىن مەكەنجايىنان شىعۋعا تىيىم سالىنادى;
- كورمەلەردىڭ, كينوتەاترلاردىڭ, تەاترلاردىڭ, ويىن الاڭدارى (اۋلالاردى قوسپاعاندا);
- تۇنگى كلۋبتار, فيتنەس, بۋكمەكەرلىك كەڭسەلەر, كومپيۋتەرلىك جانە ويىن كلۋبتارى, كاليان, بيليارد, بوۋلينگ ورتالىقتارى, كاراوكە;
- ساناتوريلەر, پروفيلاكتوريلەر جانە دەمالىس ورىندارى;
- اكۆاپاركتەر, باسسەيندەر, تاتۋ-سالوندار;
- ء بىر مەزگىلدە 20-دان استام ادام جۋىناتىن مونشالار مەن ساۋنالار;
- ءدىني نىساندار.
جيىن بارىسىندا وبلىس اكىمى تۇرعىنداردى ورازا ايت مەرەكەسىن وتباسىندا, تۋعان-تۋىستارىنىڭ ورتاسىندا وتكىزۋگە شاقىردى.
سونىمەن قاتار شتاب وتىرىسىندا وبلىستىڭ باس سانيتارلىق دارىگەرىنىڭ قاۋلىسىنان مەملەكەتتىك ورگاندار مەن ۇيىم قىزمەتكەرلەرىنىڭ 50%-ى قاشىقتان جۇمىس ىستەۋى ءتيىس دەگەن تارماق الىنىپ تاستالدى.
قوستاناي وبلىسى