بۇل تۋرالى دەنساۋلىق ساقتاۋ مينيسترلىگى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ توراعاسى تيمۋر سۇلتانعازيەۆ ايتتى.
«قالالار اراسىنداعى بلوكبەكەتتەر ءالى دە ساقتالادى. وبلىستار مەن وڭىرلەر اراسىنداعى قوزعالىسقا دا شەكتەۋ بار. ازىرگە بلوكبەكەتتەردى الىپ باستاۋدى كوزدەپ وتىرعان جوقپىز. بۇل وڭىرلەردەگى ەپيدەميولوگيالىق احۋالدىڭ ءارتۇرلى بولۋىمەن بايلانىستى. ونى وزدەرىڭىز دە كورىپ وتىرسىزدار. ماسەلەن سوڭعى بىرنەشە كۇن بويى شىمكەنت قالاسى مەن اتىراۋ وبلىسىندا ايتارلىقتاي ءوسىم ورىن الۋدا. وڭىرلەر اراسىنداعى كارانتين شارالارىن جەڭىلدەتۋ جانە بلوكبەكەتتەردى الۋ ينفەكتسيانىڭ شىمكەنت قالاسىنان تۇركىستان وبلىسىنا نەمەسە اتىراۋ وبلىسىنان وعان جاقىن وڭىرلەرگە تارالۋىنا اكەلۋى مۇمكىن», - دەدى تيمۋر سۇلتانعازيەۆ.
بۇدان سوڭ, ول اۋە رەيستەرىنىڭ قايتا جاندانىپ, جيىلىكتەرىن ارتتىرۋ سەبەبىن ءتۇسىندىردى.
«ۇشاقتا بولۋ ۋاقىتى قىسقا ەكەندىگىن ءتۇسىنۋ قاجەت. نۇر-سۇلتاننان الماتىعا دەيىن 1,5 ساعات قانا ۇشاسىڭ. تاۋەكەل ايتارلىقتاي ۇلكەن ەمەس. ال حالىقتىڭ ءبىر وڭىردەن ەكىنشىسىنە جاپپاي قوزعالۋىنىڭ تاۋەكەلى وتە جوعارى. ادامدار وڭىرلەردىڭ اراسىندا اۆتوموبيلمەن جاپپاي جۇرە باستايتىندىعىن ءتۇسىنۋ قاجەت. ال ول ادامنىڭ بۇعان دەيىن قايدا بولعانىن, كىممەن قارىم-قاتىناستا بولعانىن ەشكىم بىلمەيدى», - دەدى كوميتەت توراعاسى.