«دوبروە سەردتسە lider.kz» ۆولونتەرلىق ۇيىمى ۆولونتەرلار ىزدەيدى. جۇمىس اۋقىمى كەڭەيگەن سوڭ قاربالاس شارۋانىڭ ءبارىن تولايىم اتقارۋ ءبىرشاما قيىندىق تۋدىرىپ وتىر ءارى ۆولونتەرلاردىڭ قارامى كوبەيسە, قايىرىمدىلىقتىڭ دا اۋقىمى ەسەلەنە تۇسەر ەدى دەيدى ەرىكتىلەر.
ولار بەس جىلدان بەرى كومەككە مۇقتاج جاندارعا قول ۇشىن سوزىپ كەلەدى. سىرقات جانداردىڭ ەم-دومىنا قاجەتتى قاراجات جينايدى. ماسەلەن, بيىل ەڭ كوپ جينالعان قارجى 1 ملن 200 مىڭ تەڭگە. بۇل اقشاعا ەكىنشى توپتاعى مۇگەدەك دينا قۇرمانعوجيناعا تىنىس الۋ اپپاراتىن الىپ بەردى.
ەلدەگى توتەنشە جاعداي كەزىندە ۇيىم ۆولونتەرلەرى اۋىزبىرشىلىك تانىتىپ, 250 وتباسىعا ازىق-ت ۇلىكپەن كومەكتەستى. 4 بالانىڭ ەمىنە قارجىلاي قولداۋ كورسەتتى. كۇنى بۇگىنگە دەيىن 12 سابيگە كومەك بەرگەن. مايدانگەرلەردى دە قۇتتىقتاپ, قارتتاردى دا ەلەپ-ەسكەرىپ وتىرادى. قازىر ۇيىمدا 400-دەي ۆولونتەر بار. الايدا, ولاردىڭ تەك 50-60-ى عانا بەلسەندى. كەلەسى اپتادا ولار كومەككە ءزارۋ 500 تۇرعىنعا ازىق-ت ۇلىك سەبەتىن تاراتپاق. سوندىقتان, ۇيىمعا قوسىمشا كومەك كۇشى قاجەت.
– ءبىز مەيىرىمدى جانداردى ءوز ۇيىمىمىزعا قوسىلىپ, قايىرىمدىلىق جاساۋعا شاقىرامىز. قارجىلاي كومەك بەرىڭىز دەمەيمىز. ويتكەنى, قازىر قاتارىمىزعا بىرتىندەپ دەمەۋشىلەر قوسىلۋدا. بىزگە تەك جارمەڭكە, ءتۇرلى شارا ۇيىمداستىرۋعا كومەكتەسەتىن, جاستاردى ىزگى امالدار جاساۋعا ناسيحاتتايتىن جاندار قاجەت,- دەيدى «دوبروە سەردتسە lider.kz» ۆولونتەرلىق ۇيىمىنىڭ جەتەكشىسى يرينا كاتۋحوۆا.
زامانداستارىمىزدىڭ باسىم بولىگى جاقسىلىق جاساۋعا تالپىنىپ تۇرسا, الەم دە مەيىرلەنە تۇسپەي مە؟!
اقمولا وبلىسى