بيىل ۇكىمەتتىك ەمەس ۇيىمداردىڭ كوبى جۇمىس فورماتىن وزگەرتتى. ماسەلەن, قوعامدىق جانە قايىرىمدىلىق قورلار ۆولونتەرلىققا بەت بۇردى. وسىعان وراي وڭىردەگى ۇكىمەتتىك ەمەس ۇيىمدارعا قوسىلعان ۆولونتەرلاردىڭ سانى كوبەيدى.
بۇگىندە وڭىردە 718 ۇكىمەتتىك ەمەس ۇيىم تىركەلگەن. ولار 34 الەۋمەتتىك جوبانى جۇزەگە اسىرۋدا. بيىل اتالعان ۇيىمدار ءوز جۇمىسىن ۆولونتەرلىق نەگىزگە سۇيەنە وتىرىپ ۇيىمداستىرۋدا. وعان كوروناۆيرۋس پاندەمياسى مەن تۇركىستان وبلىسى ماقتاارال اۋدانىنداعى سۋ تاسقىنى سياقتى توتەنشە جاعدايلار سەبەپ بولىپ وتىر.
–قالاداعى ۆولونتەرلىق قوزعالىستار توتەنشە جاعداي كەزىندە كوپتەگەن وتباسىنا ۇلكەن قولداۋ تانىتتى. وسى باعىتتا جۇمىستى جالعاستىرىپ جاتىرمىز. قيىن جاعدايعا تاپ بولعان وتباسىلارعا ءاردايىم كومەك كورسەتىلەدى. جۇرەگى جومارت جاندار دا بۇل ىسكە بەي-جاي قاراماۋدا,–دەيدى قالالىق جاستار رەسۋرستىق ورتالىعىنىڭ مامانى اسلان جۇمابەكوۆ.
مىسالى, شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ كوپسالالى كوللەدجى جانىنداعى «امانات» ۆولونتەرلىق ورتالىعى قيىن جاعدايعا تاپ بولعان 30-دان استام ادامعا كومەك كورسەتكەن. ازىق-ت ۇلىك, كيىم-كەشەك پەن جەكە گيگيەنالىق زاتتارىن ەكى كۇن ىشىندە جيناپ, جەتكىزگەن. ال «راحات-دوبرو» ورتالىعىنىڭ بەلسەندىلەرى وبلىس ورتالىعىنىڭ 25 وتباسىن قامقورلىقتارىنا العان. مۇنداي جۇمىستار اقمولا وبلىسىنىڭ اۋداندارىندا دا جالعاسۋدا.