قوستاناي وبلىسىنىڭ تابيعات قورعاۋ پوليتسياسىنىڭ قىزمەتكەرلەرى مەن امانگەلدى جانە جانگەلدين اۋداندارىنىڭ قورىقشىلارى بىرلەسىپ ايماقتاعى اقبوكەن پوپۋلياتسياسىن قورعاۋ بويىنشا رەيد شارالارىن جۇرگىزۋدە.
- رەيد بارىسىندا موبيلدىك توپتار قوستاناي وبلىسى مەن قاراعاندى جانە اقتوبە وبلىستارى شەكاراسىنداعى اقبوكەن مەكەندەيتىن 4 مىڭ كيلومەتردەن استام اۋماقتى ءسۇزىپ شىقتى. بۇل جەرلەر نەگىزىنەن اقبوكەننىڭ بەتپاقدالا پوپۋلياتسياسىنىڭ تىرشىلىك ەتۋ ورتاسى بولىپ تابىلادى. كيىك كوبىنە تورعاي ايماعىنا كەلىپ تولدەيدى. كارانتينگە بايلانىستى بيىل وبلىستا كوكتەمگى اڭ اۋلاۋ ماۋسىمىنىڭ اشىلۋى ءالى جاريالانعان جوق. سوندىقتان كيەلى جانۋارلاردى ءدال وسى كەزەڭدە براكونەرلەردەن قورعاۋدى كۇشەيتىپ وتىرمىز, - دەدى تابيعات قورعاۋ پوليتسياسى ءبولىمىنىڭ باستىعى تالعات احمەتوۆ.
تالعات احمەتوۆتىڭ ايتۋىنشا, پوليتسەيلەردىڭ تىنىمسىز ەڭبەگىنىڭ ارقاسىندا وبلىستا سوڭعى ۋاقىتتا تابيعاتقا قاستاندىق جاساۋ قىلمىسى ءبىرشاما باسەڭدەگەن. جىل باسىنان بەرى تابيعات قورعاۋعا قاتىستى 246 زاڭ بۇزۋشىلىق تىركەلىپ, 2 ملن تەڭگەگە جۋىق ايىپپۇل سالىنعان.
قازىر پوليتسيادا زاڭسىز اعاش كەسۋ بويىنشا 1, زاڭسىز اڭ اۋلاۋ بويىنشا 5 قىلمىستىق ءىستى تەرگەلىپ جاتىر.
ءتارتىپ ساقشىلارى تاياۋدا عانا اقبوكەن ءمۇيىزىن ينتەرنەت ارقىلى ساتقان قىلمىسكەرلەردى قۇرىقتادى.
قوستاناي وبلىسى