Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك تۇركىستان وبلىسىنىڭ ماقتاارال اۋدانىنا باردى. بۇل تۋرالى ول Facebook پاراقشاسىندا جازدى.
«ەلباسى, پارتيامىزدىڭ ليدەرى نۇرسۇلتان نازارباەۆتىڭ تاپسىرماسى بويىنشا تۇركىستان وبلىسىنىڭ ماقتاارال اۋدانىنا ارنايى كەلىپ, اپات اۋقىمىن ءوز كوزىممەن كورىپ شىقتىم. جۇرگىزىلىپ جاتقان قايتا قالپىنا كەلتىرۋ جۇمىستارىمەن تانىستىم. كورشىلەس وزبەكستانداعى سۋ بوگەتىنىڭ جارىلۋى سالدارىنان سۋ استىندا قالعان دوستىق, جەڭىس, فيردوۋسي, جاڭاتۇرمىس جانە ورگەباس اۋىلدارىنىڭ تۇرعىندارىمەن كەزدەستىم. توتەنشە جاعدايدىڭ كەسىرىنەن مىڭنان استام ءۇي بۇزىلىپ, 8 مىڭ گەكتار ەگىس القابىن سۋ باسقان.
«اپات ايتىپ كەلمەيدى» دەيدى حالقىمىز. ماقتارال جۇرتىنىڭ باسىنا تۇسكەن قيىندىق ەلگە ورتاق. ەڭ باستىسى, باس امان بولسىن.
قازىر مەملەكەت تاراپىنان بارلىق قاجەتتى كومەك كورسەتىلىپ, سۋ تاسقىنى سالدارىن جويۋ جۇمىستارى جۇرگىزىلۋدە. ەل پرەزيدەنتى قاسىم-جومارت توقاەۆ اتاپ كورسەتكەندەي, سۋ تاسقىنىنان زارداپ شەككەن تۇرعىندار تولىقتاي قايتا جوندەۋدەن وتكەن نەمەسە جاڭا سالىنعان ۇيلەرمەن قامتاماسىز ەتىلەدى. سۋ باسقان ايماقتاعى ءاربىر ادام رەسپۋبليكا بيۋدجەتىنەن 100 مىڭ تەڭگەدەن اقشا الادى. الەۋمەتتىك نىسانداردى, ينجەنەرلىك جەلىلەر مەن جولداردى قالپىنا كەلتىرۋگە 14 ميلليارد تەڭگەدەن اسا قاراجات ءبولىندى.
مەملەكەت باسشىسىنىڭ ۇندەۋىنە قولداۋ بىلدىرگەن قازاقستاندىق كاسىپكەرلەر دە 5 ملرد. تەڭگەدەن استام قاراجات اۋداردى. بۇل ورتاق ىسكە «Nur Otan» پارتياسى دا قىزۋ اتسالىسۋدا. نۇروتاندىقتار ماقتاارالداعى حالىققا قازىردىڭ وزىندە 920 توننادان استام گۋمانيتارلىق كومەك جىبەردى, ونىڭ ىشىندە ازىق-ت ۇلىك, گيگيەنالىق قۇرالدار, كيىم-كەشەك, توسەك-ورىن مەن قۇرىلىس جابدىقتارى بار.
ەلباسىنىڭ باستاماسى بويىنشا تۇڭعىش پرەزيدەنت قورى مەن «Nur Otan» پارتياسى قۇرعان «Birgemiz» قورى دا قوسىمشا كومەك كورسەتەدى. وسىعان وراي قوردىڭ قامقورشىلىق كەڭەسى مىرزاكەنت ەلدى مەكەنىنە 20 ءۇي تۇرعىزۋ ءۇشىن 340 ملن. تەڭگە ءبولۋ تۋرالى شەشىم قابىلدادى. وسىلايشا دوستىق اۋىلى تۇرعىندارىنىڭ باسپانا ماسەلەسى تولىقتاي شەشىلەتىن بولادى. وبلىس اكىمى ءو.شوكەەۆپەن بىرگە بولىنگەن جەردى قاراپ, تۇرعىندارمەن جانە قۇرىلىسشىلارمەن كەزدەستىم. بۇل جەردە سامان ۇيلەردىڭ ورنىنا گازوبلوكتان 100 شارشى مەتردى قۇرايتىن 4 بولمەلى ۇيلەر سالىنادى. جۇمىس ساپاسى اۆتورلىق جانە تەحنيكالىق باقىلاۋ سالاسىنداعى مامانداردىڭ قاتىسۋىمەن, ەرەكشە پارتيالىق باقىلاۋدا بولادى.
«جۇمىلا كوتەرگەن جۇك جەڭىل» دەگەندەي, بىرلەسىپ تىرلىك قىلساق, شەشىلمەيتىن ماسەلە قالمايدى.
سونىمەن بىرگە ساپار بارىسىندا جەدەل شتاب وتىرىسىن وتكىزدىك. مۇندا بىرقاتار وزەكتى ماسەلەلەردى, ونىڭ ىشىندە ينفراقۇرىلىمداردى ساپالى تۇردە قالپىنا كەلتىرۋ, اۋىل شارۋاشىلىعى ەڭبەككەرلەرىنە قولداۋ كورسەتۋ جانە تاعى باسقا جايتتەردى تالقىلادىق.
اتاكەنت اۋىلىندا ۆولونتەرلارمەن كەزدەستىم. وتكەن جىلى 700-دەن استام جاسوتاندىق بىرنەشە اي بويى ارىس قالاسىن قالپىنا كەلتىرۋ جۇمىستارىنا بەلسەنە اتسالىسقان بولاتىن. بۇگىن دە «Nur Otan» پارتياسى جاستار قاناتىنىڭ مۇشەلەرى مەن بەلسەندىلەرى ماقتاارالدىقتارعا كومەكتەسىپ جاتىر.
ۆولونتەرلىك – باتىستا پايدا بولعان قوزعالىس جانە بىزگە ەشقانداي قاتىسى جوق دەگەن پىكىردى ەستىپ ءجۇرمىز. بىراق بۇل بىزگە جات ەمەس. اسار ءداستۇرى قازاقتىڭ قانىندا بار. وسى يگى ءداستۇردى ءبىزدىڭ جاستارىمىز جاقسى جالعاستىرىپ وتىر.
بۇل جاستارعا وسىنداي قيىن كەزەڭدە ەلمەن بىرگە بولىپ, ءوز ەرىكتەرىمەن جانكەشتى ەڭبەك ەتىپ جۇرگەندەرى ءۇشىن العىس ايتتىم. ولار وزدەرىنىڭ ناقتى ىستەرىمەن وتانشىلدىقتىڭ, ۇيىمشىلدىق پەن ادامگەرشىلىكتىڭ ۇلگىسىن كورسەتىپ ءجۇر. مىنە, ءدال وسىنداي جاۋاپكەرشىلىگى مول جاڭا بۋىننىڭ وكىلدەرى الداعى ءماجىلىس پەن بارلىق دەڭگەيدەگى ءماسليحات سايلاۋلارىندا «Nur Otan» پارتياسىنىڭ تىزىمىندە بولۋى كەرەك. ەلىمىزدىڭ بولاشاعى – وسىنداي جاستار!» دەپ جازدى ول.