قوستاناي وبلىسىندا بيىل تۇڭعىش پرەزيدەنت قورىنىڭ «ەل ءۇمىتى» باستاماسىن جۇزەگە اسىرۋ ماقساتىندا اۋىلدا ءوسىپ جاتقان دارىندى بالالارعا ارنالعان «دارىن» جازعى دەمالىس ورنى اشىلماق. بۇل تۋرالى قوستاناي وبلىسىنىڭ اكىمى ارحيمەد مۇحامبەتوۆتىڭ توراعالىعىمەن وتكەن سەلەكتورلىق كەڭەستە ايتىلدى.
سوڭعى ەكى جىل ىشىندە ايماق مەكتەپتەرىندە جەرگىلىكتى مەتسەناتتاردىڭ قولداۋىمەن جالپى سوماسى 325,4 ملن تەڭگەگە 30 روبوتوتەحنيكا كابينەتى جانە 65 IT-سىنىبى اشىلعان. ەندىگى ماقسات - وسى سىنىپتاردىڭ تولىققاندى جۇمىس ىستەۋىن قامتاماسىز ەتە وتىرىپ, بالانىڭ دامۋى مەن ءبىلىم ساپاسىنا تيگىزەتىن تيىمدىلىگىن ارتتىرۋ.
ءبىلىم سالاسىنىڭ باسشىلارى بۇل ءۇشىن جازعى دەمالىس كەزىندە بىرىڭعاي تانىمدىق-ساۋىقتىرۋ باعدارلاماسى بويىنشا جۇمىس ىستەيتىن «دارىن» لاگەرىندە اۋىلدا وقيتىن جوعارى قابىلەتكە يە بالالاردىڭ باسىن قوسۋدى كوزدەپ وتىر. تاجىريبەلى IT-ماماندار جۇمىس ىستەيتىن لاگەردە بالالار بەلسەندى دەمالىس شارالارىمەن قاتار, عىلىمي تەحنولوگياعا قاتىستى قىزىقتى ساباقتار مەن ويىن-جاتتىعۋلارعا قاتىسادى.
- «دارىن» لاگەرىنەن تىس, جازعى دەمالىس ۋاقىتىندا بالالاردىڭ روبوتوتەحنيكا مەن IT سالاسىنداعى ءبىلىمىن قاشىقتان دامىتۋ جوسپارلانىپ وتىر. وقۋشىلار بەينەروليكتەر, بۋكترەيلەرلەر, ۆاينالار, ۆيرتۋالدى ەكسپەديتسيا, ەكسكۋرسيا, ساياحات جاساپ, ينتەراكتيۆتى مەكتەپتەردەگى ماستەر-كلاستار مەن قويىلىمدارعا, جازعى ونلاين-لاگەرلەرگە قاتىساتىن بولادى, - دەدى ءبىلىم باسقارماسىنىڭ باسشىسى ۆاسيلي تسىمباليۋك.
قوستاناي وبلىسى