ستەپنوگورسك قالاسىنا قاراستى بەستوبە اۋىلىنىڭ تۇرعىندارى ءۇشىن جاعىمدى جاڭالىق ورىن الدى. قازىر وڭىردە «اقسۋ-بەستوبە-يزوبيلنوە» باعىتىنداعى 86 شاقىرىم جولعا جوندەۋ جۇمىستارى جۇرگىزىلۋدە.
جوبانى جۇزەگە اسىرۋ ءۇش جىلعا جوسپارلانعان. قارجى رەسپۋبليكالىق جانە جەرگىلىكتى بيۋدجەتتەن ءبولىنىپ وتىر. قازىرگى تاڭدا جۇمىس كولەمىنىڭ 80 پروتسەنتى ورىندالدى. «اقسۋ-بەستوبە-يزوبيلنوە» باعىتىنداعى اۆتوجول 60 جىل بويى جوندەۋ كورمەگەن بولاتىن. جوبالىق-سمەتالىق قۇجاتتامانى مەملەكەتتىك-جەكەمەنشىك ارىپتەستىك اياسىندا «قازاقالتىن» كومپانياسى ازىرلەگەن. 2018 جىلى «كوكشەتاۋ جولدارى» كاسىپورنى قۇرىلىس جۇمىستارىن باستاعان ەدى. قازىر اقسۋ مەن بەستوبە اراسىنداعى 70 شاقىرىم جولعا جامىلعى توسەۋ جۇمىستارى اياقتالدى.
ء–بىر ايدان سوڭ بۇل باعىتتا دا جاڭا جول پايدالانۋعا بەرىلەدى. ەندى جوندەلەتىن 16 شاقىرىمى قالدى,–دەيدى بەستوبە كەنتىنىڭ اكىمى مۇسىلمانبەك يسماعۇلوۆ.
بەستوبە كەنتىندە 7 مىڭعا تارتا تۇرعىن بار. ونىڭ 60 پروتسەنتىى جۇمىسپەن قامتىلعاندار. ءوڭىر ەكونوميكاسىنا باسىمدىق بەرىلگەن باعىتتارىنىڭ ءبىرى – شاعىن جانە ورتا بيزنەس. بۇل رەتتە جولدىڭ قالىپقا كەلتىرىلۋى ايماق ءۇشىن ەكونوميكالىق ماگيسترال قىزمەتىن اتقارادى.
–جول جوقتا قاتتى قينالاتىن ەدىك. قازىر بارلىعى قالىپقا كەلتىرىلدى. قازىر اۋىلدارعا كوپ كوڭىل ءبولىنىپ وتىر. ەندى ادامدار اۋىلدان كوشىپ كەتۋىن توقتاتادى دەپ ويلايمىن,–دەيدى بەستوبە كەنتىنىڭ تۇرعىنى سەرىك ءايىپوۆ.
بەستوبەدە ءتۇيىنى تارقاماعان ماسەلەلەر قاتارىندا: ەلدىمەكەن ىشىلىك جولداردى جوندەۋ, 36 كوشەنى جارىقتاندىرۋ, مۇعالىمدەر مەن مەديتسينا ماماندارىن تارتۋ جانە مال ازىعى, جايىلىم جەرلەرىنىڭ جەتىسپەۋشىلىگى بار. تۇرعىندار بۇل ماسەلەلەر دە شەشىم تابادى دەگەن سەنىمدە.